2024 წლის 1 იანვრიდან განათლების სამინისტროს ინკლუზიური განათლების მულტიდისციპლინური გუნდი, ინტეგრირებული კლასების და საგანმანათლებლო სერვისის ფუნქციონირების სუპერვიზიის ექსპერტები, ასევე მასწავლებელთა პროფესიული განვითარების ეროვნული ცენტრის ინდივიდუალური კონსულტანტები, მანდატურის სამსახურში გადავლენ.
„ზოგადი განათლების შესახებ საქართველოს კანონში“ დაგეგმილი ცვლილების მიხედვით, ინკლუზიური განათლების მულტიდისციპლინური გუნდი იფუნქციონირებს ფსიქო – საგანმანათლებლო შეფასებისა და კონსულტირების მომსახურების გამწევი სპეციალისტების სახით .
საკანონმდებლო ინიციატივა ეკუთვნის მთავრობას და განათლების სამინისტროს, რომლებიც ირწმუნებიან, რომ ეს ცვლილება გააუმჯობესებს ინკლუზიური განათლების სერვისებს.
„აღნიშნული ფუნქციის დამატება და სერვისების განვითარება გულისხმობს რესურსსკოლების მიერ ინკლუზიური განათლების ხელშეწყობისთვის სხვა საგანმანათლებლო დაწესებულებების კონსულტირების კომპონენტის გაძლიერებას, რისი პრაქტიკაც აქამდე არ არსებობდა და საკანონმდებლო დონეზე საჭიროებს განსაზღვრას.
ახალი სტრუქტურის პირობებში მუშაობის კოორდინაციისა და მართვის მექანიზმის განსაზღვრისათვის უნდა შეიქმნას მმართველობითი სტრუქტურული ერთეული. გასაწერი იქნება ფსიქო – საგანმანათლებლო საჭიროებების შეფასებისა და კონსულტირების წესი და პირობები, რომელიც დაარეგულირებს ისეთ საკითხებს როგორიცაა:
შემადგენლობა, ფუნქცია-მოვალეობები, პირის სპეციალური საგანმანათლებლო საჭიროების დადგენის მიზნით შეფასების პროცედურა, მომართვის პროცედურებისა და მათზე რეაგირების წესების განსაზღვრა, მომსახურების სპეციალისტთა თანამშრომლობის სპეციფიკის/წესის/ფორმატის განსაზღვრა, ანგარიშგების პროცესი, საგანმანათლებლო დაწესებულებებისთვის, ინკლუზიური განათლების მიმართულებით მომუშავე სპეციალისტებისა და მშობლებისთვის საკონსულტაციო მომსახურების გაწევა და სხვა“, – წერია კანონპროექტში.
კანონპროექტში ასევე ვკითხულობთ, რომ ცვლილება შეეხო ზოგადსაგანმანათლებლო დაწესებულებაში სოციალური მუშაობის საკითხსაც. სამინისტრო წერს, რომ ფსიქოლოგიური მომსახურება ჩანაცვლდება ფსიქოსოციალური მომსახურებით.
„ინკლუზიური განათლების მხარდამჭერი მომსახურების ერთი სამსახურის ფარგლებში გაერთიანება, მწირი რესურსების უფრო ეფექტურად და კოორდინირებულად გამოყენების და შემდგომი განვითარების უკეთეს პირობებს შექმნის.
ახალი მოდელი ასევე ითვალისწინებს ინკლუზიურ განათლებაში კონსულტირების კომპონენტის გაძლიერებას და კომპეტენციების განვითარებას იმ სფეროებში, რომლებშიც ინკლუზიური განათლების ამჟამინდელ მხარდამჭერ სისტემაში შედარებით მწირია.
კანონპროექტის მიღების შედეგად სისტემაში მოწყვლადი ჯგუფის ბავშვების განათლებასთან დაკავშირებული სერვისების განხორციელება მოხდება ერთი საჯარო სამართლის იურიდიული პირის მიერ, რაც გააუმჯობესებს პროცესის კოორდინაციას, ასევე, გაჩნდება ახალი სერვისი რესურსსკოლების მიერ კონსულტირების განხორციელების გზით, რაც გაზრდის განათლების მიღების ხელმისაწვდომობასა და ხელს შეუწყობს განათლების ხარისხის გაუმჯობესებას“, – ნათქვამია კანონპროექტში.
ამ ცვლილების საფუძველზე გაფართოვდება მანდატურის სამსახურის ფუნქციებიც.
„მულტიდისციპლინური გუნდის ხელშეწყობა“ ბიუჯეტი განისაზღვრება 1 424 400 ლარით. აქედან 1 206 100 ლარი, 59 თანამშრომლის ხელფასებზე დაიხარჯება.
218 300 ლარი კი გუნდის წევრების მივლინებასა და საკანცელარიო მომსახურებაზე.
ინტეგრირებული კლასების და საგანმანათლებლო სერვისის ფუნქციონირების სუპერვიზიის ექსპერტების ბიუჯეტი განისაზღვრება 87 400 ლარით, რომელიც მოიცავს ოთხი ექსპერტის ანაზღაურებას და მივლინების ხარჯებს.
„მასწავლებელთა პროფესიული განვითარების ეროვნული ცენტრის ,,ინკლუზიური განათლების ხელშეწყობის“ პროგრამის ბიუჯეტი კი ინდივიდუალური კონსულტანტებისთვის 40 000 ლარით განისაზღვრება.
სამინისტროს თქმით, წლიურად საშუალოდ საჭიროა 16 კონსულტანტი, კონსულტანტის ანაზღაურება კი ხელშეკრულების მიხედვითაა გათვალისწინებული და ერთ ქეისზე ერთი თვის განმავლობაში შეადგენს 800 ლარს.
„საჭიროებიდან გამომდინარე ქეისზე მუშაობა შესაძლოა გაგრძელდეს 2 თვე, ასეთ შემთხვევაში 1600 ლარით განისაზღვრება კონსულტანტის ანაზღაურება.
წლის მანძილზე გათვალისწინებულია 25 სსსმ მოსწავლის ქეისზე მუშაობა.
2023 წლის 1 ოქტომბრიდან მანდატურის სამსახურში უნდა ამოქმედებულიყო ინკლუზიური განათლების მიმართულების მაკოორდინირებელი სტრუქტურული ერთეული 12 საშტატო ერთეულით, რომლის წლიური ბიუჯეტი განისაზღვრება 284 800 ლარით უნდა განსაზღვრულიყო.
2024 წლიდან და შემდგომი სამი წელი, მანდატურის სამსახურის ბიუჯეტის საპროგნოზო ზრდა ასე გამოიყურება:
მასწავლებელთა პროფესიული განვითარების ეროვნული ცენტრისათვის გამოყოფილი ასიგნებების შემცირების ხარჯზე შეადგენს:
2024 წელი – 1 მილიონ 692 ათასი ლარი
2025 წელი – 1 მილიონ 837 ათასი ლარი
2026 წელი – 1 მილიონ 998 ათასი ლარი
2027 წელი – 2 მილიონ 174 700 ლარი.
„წარმოდგენილი ცვლილებით, რესურსსკოლა უფლებამოსილია, ინკლუზიური განათლების პროცესის მხარდაჭერის მიზნით, განახორციელოს პროგრამები/სერვისები/, კონსულტირება გაუწიოს სხვა ზოგადსაგანმანათლებლო დაწესებულებებს, სპეციალური საგანმანათლებლო საჭიროების მქონე მოსწავლეებს, მშობლებს, მასწავლებლებს, სპეციალურ მასწავლებლებს, სკოლის ადმინისტრაციასა და სხვა თანამშრომლებს“, – წერია კანონპროექტში.
ამავე დოკუმენტში ნათქვამია, რომ კანონპროექტის მიღება არ გამოიწვევს იმ პირების სამსახურის გარეშე დატოვებას, რომლებიც 2023 წლის 31 დეკემბრის ჩათვლით სამინისტროში შრომითი ხელშეკრულებით იყვნენ დასაქმებული „ინკლუზიური სწავლების ხელშეწყობის“ პროგრამის, „მულტიდისციპლინური გუნდის ხელშეწყობის“ ქვეპროგრამისა და „საჯარო სკოლებში ინტეგრირებული კლასების დაფინანსების“ ქვეპროგრამის ფარგლებში.
ასევე, მასწავლებელთა პროფესიული განვითარების ეროვნულ ცენტრში შრომითი ხელშეკრულებით დასაქმებული პირები, რომლებიც „ინკლუზიური განათლების ხელშეწყობის ქვეპროგრამის” ფარგლებში შრომითი ხელშეკრულებით დასაქმებულნი არიან ინდივიდუალურ კონსულტანტებად.
კანონპროექტის მიხედვით, აღნიშნული პირები 2024 წლის 1 იანვრიდან გადავლენ მანდატურის სამსახურში იმავე ან ტოლფას პოზიციაზე.
