საქართველოს მთავრობის 2024 წლის 12 მარტის განკარგულებით გადაწყდა, რომ „ბათუმის ავტოტრანსპორტისთვის“ 100 ახალი მიკროავტობუსისა და 25 ავტობუსის შესაძენად კონსოლიდირებულ ტენდერ[ებ]ს გამოაცხადებენ. მთავრობის ამავე განკარგულებით განისაზღვრა სატენდერო კომისიის შემადგენლობაც.
ბათუმისთვის მიკროავტობუსები და ავტობუსები 2024-2026 წლებში უნდა შეიძინონ, თუმცა მთავრობის განკარგულებაში აღნიშნულია, რომ „ბაზრის კვლევის შედეგებზე დაყრდნობით სატენდერო კომისია უფლებამოსილია აღნიშნულ ვადაში ჩაატაროს ერთი ან რამდენიმე კონსოლიდირებული ტენდერი.“
ტენდერში მონაწილე პრეტენდენტისთვის ტენდერში წინადადების წარდგენის საფასური კი მთავრობამ 10 000 ლარით განსაზღვრა.
აღსანიშნავია, რომ სახელმწიფო შესყიდვების შესახებ კანონით კონსოლიდირებულ ტენდერში სატენდერო წინადადების წარდგენის საფასური 5 000 ლარია განსაზღვრული, თუმცა ამავე კანონით მთავრობას შეუძლია კონკრეტულ შემთხვევაში განსხვავებული საფასურიც დაადგინოს.
„იმ შემთხვევაში, თუ კონსოლიდირებული ტენდერი შეწყდება ან დასრულდება უარყოფითი შედეგით, განმეორებით გამოცხადებულ ტენდერში, შეწყვეტილ ან უარყოფითი შედეგით დასრულებულ ტენდერში მონაწილე პრეტენდენტისთვის სატენდერო წინადადების წარდგენის საფასური განისაზღვროს 1 000 ლარის ოდენობით“, – აღნიშნულია მთავრობის განკარგულებაში.
სატენდერო კომისიის შემადგენლობაში შედიან:
- სახელმწიფო შესყიდვების სააგენტოს თავმჯდომარე [კომისიის თავმჯდომარე];
- მთავრობის ადმინისტრაციის უფროსის მოადგილე [კომისიის თავმჯდომარის მოადგილე];
- რეგიონული განვითარებისა და ინფრასტრუქტურის მინისტრის მოადგილე [კომისიის თავმჯდომარის მოადგილე];
- იუსტიციის მინისტრის მოადგილე [წევრი]
- ფინანსთა მინისტრის პირველი მოადგილე/მოადგილე [წევრი];
- თავდაცვის მინისტრის მოადგილე [წევრი];
- ეკონომიკისა და მდგრადი განვითარების მინისტრის მოადგილე [წევრი];
- შინაგან საქმეთა მინისტრის მოადგილე [წევრი];
- საქართველოს კონკურენციისა და მომხმარებლის დაცვის სააგენტოს თავმჯდომარე [წევრი];
„ორგანიზაციული და ტექნიკური ტიპის ან/და ხელშეკრულების შესრულების პერიოდში მიმდინარე საკითხებთან დაკავშირებით, რომლებიც არ საჭიროებენ სატენდერო კომისიის სხდომის მოწვევას, კომისიის მიერ გადაწყვეტილება შესაძლებელია მიღებულ იქნეს ელექტრონული ფოსტის მეშვეობით“, – აღნიშნულია მთავრობის განკარგულებაში.
ბათუმის 2024 წლის ბიუჯეტის მიხედვით, „მუნიციპალური მიკროავტობუსების და ავტობუსების შეძენა მრავალწლიანი პროექტია [2024-2026 წლები], რომლის ღირებულება 39 252 624 ლარია“.
ამასთან, 2024 წლის შპს „ბათუმის ავტოტრანსპორტისათვის“ მუნიციპალური მიკროავტობუსების და ავტობუსების შესაძენად გაწერილია 16 მილიონ 719 ათას 500 ლარი. ავტობუსების საბოლოო [ტენდერში დაფიქსირებული] ღირებულება კი, სრულად 2026 წლის ჩათვლით დაიფარება.
ვრცლად: ახალი 25 ავტობუსი და 100 მიკროავტობუსი – როგორ დახარჯავს ბათუმის მერია 30 მილიონს
„ახალი ავტობუსები და მიკროავტობუსები ძირითადად ქალაქს შემოერთებულ ტერიტორიაზე იმოძრავებენ, სადაც დღეს არ მოძრაობს ავტობუსი“, – უთხრეს დაახლოებით ერთი თვის წინ „ბათუმელებს“ „ბათუმის ავტოტრანსპორტში“.
