8 მარტის ინციდენტის შემდეგ, ადიგენის მერი და რელიგიის საკითხთა სახელმწიფო სააგენტოს ხელმძღვანელი მუსლიმებს შეხვდნენ. ეს დახურული შეხვედრა მუსლიმებთან გუშინ, 12 მარტს, გამართეს.
„ბათუმელები“ ორი დღეა ცდილობს გაარკვიოს, რაზე შეუთანხმდა სახელმწიფო მერაბ მიქელაძეს, ანუ იმ მუსლიმ სასულიერო პირს, ვისაც 8 მარტს დაბა ადიგენში მცხოვრები მართლმადიდებელი მრევლის ნაწილი და რამდენიმე სასულიერო პირი მიეჭრა კერძო საკუთრებაში ლოცვის დროს და დაემუქრა. მერაბ მიქელაძეს მართლმადიდებელი სასულიერო პირები აიძულებენ არ ჩაატაროს მუსლიმური რელიგიური მსახურება თავის კერძო სახლში და ამისთვის სხვა, ალტერნატიული ადგილი გამოძებნოს.
თუმცა რაზე შეთანხმდნენ მხარეები საბოლოოდ, უცნობია, რადგან არც სამცხე-ჯავახეთის მუფთი და არც მერაბ მიქელაძე მედიასთან ამ თემაზე აღარ საუბრობენ. ადიგენის მერი გოჩა ქიმაძე კი აცხადებს, რომ თუ რამე სათქმელი ექნება „ბრიფინგს გამართავს“. ამ საქმეში ჩარეული არიან სახელმწიფო უწყებებიც.
გუშინდელ დახურულ შეხვედრაზე იმყოფებოდა მუსლიმი თემის წარმომადგენელი, პარლამენტის წევრი ტარიელ ნაკაიძე. ამიტომ მას ვკითხეთ, შედგა თუ არა შეთანხმება მერაბ მიქელაძესა და მერიას შორის და ხომ არ მოხდა ეს შეთანხმება ადამიანის უფლებების დარღვევის ხარჯზე.
ტარიელ ნაკაიძის ინფორმაციით, ადიგენის მერია მერაბ მიქელაძეს დაჰპირდა, რომ მეჩეთისთვის საჭირო ადგილს მეზობელ სოფელში გამოყოფენ იმ შემთხვევაში, თუ ის შეწყვეტს რელიგიურ მსახურებებს თავის საცხოვრებელ სახლში.
„რაიმე კონკრეტული შეთანხმება არ ყოფილა. ხელისუფლებამ აიღო ერთკვირიანი ტაიმ-აუტი და თქვა, რომ ამ ერთ კვირაში მოაგვარებს მეჩეთისთვის მიწის გამოყოფის საკითხს.
აქ იყო საუბარი გასული წლის შეთავაზებაზე, რომელიც ჰქონდა მერიას და თავად ჩაშალეს, ადგილმონაცვლეობის საკითხზე. მიუხედავად იმისა, რომ ერთი ხანი არ იყო მერაბ მიქელაძე ამაზე თანახმა, მაინც გადაწყვიტა ამ მოლაპარაკებებზე წასვლა.
ამისთვის აიღეს ეს ერთკვირიანი ვადა, რომ მოაგვარებენ ამ საკითხს. ვნახოთ, ველოდებით“, – ამბობს ტარიელ ნაკაიძე „ბათუმელებთან“.
მისი თქმით, იმ შემთხვევაში თუ სახელმწიფო მიწას გამოყოფს მეჩეთისთვის, ეს ქონება მერაბ მიქელაძეს უნდა გადაეცეს საკუთრებაში.
„ან მიქელაძის საკუთრებაში გადავა, ან [მის მიერ დაფუძნებული] ორგანიზაციის. ამას მნიშვნელობა არ აქვს. ერთ კვირაში უნდა მოაწესრიგონ ტექნიკური საკითხები, როგორ ითქვა შეხვედრაზე. სახელმწიფო ცდილობს, რომ რაღაც მოაგვაროს – ასეთი შთაბეჭდილება დამრჩა, მაგრამ სიმართლე გითხრათ, მსგავს სიტუაციებში სახელმწიფო ყოველთვის არის ხოლმე პასიური და ვერ აგვარებს პრობლემებს.
შეკრებილებმა მუსლიმების ლოცვის უფლება არ მისცეს – ადიგენი, 8 მარტი
ჩვენ მაინც დაველოდებით, რადგან ეს ერთი კვირა არაფერს არ წყვეტს“, – ამბობს ტარიელ ნაკაიძე.
თუნდაც მოაგვაროს ეს საკითხი სახელმწიფომ და მერაბ მიქელაძე დათანხმდეს მსგავს წინადადებას, რამდენად კონსტიტუციურია აიძულო საქართველოს მოქალაქის ასეთ შეთანხმებაზე წასვლა და არღვევს თუ არა ეს რწმენის და აღმსარებლობის უფლებას – ვკითხეთ ტარიელ ნაკაიძეს.
„დიახ, მე პირადად ვხედავ ამაში პრობლემას, რადგან სახელმწიფო სათანადო შეფასებას ვერ აძლევს ასეთ მოვლენებს. მიუხედავად იმისა, რომ მუსლიმი ვარ და მაწუხებს ასეთი პრობლემები, მხარე ცდილობს შეუთანხმდეს სახელმწიფოს, ამიტომ მე უფლება არ მაქვს მოვუწოდო არ შეუთანხმდე-მეთქი.
ზოგადად კი, როგორც პოლიტიკოსი მივიჩნევ, რომ ეს არის ძალიან არასწორი ნაბიჯი, როცა ერთი მხარე დანაშაულს ჩადის და არანაირი პასუხისგება მის მიმართ არ არსებობს და მეორე მხარეს სთხოვ, რომ გარკვეულ დათმობებზე წავიდეს. თუ ჩვენ არ მივიღებთ სამართლებრივ შეფასებებს და არ დავსჯით დამნაშავეებს, ეს პრევენცია ვერ იქნება და ხვალ კიდევ სხვაგან გაჩნდება პრობლემა.
როცა სახელმწიფო ამ ფორმით ხედავს პრობლემის მოგვარება, ესეც პრობლემაა“, – ამბობს ტარიელ ნაკაიძე.
ტარიელ ნაკაიძის თქმით, შეხვედრას ადიგენის მერის და რელიგიის სახელმწიფო სააგენტოს გარდა, ხულოს მერი და სამცხე-ჯავახეთის გუბერნატორიც ესწრებოდნენ.
