სახმელეთო ტრანსპორტის სააგენტო მძღოლების ბრალდებებს პასუხობს. საქმე ეხება მესამე ქვეყანაში/ქვეყნიდან საერთაშორისო საავტომობილო ერთჯერადი სატვირთო გადაზიდვის ნებართვებს, რომლის მიღებასაც მძღოლები და გადამზიდავები ვერ ახერხებენ.
ნებართვების გაცემა 17 იანვარს დაიწყო. მძღოლები, რომლებიც „ბათუმელებს“ ესაუბრნენ, ამბობენ, რომ ასობით ზარის განხორციელების მიუხედავად, ვერ მოახერხეს სააგენტოსთან დაკავშირება და ნებართვის მისაღებად საჭირო წინასწარი რეგისტრაციის გავლა.
„ბათუმელებმა“ სტატია ამ თემაზე 24 იანვარს მოამზადა.
სტატიის გამოქვეყნების შემდეგ მძღოლებმა ფეისბუქზე, კომენტარებში დაპოსტეს მათ მიერ სააგენტოში განხორციელებული ზარების ამსახველი სქრინები.
სტატიის მომზადებისას კითხვებით მივმართეთ სახმელეთო ტრანსპორტის სააგენტოს.
სააგენტომ პასუხები დღეს, 25 იანვარს მოგვაწოდა. გთავაზობთ კითხვებს, რომლითაც გამოცემამ სააგენტოს მიმართა და პასუხებს, რომელიც სახმელეთო ტრანსპორტის სააგენტომ წერილობით მოგვაწოდა.
„ბათუმელებმა“ სააგენტოს ჰკითხა, თუ რატომ არ პასუხობენ მძღოლებს სააგენტოს მიერ ნებართვების მისაღებად გამოქვეყნებულ ნომერზე [032 236 55 01], რა სახის ხარვეზია სააგენტოში, რის გამოც ფერხდება ნებართვის მისაღებად რეგისტრაცია და ხომ არ აქვთ ინფორმაცია სააგენტოში არსებული შესაძლო კორუფციის ფაქტებზე (მძღოლები და გადამზიდავები ამბობენ, რომ ნებართვებს შავ ბაზარზე ყიდულობენ).
სახმელეთო ტრანსპორტის სააგენტოს პასუხს „ბათუმელები“ უცვლელად გთავაზობთ:
„საერთაშორისო საავტომობილო სატვირთო გადაზიდვის მე-3 ქვეყანაში მე-3 ქვეყნიდან ნებართვების მისაღებად, წინასწარი რეგისტრაციის პროცესი 17 იანვარს დაიწყო და გაგრძელდა შესაბამისი ნებართვების რაოდენობის ამოწურვამდე. სანებართვო დოკუმენტები სრულად დარეზერვდა კომპანიების თუ ინდივიდუალური მეწარმეების მიერ. ამ პერიოდის განმავლობაში, სააგენტოს საინფორმაციო ცენტრმა დაარეგისტრირა 600-მდე კომპანია და 300-მდე ინდივიდუალური მეწარმე.
ერთჯერადი სატვირთო გადაზიდვის ნებართვის გაცემის პროცესი სრულიად უხარვეზოდ მიმდინარეობს, თუმცა, უნდა აღინიშნოს, რომ ნებართვების რაოდენობა სააგენტოს მესამე ქვეყნებიდან მიეწოდება შეზღუდული რაოდენობით, ხოლო მოთხოვნა გაცილებით დიდია.
რაც შეეხება კითხვას მძღოლების მიერ მესამე პირისგან ნებართვების ყიდვასთან დაკავშირებით, განმარტავთ, რომ სააგენტოში, ოფიციალურად, ასეთ ფაქტთან დაკავშირებით არცერთი საჩივარი არ შემოსულა.
სახმელეთო ტრანსპორტის სააგენტოში ფუნქციონირებს მონიტორინგის დეპარტამენტი, რომლის უშუალო მოვალეობაა მსგავსი ფაქტების აღმოფხვრა. შესაბამისად, თუ არსებობს დადასტურებული ფაქტი და ამის შესახებ ოფიციალურად გახდება ცნობილი სააგენტოსთვის, მონიტორინგის დეპარტამენტი ჩაატარებს მოკვლევას და მოახდენს რეაგირებას შესაბამისი რეგლამენტის საფუძველზე.
რაც შეეხება ე.წ. მესამე პირების მიერ წინასწარი რეგისტრაციის გავლას ათობით მანქანისთვის, გაცნობებთ, რომ როგორც წინასწარ დაანონსებულ ინფორმაციაში იყო მითითებული (სააგენტოს ფეისბუქისა და ვებგვერდებზე), ერთ კომპანიაზე დარეზერვდა 2 ნებართვა, ხოლო ინდმეწარმეზე 1 ნებართვა.
ნებართვის აღება გადამზიდველებს შეეძლებათ სახმელეთო ტრანსპორტის სააგენტოს მომსახურების ოფისებში, თუ მათ გავლილი აქვთ წინასწარი რეგისტრაცია, ხოლო თანხას იხდიან სასურველი ნებართვის ღირებულების შესაბამისად.
გვსურს აღვნიშნოთ, რომ ნებართვების წინასწარი რეგისტრაციის პროცესი სააგენტომ დაიწყო მომხმარებლების სურვილის შესაბამისად, რომლის მიზანია მომხმარებლის სააგენტოში ვიზიტის წინასწარი დაჯავშნა, რათა მანამდე არსებული პრაქტიკის გათვალისწინებით, აღარ მოხდეს სააგენტოს ოფისებთან რიგების ფორმირება.
სამწუხაროდ, გასული წლების გამოცდილება გვაჩვენებს, რომ მანამდე არსებული პრაქტიკა უპირველესად, თავად ნებართვის მაძიებლებს უქმნიდა დისკომფორტს, რადგან მათ უწევდათ ცოცხალ რიგში ლოდინი და ხშირად ძალიან დიდი დროის დაკარგვა უშედეგოდ.
აქვე გაცნობებთ, რომ სააგენტოს საინფორმაციო ცენტრში სისტემური ხარვეზი არ დაფიქსირებულა, ხაზების გადატვირთვა გამოიწვია ძალიან მაღალმა მომართვიანობამ“.
ამავე თემაზე:
