ქედის მუნიციპალიტეტის სოფელ კოკოტაურში მეწყერი ჩამოწვა და სოფლის ცენტრალური გზა მთლიანად ჩაკეტა.
როგორც „ბათუმელებს“ სოფელში მცხოვრები ინოლა შაინიძე ეუბნება, ის გზა, რაც გასულ წელს მეწყრის შემდეგ გააკეთეს, მთლიანად დაფარა მიწის მასამ.
„სამწუხაროდ, გაჩენილია ახალი ნაპრალები“, – გვითხრა მან.
ამავე სოფელში ვესაუბრეთ ზურა ზოიძესაც, რომლის სახლიც გაზაფხულზე ჩამოწოლილმა მეწყერმა მთლიანად დაანგრია.
„გაზაფხულზე ჩემი სახლი მიწასთან გაასწორა და ახლაც ორ ოჯახს ემუქრება საფრთხე. თუ კიდევ მოიმატა პროცესებმა, მერე უფრო ბევრ ოჯახს შეექმნება საფრთხე.
ახლა სოფელი გარესამყაროს მოწყვეტილია, უგზოდ ვართ. საცალფეხო გზით გადავადგილდებით, მოსახლეობასთან მისასვლელი გზა აღარ არის.
მეწყრული კერა ბევრია სოფელში, მაგრამ ეს უფრო აქტიური კერაა. ადრე სადაც ჩამოწვა მეწყერი, იქ განვითარდა ახლაც.
რა რაოდენობის მასაა, ვერ გეტყვით, მაგრამ საფრთხე, რა თქმა უნდა, არსებობს“, – გვეუბნება ის.
ზურაბ ზოიძის თქმით, შარშან, მარტის თვეში, როცა შეამოწმეს გეოლოგებმა მდგომარეობა, ითქვა, რომ ახალი გზა აღარ უნდა გაეკეთებინათ აღნიშნულ ტერიტორიაზე, თუმცა გეოლოგების მითითება არ გაითვალისწინეს.
„ადგილობრივმა ხელისუფლებამ ისევ მეწყერში გაჭრა გზა. ახლა კვლავ განვითარდა მეწყერი და ისევ დაიკეტა ყველაფერი“, – ამბობს ზურა ზოიძე.
მეწყერი კოკოტაურში
