„ღმერთით დასრულდება“, – საქმის დასრულებაში ეჭვი ეპარება ყოფილ პატიმარს, ვახტანგ სიორიძეს. ის უკვე მე-10 წელი ელის განაჩენს „ბათუმის ციხის ყოფილი უფროსების საქმეზე“.
ვახტანგ სიორიძემ წლების წინ ჩვენება მისცა სასამართლოს, თუმცა მან ისევ უნდა მისცეს ჩვენება სასამართლოს. უცნობია, როდის, რადგან ყოფილი პატიმარი პროკურორის ზარს ელის. საქმის განხილვის დასრულების სანაცვლოდ, განხილვა სასამართლოში ხელახლა დაიწყო.
ამ საქმის განხილვა გაჭიანურებულია იმის მიუხედავად, რომ „ქართული ოცნება“ ხელისუფლებაში ზუსტად ციხეებში არსებული სისასტიკის გამოძიების დაპირებით მოვიდა.
დღეს, 25 იანვარს, ბათუმის საქალაქო სასამართლოში „ბათუმის ციხის ყოფილი უფროსების საქმის“ განხილვა კიდევ ერთხელ გადაიდო, ამჯერად ადვოკატის, იოსებ ჯალაღონიას გამოუცხადებლობის მიზეზით.
„მან 24 იანვარს მოგვმართა განცხადებით, რომ ზუგდიდში ნაფიცი მსაჯულების სასამართლო სხდომაში მონაწილეობს და ითხოვა გადადება,“ – თქვა მოსამართლე კოტე ჭილაიამ სასამართლო დარბაზში, სადაც დღევანდელ პროცესზე მხოლოდ პროკურორი პაატა ცეცხლაძე და ზაზა ჯიქიას ადვოკატი – პაატა ბოლქვაძე გამოცხადდნენ.
საქმის განხილვა კიდევ ერთხელ გადაიდო, ამჯერად მარტამდე.
ბრალდებულები ბათუმის ციხის ყოფილი ხელმძღვანელი პირები: გიორგი ვეკუა და ზაზა ჯიქია არიან. ისინი გირაოს საფუძველზე არიან გათავისუფლებულები. პროკურატურა ბრალდებულებს პატიმრების მიმართ არაადამიანურ მოპყრობას ედავება.
ამ საქმის განმხილველი მოსამართლე დავით მამისეიშვილი სამუშაოდ თბილისის სააპელაციო სასამართლოში გადავიდა, საქმის განხილვა ხელახლა 2023 წელს დაიწყო.
დასვა თუ არა პროკურატურამ მოსამართლის პასუხისმგებლობის საკითხი იუსტიციის უმაღლეს საბჭოში, რადგან საქმეზე სათადარიგო მოსამართლე დანიშნული არ იყო და საქმის განხილვა კანონით განსაზღვრულ ვადაში ვერ დასრულდა? – ვკითხეთ პროკურორ პაატა ცეცხლაძეს მას შემდეგ, რაც მოსამართლემ სხდომის დარბაზი დატოვა.
„სხვა პროკურორი იყო მაშინ და არ მაქვს ამის შესახებ ინფორმაცია,“ – გვიპასუხა პაატა ცეცხლაძემ. მან გვითხრა, რომ ყველა მოწმე თანახმაა, ხელახლა მისცეს ჩვენება სასამართლოს.
პროკურორმა დაგვიდასტურა, რომ რამდენიმე მოწმე, ვინც ციხის ყოფილი უფროსების წინააღმდეგ ჩვენება მისცა, უკვე გარდაიცვალა.
„ციხის ყოფილი უფროსების“ საქმეზე მოსამართლეს უკვე ცარიელი დარბაზი ხვდება – პროცესები იშვიათად ტარდება.
„მე ერთ ყოფილ პატიმარს ვიცნობდი, ვინც გარდაიცვალა, ისიც ჩემსავით ოზურგეთში ცხოვრობდა – ვაჟა უსუფოვი 60 წლისაც არ იყო. მანაც მისცა ჩვენება სასამართლოს, ჩვენ ერთად ვიყავით ციხეში, რაღა მახსოვს რომელი წელი იყო, სხვა პროკურორი და მოსამართლე იყო მაშინ. ელოდა განაჩენის დადგომას და ციხის უფროსების დასჯას, მაგრამ სადაა,“ – გვითხრა ვახტანგ სიორიძემ. მან გვითხრა, რომ ყველა პროცესზე დასწრების სურვილი აქვს ისევ, მაგრამ წინა სხდომაზე პროკურორმა გააფრთხილა.
„აღარ მახსოვს, რომელიმე თვე იყო, მაგრამ წინა წელს რომ იყო, მივედი პროცესზე და პროკურორმა გამომიშვა, მოწმედ ხარ დასაკითხი და უნდა დაგვტოვოო.
არ ვიცი, რატომ ვერ დასრულდა ამ დრომდე. მითხრეს, მოსამართლე შეიცვალა და ამიტომო. მინდა ყოფილმა პატიმრებმა ერთად ვიზეიმოთ ეს გამარჯვება…
მე ოზურგეთში დასუფთავებაზე ვმუშაობ, ნაგვის შემგროვებელ, დიდ მანქანაზე უკანა მხარეს ვდგავარ მთელი დღე.
დაზიანებები მქონდა ციხეში ზურგზე, მუცელზე, ფეხებზე, ზაზა ჯიქიამ მცემა ხელით, „დუბინკაც“ ჰქონდა… 3 ლიტრი წყალი ამომიღეს ფილტვებიდან. მე 2011 წლის 26 მაისს დამაკავეს ბათუმის ცნობილი აქციების დროს,“ – გვითხრა ვახტანგ სიორიძემ.
ამ საქმეზე:
ბათუმის ციხის წამების საქმე, რომელიც 9 წლის წინ დაიწყეს და ჯერ კიდევ არ დაასრულეს
