ბათუმში პარკირების 22 682 დარღვევა დააფიქსირეს - 2 თვის მონაცემები - Batumelebi • პარკირება, პარკირება ბათუმში, • batumelebi.ge

ბათუმის მუნიციპალური ინსპექციის ინფორმაციით, პარკირებისა და ტრანსპორტის ზედამხედველობის სამსახურმა 2024 წლის ორ თვეში [იანვრიდან 6 მარტამდე პერიოდში] 22 682 სამართალდარღვევა გამოავლინა, საიდანაც 6 017 არასწორი პარკირება იყო, 16 665 შემთხვევა კი – პარკირების საფასურის გადახდის გარეშე დგომა.

ამავე პერიოდში სამსახურმა 491 ავტომობილი საჯარიმოზე გადაიტანა.

ბათუმის მუნიციპალური ინსპექციის ინფორმაციით 6 017 არასწორი პარკირებიდან:

2 237 იყო დგომა-გაჩერებისა და სხვა ნიშნების დარღვევა,
1 921 – ტროტუარზე დგომა,
1056 – ავტობუსის გაჩერებაზე დგომა,
125 – ველობილიკზე არასწორი პარკირება,
52 – შშმ პირის ტრანსპორტისთვის განსაზღვრულ ადგილზე დგომა,
626 – პარკირების წესის სხვა დარღვევა.

ჯარიმების ოდენობამ კი [საჯარიმოზე გადატანილი ავტომობილების ტრანსპორტირების ხარჯის ჩათვლით] მთლიანობაში სულ ცოტა 392 ათას 80 ლარი შეადგინა.

რა დარღვევებისთვის და რამდენით აჯარიმებს მძღოლებს ბათუმის მუნიციპალური ინსპექცია:

პარკირების საფასურის გადახდის გარეშე დგომა – ჯარიმა 10 ლარი
ტროტუარზე დგომა – 10 ლარი
დგომა-გაჩერებისა და სხვა ნიშნების დარღვევა – 10 ლარი
ავტობუსის გაჩერებაზე დგომა – 100 ლარი
BUS LANE-ზე დგომა – 100 ლარი
ველობილიკზე არასწორი პარკირება – 100 ლარი
შშმ პირის ტრანსპორტისთვის განსაზღვრულ ადგილზე დგომა – 200 ლარი
შშმ პირისთვის მოწყობილ პანდუსზე გადაადგილების შეფერხება – 200 ლარი

ბათუმის საკრებულომ კი, ქალაქში ავტოსატრანსპორტო საშუალების სპეციალურ დაცულ სადგომზე გადაყვანისას ტრანსპორტირების ხარჯი გასული წლის დეკემბრიდან 100 ლარით განსაზღვრა.

პარკირების ადგილების დეფიციტი ბათუმისთვის უკვე ნებისმიერ სეზონზე სერიოზული პრობლემაა.

მიწისქვეშა და მიწისზედა მრავალდონიანი პარკინგების მოწყობას ითხოვს ბათუმის საკრებულოს ოპოზიცია. ამაზე მათ 2024 წლის ბიუჯეტის პროექტის შენიშვნებშიც დაწერეს. ოპოზიციის მოსაზრებით მრავალდონიანი პარკინგების მოწყობა თავად მერიამ უნდა უზრუნველყოს და ისინი ყველასთვის მისაწვდომი უნდა იყოს.

აქვე უნდა აღინიშნოს, რომ ერთი მხრივ, ბათუმის მერიაც აღიარებს ქალაქში პარკირების ადგილების ნაკლებობას, როგორც გამოწვევას, თუმცა, მეორე მხრივ, საზოგადოების პროტესტის მიუხედავად საკრებულოსთან ერთად ამტკიცებს სამშენებლო პროექტებს, რომლებიც პარკინგების ადგილების მოწყობას, ბინების რაოდენობის პროპორციულად, არ ითვალისწინებს.

ამ თემაზე ვრცლად: „მაპოვნინე აბა სხვა ადგილი“ – მძღოლი, რომელმაც მანქანა ზებრაზე გააჩერა

ტროტუარზე დგომა | ფოტოები გადაღებულია დღეს, 13 მარტს, ბათუმში: