„ყველა ადგილს სიაში ვერ დავუთმობთ,“ – გვითხრა „ერთიანი ნაციონალური მოძრაობის“ ერთ-ერთმა ლიდერმა და პარლამენტის წევრმა, დავით ხაჯიშვილმა, რომელსაც ოპოზიციის ერთობაზე ვკითხეთ: რატომ ვერ ახერხებს ოპოზიცია გაერთიანებას?
ამ ეტაპზე ოპოზიციის გაერთიანების ნიშნების არ ჩანს. ერთობის გარეშე კი, კვლევების მიხედვით, ხელისუფლების შეცვლის ალბათობა მცირდება. როგორ უყურებენ ოპოზიციაში გამარჯვების შანსს, როცა არჩევნები 5%-იანი ბარიერის პირობებში ტარდება, რაც ცალ-ცალკე მყოფმა პარტიებმა შესაძლო ვერ გადალახონ.
„გაერთიანების გარეშე შეუძლებელია ივანიშვილის პარტიის დამარცხება. ამას ალბათ ზაფხულში უფრო დავინახავთ,“ – ამბობს დავით ხაჯიშვილი, მასთან „ბათუმელებმა“ ინტერვიუ ჩაწერა.
- ბატონო დავით, კვლევების მიხედვით, თუ ოპოზიციური პარტიები არ გაერთიანდებით, მანდატების უმრავლესობა ისევ „ქართული ოცნების“ ხელში აღმოჩნდება. ამ მოცემულობაში რა შანსი რჩება ოპოზიციას გამარჯვებისთვის?
ოპოზიციამ, რა თქმა უნდა, უნდა იბრძოლოს იმისთვის, რომ შეცვალოს ხელისუფლება. კვლევების მიხედვით, ჯამურად გამოკითხულთა 65 % ოპოზიციას უჭერს მხარს, თუმცა ეს რომ აისახოს მანდატებში, ამას სჭირდება კარგი მენეჯმენტი.
ოპოზიციურმა პარტიებმა ისე უნდა დავამენეჯმენტოთ ეს პროცესი, ჩვენი, ოპოზიციური ხმები არ დაიკარგოს. მთავარი იდეა აქ არის ის, რომ ოპოზიციური ხმები არ აღმოჩნდეს „ქართული ოცნების“, ივანიშვილის საარჩევნო ყულაბაში. ჩვენ კარგად ვხედავთ, რომ ივანიშვილის პარტიას აქვს სხვადასხვა ბერკეტი: ცესკოს გავლენა, დაშინება, მოსყიდვა…
- ეს რომ არც გამოიყენოს მმართველმა ძალამ, კვლევებით ჩანს, რომ სამართლიანი არჩევნების შემთხვევაში, ოპოზიციას აგებს არჩევნებს. თუ თქვენთვის წარმატება მხოლოდ პარლამენტში შესვლა იქნება და დაახლოებით იგივე მოცემულობის შექმნა, რაც ახლა გვაქვს?
ჩვენი მიზანი არ არის მხოლოდ პარლამენტში შესვლა. ჩვენ, ენმ-ს გვინდა, რომ ოპოზიციასთან ერთად პარლამენტში ჩამოვაყალიბოთ კოალიცია. ვისთანაც შევძელით საერთო ენის გამონახვა, ეს არის „სტრატეგია აღმაშენებელი“.
ჩვენი მხრიდან ამ გამარჯვების კოალიციით ერთი ნაბიჯი გადავდგით, რომ სხვებისთვის მოგვეწოდებინა: აუცილებელია გარკვეული ერთობა პროდასავლურ პარტიებს შორის. ჩვენ პარტიის კარი გავაღეთ და ვთქვით, რომ ვართ ღია.
ჩვენ ასევე ვთქვით, რომ თუ არ გაქვთ ჩვენთან მოლაპარაკების სურვილი, მაშინ ნახეთ ერთმანეთთან საერთო ენა, როგორც, მაგალითად, ნიკა მელიამ და ნიკა გვარამიამ ნახეს საერთო. შეიძლება კიდევ ვინმე გაერთიანდეს მათ პლატფორმაზე, რაც არ არის გამორიცხული. ჩვენც არ გამოვრიცხავთ იმას, რომ შესაძლოა ვინმე დაგვემატოს.
- ვის დამატებას განიხილავთ, ვისთან გაქვთ მოლაპარაკებები?
ამ ეტაპზე არავისთან მძლავრი მოლაპარაკებები არ არსებობს, თუმცა ყოველთვის არსებობს განახლების შესაძლებლობა. ჩვენ სხვა პარტიებს ვთავაზობთ ერთიან საარჩევნო სიას, ასევე კოალიცია თუ შეიქმნება, ამ ადამიანების მონაწილეობას მთავრობის დაკომპლექტებაში და ასე შემდეგ.
მაგრამ ყველამ უნდა გაითავისოს ამ პროცესში თავისი წილი გაერთიანებასა და კოალიციაში. არ უნდა ჰქონდეთ ისეთი მოთხოვნები, რაც არარეალურია.
ადრეც იყო შემთხვევები, როცა ზოგიერთ პარტიას, ან ლიდერს, არ დავასახელებ ვის, მაგრამ აქვთ არარეალური მოთხოვნები.
- მაგალითად?
როცა საუბარია პარტიულ სიაზე, არის მოთხოვნა რაოდენობაზე. არსებობს გამოკითხვები, რომლის საფუძველზეც მათ ვეუბნებით: მოდი, ვისაუბროთ რეალურად და არა მოგონილი ციფრებით. პატარა პარტიები ელიან განახლებულ ინფორმაციას. ამჯერად არსებობს მოლოდინი რეიტინგზე, რაც გაზაფხულისთვის იქნება.
არჩევნებამდე ჯერ კიდევ არის რამდენიმე თვე და ისინი არ ჩქარობენ ამ გადაწყვეტილების მიღებას.
- თუ კვლევებში ისევ გამოჩნდება, რომ არსებობს 5%-იანი ბარიერის გადალახვის საფრთხე, ელოდებით, რომ ერთობა შეიძლება შედგეს?
ჩვენი მთავარი მოტივაცია არის არა ის, რომ ჩვენ მოვხვდეთ პარლამენტში, არამედ მეტნი ვიყოთ ოპოზიციიდან, ვიდრე ივანიშვილის პარტია იქნება. მთავარი მიზანი არის „ქართული ოცნების“ დამარცხება.
ჩვენ ვაფასებთ მონაცემებს რეალურად და ვიცით, რომ მარტო ამას ვერ შევძლებთ, ამიტომაც გვჭირდება სხვა ოპოზიციური პარტიების და ერთმანეთის დახმარება.
- რას აკეთებთ ამ ერთობისთვის?
ჩვენ ხელს ვუწყობთ იმას, რომ ე.წ. პატარა პარტიები ერთმანეთს დაელაპარაკონ, ნახონ საერთო ენა. ჩვენ, როგორც ყველაზე დიდი ოპოზიციური პარტია, თანაც ყველაზე გამოცდილი, თუ რამე დათმობა არსებობს პარლამენტში, პარლამენტის გარეთ, ყოველთვის ვცდილობთ, თავი შევიკავოთ ზედმეტი განცხადებებისგან, რომ არ დავაზიანოთ ოპოზიციური ველი.
ჩვენი ინტერესი არ არის ის, რომ ოპოზიციური პარტიები ერთმანეთის კრიტიკით დავკავდეთ.
- თქვენი აქცენტია ის, რომ ოპოზიციური პარტიები ერთმანეთს დაელაპარაკონ და არა ის, რომ თავად თქვენ დაელაპარაკოთ? თქვენ რატომ არ ელაპარაკებით სხვა პარტიებს ერთობაზე?
ეს იყო ჩვენი პირველი ეტაპი, როცა კარი გავხსენით. ვინც შემოვიდა კომუნიკაციაში და დაგვთანხმდა, ვნახეთ საერთო ენა.
მხოლოდ კარის გახსნა ლიდერის პოზიციიდან ხომ პასიური რეჟიმია? გამოდის, აქტიური ფორმებით არ ცდილობთ მიზნის მიღწევას, თუ თქვენი მიზანია „ოცნების“ დამარცხება და არა მხოლოდ პარლამენტში მოხვედრა.
ჩვენ კარი გავაღეთ და ველოდებით, ასე არ არის – პირველ ნაბიჯს ყოველთვის ჩვენ ვდგამთ. ჩვენ პარტიებს ვეუბნებით, რომ თუ გინდათ საერთო ბრძოლა, მზად ვართ გელაპარაკოთ.
ვინც გადადგა რეალური ნაბიჯი, არის „სტრატეგია აღმაშენებელი“ და ვხედავთ რეზულტატს. სხვებმა თავი შეიკავეს, ან სხვა მიზეზი იყო, არ ვიცი…
- რომელ პოლიტიკურ ძალაზე გაქვთ მოლოდინი, რომ წამოვა პოლიტიკურ ერთობაზე?
მოლოდინი გვაქვს, რომ ჩვენთან კიდევ შეიძლება ვინმე შემოვიდეს, მაგრამ არა ბევრი – ეს იქნება ერთი, ან ორი სუბიექტი. ესენი არიან ცალკეული ლიდერები, საზოგადო მოღვაწეები, რომლებიც დღეს შეიძლება პოლიტიკაში არ არიან, მაგრამ ხვალ ვიხილოთ „ნაციონალურ მოძრაობაში“.
გახარიასთან გამორიცხულია ამაზე საუბარი, ეს თავად მათი დეკლარირებული ფორმაა, რომ გამორიცხავენ ვინმესთან გაერთიანებას. „ლელოსთანაც“ არა მგონია გვქონდეს საერთო გაერთიანების პერსპექტივა. დანარჩენებთან არ ვიცი.
მაგალითად, გახარიას პარტიას აქვს მოცემულობა, რომ შესაძლოა გადალახონ ბარიერი, მას აქვს ივანიშვილი პარტიის უკვე ყოფილი მხარდამჭერების ხმები.
ასევე, კარგი იქნებოდა, ვფიქრობ, გვარამია-მელიას გაერთიანებასთან ერთობა იმ პარტიების, რომლებსაც დღეს უჭირთ ბარიერის გადალახვა. რამდენიმე პარტია შესაძლოა აქ გაერთიანდეს, თუმცა ყველა ელოდება გამოკითხვის შედეგებს.
- თქვენ რა დათმობაზე შეგიძლიათ წახვიდეთ იმისთვის, რომ „ოცნება“ აღარ დარჩეს უმრავლესობაში?
ჩვენ ყველაფერს ვაკეთებთ იმისთვის, რომ ოპოზიციაში არ იყოს ერთმანეთთან კინკლაობა. ჩვენ უნდა ვფოკუსირდეთ რეალურ პრობლემებზე, რაც ქვეყანაშია. ივანიშვილის პარტია ვერ ასრულებს ჩვენი ქვეყნის მოსახლეობის დაკვეთას…
ჩვენი მიზანია ივანიშვილის პარტიის დამარცხება, ხელისუფლების შეცვლა და კოალიციური მთავრობის დაკომპლექტება.
ჩვენი მთავარი მიზანია, არ დაიკარგოს ოპოზიციური ხმები. ვგულისხმობ იმას, რომ თუ ვერ გადალახა რომელიმე პატარა პარტიამ ბარიერი, ეს ხმები შეიძლება წავიდეს ივანიშვილის პარტიის ყულაბაში. ივანიშვილის პარტიას სწორედ ამის მოლოდინი აქვს, რომ გადაუნაწილებელი ხმებით გაიმარჯვებს. ყველასთვის ცხადია, რომ ამისთვის დატოვეს ეს 5 %-იანი ბარიერი.
არჩევნები ამ ბარიერის პირობებში ჩატარდება. ამას გარდა, ხელისუფლების ხელშია სხვა ტიპის გავლენები, მაგალითად, ვხედავთ როგორ იყენებს „ქართული ოცნება“ სოცდაუცველების დასაქმების პროგრამას საარჩევნოდ ხმების მოსაგროვებლად, ვხედავთ მმართველი პარტიის გავლენას მასწავლებლებზე, საჯარო მოხელეებზე…
ბოლო 10 წლის განმავლობაში 800 ათასამდე ჩვენმა თანამოქალაქემ დატოვა ქვეყანა. მათი ნაწილი შესაძლოა დაბრუნდა, მაგრამ ყოველდღიურად ეს ციფრი იცვლება: ვიღაც მოდის, ვიღაც – მიდის. ჩვენ გვყავს მილიონზე მეტი ჩვენი თანამოქალაქე ემიგრაციაში.
საგარეო საქმეთა მინისტრს ამ საკითხზე ვესაუბრებით: რატომ არ იხსნება დამატებით საარჩევნო უბნები უცხოეთში, იმდენი ბარიერი აქვთ ამისთვის, რომ ეს უბნები არ გაიხსნა, ამ მილიონზე მეტი ადამიანიდან მხოლოდ 12 ათასი მოქალაქე მონაწილეობს არჩევნებში.
ჩვენ, როგორც ყველაზე დიდი და პასუხისმგებლობიანი ოპოზიციური პარტია დღეის მდგომარეობით, ვცდილობთ, რომ მენეჯმენტი გავუწიოთ პატარა პარტიების დაახლოებას.
- როგორ უწყობთ ხელს სხვებს, როცა თქვენივე პარტია ჩამოიშალა?
ეს არის პარტიის შიდა საკითხი. თუ ჩვენ ახლა „ნაციონალური მოძრაობის“ შიდა საკითხს განვიხილავთ, შემიძლია სხვა მონაცემები მოვიყვანო, მაგრამ ჩვენ იმ პროცენტს, რაც გვქონდა წინა არჩევნებზე, იმ პროცენტს არ ჩამოვცდებით. როგორც მინიმუმ, იგივე რაოდენობის ხმებს ავიღებთ.
ამ ეტაპზე რთულია წინასწარ საუბარი, თუმცა როცა შიდაპარტიული კვლევები ჩატარდა, მალე ჩვენ ვნახავთ საერთაშორისო ორგანიზაციების კვლევებსაც, ვიმედოვნებთ, რომ 30 %-მდე, როგორც ეს წინა არჩევნებზე მივიღეთ, გვექნება.
ივანიშვილის პარტიას კი, ხმები დააკლდა – დაახლოებით 35 % აქვთ ხმების. წინა არჩევნებზე ჰქონდა დაახლოებით 42 %. 10%-მდე ხმები დააკლდათ მას შემდეგ, რაც უკრაინაში ომი დაიწყო – სრული ლუსტრაცია მოხდა ივანიშვილის პარტიის.
- უშვებთ, რომ ვინც „ოცნებას“ გაუნაწყენდა, თქვენი ამომრჩეველი გახდება?
პატარა პროცენტი შეიძლება ჩვენთანაც წამოვიდეს, მაგრამ დიდი პროცენტი წავა ე.წ. პატარა პარტიებში, რომლებმაც შესაძლოა ბარიერი ვერ გადალახონ. ამიტომაც, საჭიროა პატარ-პატარა პარტიების გაერთიანება, რადგან ზოგიერთი პარტია, რომელიც შეიძლება ჩვენთან გაერთიანდეს, დაკარგავს საკუთარ ამომრჩეველს.
ერთიანი საარჩევნო სიის შემთხვევაში სამწუხაროდ ამომრჩეველი ირჩევს იმ ნომერს, რომელიც ჩვენთან გაერთიანების შემთხვევაში 5 ნომერი იქნება. მაგალითად, „გირჩი“ ჩვენთან ვერ გაერთიანდება, რადგან მათმა ამომრჩეველმა პირობითად შეიძლება არ მისცეს ხმა „ნაციონალურ მოძრაობას“.
გამოვა, რომ ეს ხმები დარჩება ჰაერში. ამიტომაც, პარტიებმა უნდა ნახონ მათ ღირებულებებთან ახლოს მდგომი პარტიები.
ჩვენ ყველა პარტიასთან გადავდგით ნაბიჯი და ხელი გავუწოდეთ, ახლა მათი მხრიდან არის პასუხი მნიშვნელოვანი, ამ ხელს ჩამოართვამენ ხელს, თუ უარს იტყვიან გაწვდილ ხელზე.
ჩვენი პოზიცია არის მკვეთრი: ყველაფრისთვის ვართ მზად იმისთვის, რომ დამარცხდეს ივანიშვილის პარტია. ყველას დაველაპარაკებით, ვინც არ უნდა იყოს. ვსაუბრობთ, პირველ რიგში, პროდასავლურ პარტიებზე.
- თუმცა ოპოზიციის ნაწილი მიანიშნეს, რომ, მაგალითად, თქვენი გაერთიანება „სტრატეგია აღმაშენებელთან“ ცუდად აისახა რეიტინგზე – ბოლო კვლევებით თქვენი ნდობის მაჩვენებელი ამ გაერთიანების შემდეგ იკლებს.
ეს კლება სხვა რამეზე იყო უფრო დამოკიდებული. სამწუხაროდ, ეს იყო ტურბულენტობა, რომელიც პარტიაში გვქონდა – შიდა არჩევნები. ამას მოჰყვა ის, რომ ჩვენი ლიდერი მიხეილ სააკაშვილი ამ დრომდე ციხეშია. რა თქმა უნდა, ეს ჩვენს პარტიაზე ძალიან ცუდად აისახა, რადგან ჩვენი მთავარი საკითხი იყო მისი ჯანმრთელობა. ჩვენ ვერ შევძელით მისი დახსნა, ფიზიკურად ამას ვერ გავაკეთებდით…
თუმცა „ნაციონალური მოძრაობა“ ფორმას იბრუნებს. საბედნიეროდ, სააკაშვილის ჯანმრთელობის მდგომარეობა უკეთესის მომასწავებელია.
პრეზიდენტ ზურაბიშვილთან ჩვენ გვაქვს შეკითხვა, რადგან მან თავად იწვნია თავის თავზე ბრჭყალებში თავისუფალი სასამართლოს ვერდიქტი. მან იცის, რომ ქვეყნის მესამე პრეზიდენტის საქმე თავიდან ბოლომდე შექმნა ეფესბეს აგენტმა ფარცხალაძემ, შემდეგ კი განაჩენი გამოუტანა მურუსიძის სასამართლომ, რომელიც არის დასანქცირებული ჩვენი პარტნიორების მიერ.
სამწუხაროდ, მიხეილ სააკაშვილის გარეშე ივანიშვილის დამარცხება შეუძლებელია. მიხეილ სააკაშვილმა თქვა, რომ ის საპყრობილიდანაც ჩაერთვება წინასაარჩევნო მარათონში და ნამდვილად აქტიურია მისი ჯანმრთელობის მდგომარეობის მიუხედავად.
- არ ფიქრობთ, რომ უნდა გადახედოთ თქვენს მიდგომას, სხვა პარტიებთან ერთობას რომ მიაღწიოთ? ამომრჩეველი ხედავს, რომ ოპოზიცია არ ასრულებს საზოგადოების დაკვეთას და არ ერთიანდებით?
ჩვენ მაქსიმუმს ვაკეთებთ, ამაზე მეტი შეუძლებელია. მაშინ საერთოდ უნდა დავუთმოთ – მოდით, თქვენ იყავითო. უფრო დაბალ პროცენტს აიღებენ, ჩვენ თუ არ ვიქნებით პოლიტიკაში.
- არ ჩანს, რომ თქვენს შეთავაზებაში სხვა პარტიებისთვის არაფერია მიმზიდველი, რაც გაერთიანების პირობას შექმნიდა?
ყველა ადგილს სიაში ვერ დავუთმობთ, ეს არარეალურია. ჩვენ ყველას ვეუბნებით, რომ დავუშვათ, გაქვს 3 პროცენტი, აქედან გამომდინარე, მოდი, დავსხდეთ და ვისაუბროთ, რა შეიძლება ერთად გავაკეთოთ.
ჩვენი მხრიდან მაქსიმალური გაკეთებულია. გპირდებით, უფრო მეტს გავაკეთებთ, რაც უფრო დარწმუნდებიან ეს პატარ-პატარა პარტიები, რომ გაერთიანების გარეშე შეუძლებელია ივანიშვილის პარტიის დამარცხება.
ამას ალბათ ზაფხულში უფრო დავინახავთ.
