არამატერიალური კულტურული მემკვიდრეობის ძეგლს − „ქართული ხორბლის კულტურა: ტრადიციები და რიტუალები“ ეროვნული მნიშვნელობის კატეგორია მიენიჭა.
საქართველოს მთავრობის შესაბამისი დადგენილება დღეს, 2024 წლის 27 მარტს შევიდა ძალაში.
არამატერიალური კულტურული მემკვიდრეობის ძეგლის სტატუსი კი „ქართული ხორბლის კულტურას: ტრადიციები და რიტუალები“ – საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის ბრძანებით 2023 წელს მიენიჭა.
ქართულ ხორბალთან დაკავშირებით აღსანიშნავია, რომ 2018 წელს არამატერიალური კულტურული მემკვიდრეობის ძეგლის სტატუსი მიენიჭა ასევე ცალკე – „ქართული ხორბლის კულტურას [ენდემური სახეობები და ადგილობრივი ჯიშები]“, ხოლო 2019 წელს აღნიშნულ ძეგლს განესაზღვრა ეროვნული მნიშვნელობის კატეგორია.
იმავე 2019 წელს „ქართული ხორბლის კულტურა [ენდემური სახეობები და ადგილობრივი ჯიშები]“ საქართველომ იუნესკოშიც წარადგინა.
დღევანდელი მდგომარეობით იუნესკოს არამატერიალური კულტურული მემკვიდრეობის წარმომადგენლობით სიაში საქართველოდან შეტანილია:
- ქართული მრავალხმიანობა
- ქვევრის ღვინის დაყენების უძველესი ქართული ტრადიციული მეთოდი
- ქართული ანბანის სამი სახეობის ცოცხალი კულტურა
- ქართული ჭიდაობა
