„თუ ეს არ არის კორუფცია, 3 თვის წინ დაგებულ ასფალტს რაში დასჭირდა აყრა? ივანიშვილმა თქვა, რომ სისტემაში კორუფციაა და მობრუნდა. დღეს ზუსტად ივანიშვილს მივმართავთ: დაიხარჯა 19 მილიონი ბიუჯეტიდან და გზა ისევ არ გვაქვს,“ – აცხადებს რეზო ხარაზი, ბათუმის საკრებულოს წევრი „ერთიანი ნაციონალური მოძრაობიდან“.
მან დღეს, 24 იანვარს, ბათუმში, ფრიდონ ხალვაშის გამზირზე, ლევან ანთაძესთან ერთად ბრიფინგი გამართა.
ფრიდონ ხალვაშის გამზირი ბათუმი-ახალციხის გზის ნაწილია. მისი რეაბილიტაცია 2023 წლის თებერვალში უნდა დასრულებულიყო. ახალდაგებული ასფალტის საფარი რამდენიმე ადგილზე დაზიანებულია, რის გამოც გზებზე ორმოებია. დაზიანებულია სანიაღვრე არხის ცხაურებიც, ზოგან არხი ღიადაა დატოვებული.
საავტომობილო გზების დეპარტამენტმა ხალვაშის გამზირის [ბათუმი(ანგისა)-ახალციხის გზის დასაწყისი] რეაბილიტაციაზე ტენდერი 22,2 მილიონი ლარით გამოაცხადა; ხელშეკრულება კი შპს „ერ ტე დე“-სთან 19 399 999 ლარზე აქვს გაფორმებული.
შპს „ერ ტე დე“ ის კომპანიაა, რომელიც თბილისში, წერეთლის ქუჩის რეაბილიტაციაზე მუშაობს.
ენმ-ს წევრები ბათუმში კომპანია „ერ ტე დესთან“ ხელშეკრულების შეწყვეტას, თანხის დაბრუნებას და გამოძიების დაწყებას ითხოვენ იმ თანამდებობის პირების დასასჯელად, რომლებიც კორუფციულ სქემაში არიან ჩართულნი.
„გამოვიდეს თორნიკე რიჟვაძე და გაგვცეს პასუხი, რასთან გვაქვს საქმე. დარწმუნებული ვარ, წლის ბოლომდეც ეს ქუჩა ვერ გაკეთდება. მით უმეტეს, მთავარი ქუჩაა, არტერიაა, სულ საცობებია…
ამჯერად კომპანიამ დაგებული ასფალტის ნაწილი აყარა და ასფალტს ხელახლა აგებს. სამუშაოები არათუ დასრულდა, ნახევარიც კი არ არის ჯერ გაკეთებული. რაც გაკეთდა, უხარისხოა. განათების სისტემაც ნაწილობრივადაა გაკეთებული.
ვხუმრობთ, ალბათ, „გუთენთრაკენის“ მეთოდით კეთდებაო, რეალურად კი, როგორც წერეთლის ქუჩის ამბავი დაემხო თავზე კალაძეს, ასე დაემხობათ თავზე ფრიდონ ხალვაშის ქუჩა თორნიკე რიჟვაძეს და არჩილ ჩიქოვანს… პროკურატურას 4 თვის წინ მივმართეთ, მაგრამ პასუხი ამ დრომდე არ მიგვიღია,“ – უთხრა რეზო ხარაზმა „ბათუმელებს“.
რატომ დაზიანდა ახალდაგებული ფრიდონ ხალვაშის გამზირი, როდის დასრულდება რეაბილიტაცია ქუჩაზე, სადაც სამუშაოები ჯერ კიდევ 2023 წლის თებერვალში უნდა დასრულებულიყო? – „ბათუმელები“ საქართველოს საავტომობილო გზების დეპარტამენტის პრესცენტრს დაუკავშირდა. ინფორმაციის მოწოდების შემთხვევაში, მასალა განახლდება.
