ლითონის კონსტრუქცია ქობულეთშიც გამოჩნდა. წლის დასაწყისში რკინის მსგავსი კონსტრუქციები ჩადგეს ბათუმში, ბაგრატიონის ქუჩაზე რეაბილიტირებულ სკვერშიც.
ლითონის კონსტრუქცია, რაც სატენდერო დოკუმენტაციაში „პერგოლით“ არის მოხსენიებული, ქობულეთის ბიუჯეტს 61 012 ლარი დაუჯდა. ჩაქვში მდებარე სკვერში, ქობულეთის მერიის დაკვეთით, სულ 10 პერგოლა ჩადგეს. ბათუმში, ბაგრატიონის ქუჩის სკვერის შემთხვევაში კი, 17 ლითონის კონსტრუქცია ჩაიდგა – 128 008 ლარად.
ბათუმის და ქობულეთის მერიებში ვერ ამბობენ: ვინ გადაწყვიტა, რომ ლითონის კონსტრუქციები იყო საჭირო ბაგრატიონის ქუჩაზე, ან ქობულეთში, ჩაქვში რეაბილიტირებულ სკვერში, რომელიც გუშინ, 13 მარტს მოინახულა აჭარის მთავრობის თავმჯდომარე თორნიკე რიჟვაძემ ქობულეთის მერთან ერთად?
ლითონის კონსტრუქცია ქობულეთში მდებარე სკვერში
ლითონის კონსტრუქცია ბათუმში, ბაგრატიონის ქუჩაზე მდებარე სკვერში
ქობულეთის მერიისგან ასევე გვაინტერესებდა იმის გაგება, თუ რატომ დასჭირდათ ბათუმში ჩადგმული ლითონის კონსტრუქციის კოპირება? – ქობულეთის მერიის პრესცენტრში ინფორმაციის მოწოდებას დაგვპირდნენ, თუმცა დღის ბოლომდე ეს პირობა ვერ შესრულდა.
2024 წლის თებერვალში, როცა „ბათუმელებმა“ მოამზადა ინფორმაცია ბაგრატიონის ქუჩის სკვერის რეაბილიტაციის შესახებ, ბათუმის მერიაში განმარტეს, რომ ლითონის კონსტრუქცია მხოლოდ დეკორაციული თაღია, ღამით ნათდება და მას აღარაფერი დაემატება. ადგილზე შემხვედრმა მოქალაქეებმა კი თქვეს, რომ სკვერის რეაბილიტაცია ახარებთ, მაგრამ ვერ გაუგიათ, რა დანიშნულება აქვს, ან რატომ ჩადგეს მწვანე ზოლში ამდენი რკინის კონსტრუქცია ერთად.
„კროსვორდივითაა, უნდა გამოიცნო“, – გვითხრა ერთ-ერთმა მოქალაქემ.
მოქალაქეთა ნაწილის ვერსიით, ლითონის კონსტრუქციაზე ყვავილებს გაუშვებენ, თუმცა მსგავსი პირობა ხელშეკრულებით გათვალისწინებული არ არის. პერგოლა ლითონის მილებია და გადახურული არ არის. მას საჩრდილობლის ფუნქცია არ აქვს და ვერც წვიმის დროს შეაფარებთ თავს.
სატენდერო დოკუმენტაციების მიხედვით, ბათუმის და ქობულეთისთვისაც საპროექტო დოკუმენტაცია ერთი და იგივე კომპანია „არტ იდეას“ მოუმზადებია. ამ კომპანიას ჩაუსვამს პროექტში „პერგოლა“. მერიებში არ სურთ განმარტონ: როგორ მიიღეს ეს გადაწყვეტილება და რა ფორმით არიან ამაში ჩართულები სპეციალისტები, მოქალაქეები?
ქობულეთის სკვერზე კომპანია „ჯორჯიან სტოუნ“ მუშაობდა. სამუშაოების ჯამური ღირებულება 1 198 559 ლარია. ბათუმის შემთხვევაში კი, ბაგრატიონის ქუჩაზე მდებარე სკვერის რეაბილიტაცია კომპანიამ „მონოლოთი 2005“ იმუშავა. სამუშაოები ჯამური ღირებულება 1 940 285 ლარია.
ამ თემაზე:
„კროსვორდივითაა, უნდა გამოიცნო“ – რა მოაწყვეს ბაგრატიონის ქუჩის სკვერში 2 მილიონად
