„ბათუმის ავტოტრანსპორტისთვის“ წელს მუნიციპალურ 25 ავტობუსს და 100 მიკროავტობუსს შეისყიდიან, რისთვისაც, მერიის ინფორმაციით, ქალაქის ბიუჯეტიდან 30 მილიონ 219 ათას 500 ლარია გათვალისწინებული.
„ტენდერების ჩატარების შემდეგ ეტაპობრივად მთლიანად უნდა მივიღოთ ყველა ავტობუსი და მიკროავტობუსი, რომლებიც, ძირითადად ქალაქს შემოერთებულ ტერიტორიაზე ივლიან, სადაც დღეს არ დადის ავტობუსი. რაც შეეხება ანაზღაურებას, ტენდერში გამარჯვებულს თანხას ასევე ეტაპობრივად გადაუხდიან, როგორც ბიუჯეტშია გაწერილი“, – გვითხრეს „ბათუმელებს“ დღეს „ბათუმის ავტოტრანსპორტში“.
ბათუმის 2024 წლის ბიუჯეტის მიხედვით, შპს „ბათუმის ავტოტრანსპორტისათვის“ მუნიციპალური მიკროავტობუსების და ავტობუსების შესაძენად მიმდინარე წლისთვის გაწერილია 16 მილიონ 719 ათას 500 ლარი.
ქალაქის ბიუჯეტის მიხედვით, ავტობუსების საბოლოო [ტენდერში დაფიქსირებული] ღირებულება სრულად 2026 წლის ჩათვლით დაიფარება.
„მუნიციპალური მიკროავტობუსების და ავტობუსების შეძენა მრავალწლიანი პროექტია [2024-2026 წ.წ.], რომლის ღირებულება 39 252 624 ლარია“, – აღნიშნულია ბათუმის ბიუჯეტის შესახებ კანონში.
ავტობუსების შეძენაზე კონსოლიდირებულ ტენდერებს სახელმწიფო შესყიდვების სააგენტო გამოაცხადებს.
ამ თემაზე:
