განათლების მინისტრს ახალი მოადგილე ჰყავს. გიორგი ამილახვრის პირველი მოადგილე საქართველოს უზენაესი სასამართლოს უვადო მოსამართლე, ალექსანდრე წულაძე იქნება.
ალექსანდრე წულაძეს გავლილი აქვს თსუს და რომის „ლა საპიენცას“ უნივერსიტეტის სამართლის სამაგისტრო პროგრამა.
ფლობს თბილისის სახელმწიფო უნივერსიტეტის სამართლის დოქტორის ხარისხს Summa Cum Laude შეფასებით. ასევე მოპოვებული აქვს სხვადასხვა დასავლურ უნივერსიტეტში კვლევითი სტიპენდიები.
ალექსანდრე წულაძე 2010 წლიდან ეწევა აკადემიურ საქმიანობას საქართველოს სხვადასხვა უნივერსიტეტსა და საგანმანათლებლო დაწესებულებაში.
2019 წელს კი საქართველოს პარლამენტმა აირჩია საქართველოს უზენაესი სასამართლოს უვადო მოსამართლედ.
2023 წლის ქონებრივი დეკლარაციის მიხედვით, ალექსანდრე წულაძე ფლობს მიწის ნაკვეთს წყნეთსა და წავკისში. მას წავკისში მიწა 2019 წელს 200 ათას ლარად შეუძენია.
წავკისში მისი მეუღლე ეკატერინე ჯანაშიაც ფლობს 570 კვ.მ მიწის ნაკვეთს, რაშიც 2017 წელს 12 500 დოლარი გადაუხდია.
წულაძე ასევე ფლობს არასაცხოვრებელ ფართობებს თბილისში, აღმაშენებლის გამზირზე.
აქვს ორი ავტოფარეხი და ბინა თბილისში, ბურძგლას ქუჩაზე.
2017 წელს 12 000 დოლარად შეუძენია როიალი. ამავე წელს კი, უძრავი ქონების რეალიზაციით მიიღო 58 ათასი დოლარი.
მისი მეუღლე შემოსავლების სამსახურში მუშაობს და ასევე არის შპს „ანდერსენ ჯორჯიას“ საგადასახადო კონსულტანტი.
გასულ წელს ხელფასის სახით საქართველოს უზენაესი სასამართლოდან წულაძემ მიიღო 116 620 ლარი. საქართველოს ადვოკატთა ასოციაციიდან, როგორც სასწავლო მოდულის ხელმძღვანელმა კი, – 10 305 ლარი.
