საქართველოში NASA-ს ინჟინერი შონ ფულერი ჩამოდის. ვიზიტი დაგეგმილია 12-13 ივნისს და მოიცავს ამერიკის სამოქალაქო კოსმოსური პროგრამისა და ჯანსაღი ეკონომიკის განვითარებისათვის სამეცნიერო განათლების მნიშვნელობის შესახებ ლექციებსა და სემინარებს.
13 ივნისს 16:00 საათზე ბათუმის ამერიკულ კუთხეში დაგეგმილია ონლაინ ვებჩატის მეშვეობით, თბილისში აშშ-ის საელჩოდან შონ ფულერის პირდაპირი ჩართვა.
ღონისძიებაზე დასწრება უფასოა.
სამუშაო ენა: ინგლისური.
იმავე დღეს, სამშაბათს, 13 ივნისს, 19:00 საათზე, ყველა მსურველს შეუძლია დაესწროს შონ ფულერის საჯარო ლექციას თბილისში, ილიას სახელმწიფო უნივერსიტეტში. „ლექცია შეეხება კოსმოსურ კვლევებს, როგორც წყაროს სხვადასხვა სფეროში ინოვაციისა და მეწარმეობისთვის“ – აღნიშნულია საქართველოში აშშ-ის საელჩოს მიერ გავრცელებულ ინფორმაციაში.
საელჩოს ინფორმაციით, ამჟამად შონ ფულერი მუშაობს კოსმოსში ადამიანების ფრენის NASA-ს პროგრამების დირექტორად ევრაზიის მასშტაბით და პასუხისმგებელია NASA-ს ეკიპაჟის წვრთნაზე, ფრენის მართვის ცენტრზე, საერთაშორისო კოსმოსური სადგურის ფრენის მართვის გუნდისა და ინჟინრების მუშაობაზე.