პედაგოგებმა – დათო ფერაძემ, მაია ეკალაძემ და გიორგი ჭაუჭიძემ გაასაჩივრეს განათლების მინისტრის, გიორგი ამილახვრის 2024 წლის 15 თებერვლის ბრძანება, საჯარო სკოლის დირექტორთა შერჩევის წესის შესახებ.
დღეს, 13 მარტს, ისინი იმყოფებოდნენ მთავრობის აპარატში და პრემიერის სახელზე დაწერილი საჩივარი დაარეგისტრირეს.
„პრემიერ-მინისტრის სახელზე შევიტანეთ ადმინისტრაციული საჩივარი, განათლების სამინისტროს წინააღმდეგ და აი ამ ბრძანების არარად გამოცხადებას ვითხოვთ, ადმინისტრაციულ, ზოგადი განათლების შესახებ კანონთან და სხვა შეუსაბამობების გამო.
აღნიშნული ბრძანება ჩვენ, კონკურსანტებს დისკრიმინაციულ მდგომარეობაში გვაყენებს“, – ამბობს დათო ფერაძე.
მისი თქმით, მინისტრის ახალი ბრძანება არ იძლევა შესაძლებლობას, კონკურსანტმა გაასაჩივროს გასაუბრების შედეგები, ასევე ბუნდოვანია სხვა პროცედურებიც.
„ეს გარდაუვლად გამოიწვევს იმას, რომ კომისიის მიერ დირექტორობის კანდიდატის შერჩევის პროცესი გახდება დამოკიდებული კომისიის წევრების პირად დამოკიდებულებებზე ან/და შეხედულებებზე. შესაბამისად, ვერ იქნება ობიექტური, ნეიტრალური და მიუკერძოებელი.
ეს კი დირექტორობის კანდიდატების დასაქმების, ანუ შრომის და მის მიერ ადმინისტრაციული აქტის გასაჩივრების უფლებების დარღვევას, შესაბამისად სისხლისსამართლებრივ ან/და ადმინისტრაციულ სამართალდარღვევას გამოიწვევს.
სწორედ ამის გამო აღნიშნული ბრძანება უნდა გამოცხადდეს არარად.
მოვითხოვთ, გამოიცეს საჯარო სკოლების დირექტორთა შესარჩევი კონკურსის მარეგულირებელი ახალი ნორმატიული აქტი, რომელიც დაარეგულირებს:
2011 წლის 25/ნ ბრძანებით წარმატებით ტესტირებაგავლილი კონკურსანტების პირდაპირ წარდგენას სამეურვეო საბჭოებისთვის ასარჩევად, დირექტორობის კანდიდატის „საჯარო სკოლის დირექტორის სტანდარტთან“ შესაბამისობას და საჯარო სკოლების სამეურვეო საბჭოებისათვის დირექტორობის კანდიდატების ასარჩევად წარდგენას;
გასაუბრების კომისიის დაკომპლექტებას, კრიტერიუმებს, რომლებსაც უნდა აკმაყოფილებდეს კომისიის წევრი;
კონკურსის მონიტორინგს სკოლის/სკოლების სტრატეგიული განვითარების ხედვას და საფუძველს, რასაც უნდა დაეყრდნოს კონკურსანტი ამ ხედვის შემუშავებისას;
კონკრეტული სკოლების გაზომვად, კონკრეტული კვალიფიციურ კრიტერიუმებს, რომლითაც შეფასდება კონკურსანტის ე.წ. ხედვა და რომლის გაცნობის შესაძლებლობა კონკურში რეგისტრაციამდე მიეცემა დირექტორობის მსურველს“, – წერია მოთხოვნებში.
დათო ფერაძე, მაია ეკალაძე და გიორგი ჭაუჭიძე, საჯარო სკოლის დირექტორების შესარჩევ კონკურსში 2023 წელს მონაწილეობდნენ და ღიად აპროტესტებდნენ კონკურსის მეორე ეტაპის შედეგებს და იმას, რომ კანდიდატების ნაწილი, სერტიფიკატის აღების მიუხედავად, სამინისტრომ კანდიდატის მიერ მითითებულ არცერთ სკოლაში არ წარადგინა.
რამდენიმეთვიანი საპროტესტო აქციების შემდეგ, განათლების სამინისტრომ სკოლის დირექტორების შესარჩევი კონკურსი ხელმეორედ გამოაცხადა, თუმცა შერჩევის წესთან დაკავშირებით, კანდიდატების თქმით, მაინც არსებობს კითხვები და ბუნდოვანება.
რაც შეეხება ახალ კონკურსს, როგორც სამინისტრომ განაცხადა, დირექტორების შესარჩევი კონკურსის პირველი ეტაპი ანუ ტესტირება უკვე ჩატარდა 10 მარტს, მეორე ეტაპის თარიღი კი, ჯერჯერობით უცნობია.
