მოსამართლე ხათუნა ბოლქვაძემ არ დააკმაყოფილა ჟურნალისტის, თეონა ბაკურიძის სარჩელი. თეონა ბაკურიძე აჭარის ტელევიზიის მთავარი საინფორმაციო გამოშვების წამყვანი იყო და 2020 წელს გაათავისუფლეს.
გადაწყვეტილება ბათუმის საქალაქო სასამართლოში დღეს, 27 დეკემბერს გამოცხადდა.
„თეონა ბაკურიძის სასარჩელო განცხადება არ დაკმაყოფილდეს,“ – განაცხადა მოსამართლე ხათუნა ბოლქვაძემ. მოსამართლემ განმარტების გარეშე დატოვა სხდომათა დარბაზი. გადაწყვეტილების გამოცხადებას აჭარის ტელევიზიის წარმომადგენელი არ დასწრებია.
თეონა ბაკურიძე სასამართლოში ითხოვდა სამსახურიდან გათავისუფლების უკანონოდ ცნობას, დისკრიმინაციის ფაქტის დადგენას, განაცდური თანხის ანაზღაურებას და სამსახურში აღდგენას.
„ეს შემთხვევა წარმოაჩენს, რომ სასამართლო რიგ შემთხვევაში ასეთ დავებთან დაკავშირებით არის პოლიტიზებული, დღევანდელ გადაწყვეტილებას თეონა ბაკურიძის საქმესთან დაკავშირებით სხვა ახსნა ვერ მოეპოვება“, – ამბობს ანა ბერძენიშვილი, TI-ის იურისტი. ის სასამართლოში თეონა ბაკურიძის ინტერესებს იცავდა.
იურისტს თავის 11-წლიან საადვოკატო პრაქტიკაში არ ახსენდება მსგავსი შემთხვევა, როცა მოსამართლე მხოლოდ გადაწყვეტილების სარეზოლუციო ნაწილს აცხადებს და განმარტების გარეშე ტოვებს სხდომათა დარბაზს.
ანა ბერძენიშვილი
„მოსამართლე სასამართლო სხდომის დარბაზიდან ისე გავიდა, რომ ახსნა-განმარტებაც კი არ გაუკეთებია იმის თაობაზე, თუ რატომ მიიღო ეს გადაწყვეტილება. მართალია, ეს არის სასამართლოს უფლება, მაგრამ 11 წლის განმავლობაში, რაც არასამთავრობო ორგანიზაციაში მუშაობის დროს მქონია სასამართლო დავები, ეს არის პირველი შემთხვევა, როცა სასამართლო გადაწყვეტილებასთან დაკავშირებით განმარტებას არ აკეთებს,“ – გვითხრა ანა ბერძენიშვილმა.
იურისტს არ ჰქონდა მოლოდინი თეონა ბაკურიძის სამსახურში აღდგენის მოთხოვნის დაკმაყოფილებაზე, თუმცა ელოდა გათავისუფლების ბრძანების უკანონოდ ცნობას, დისკრიმინაციის ფაქტის დადგენას და კომპენსაციის მოთხოვნის დაკმაყოფილებას.
TI-ის იურისტი ყურადღებას ამახვილებს იმაზეც, რომ აჭარის ტელევიზიის აქამდე დასრულებული საქმეებისგან განსხვავებით, აქ უკანონო გათავისუფლება არ დადგინდა. იურისტის აზრით, ეს აძლიერებს ეჭვს საქმის პოლიტიკურ მოტივზე.
„სხვა დავებში, რომლებიც დაკავშირებული იყო აჭარის ტელევიზიის მიერ თანამშრომლების უკანონო დათხოვნასთან, ყველა ფაქტზე დადგენილი იქნა აჭარის ტელევიზიის უკანონობა. ეს არის საგამონაკლისო შემთხვევა.
თავის დროზე, როცა თეონა ბაკურიძემ სარჩელი შეიტანა სასამართლოში, მისი გათავისუფლება უკავშირდებოდა მის განცხადებას პარტიასთან, თორნიკე რიჟვაძესთან, ბიძინა ივანიშვილთან დაკავშირებით. იმ თანამდებობის პირებთან დაკავშირებით, რომლებიც მოუწოდებდნენ დაოკებულიყო, უწოდებდნენ „ნაციონალური მოძრაობის“ წევრს.
ეს საქმე თავიდანვე შეკერილი იყო პოლიტიკოსების მიერ და თავიდან ბოლომდე პოლიტიზებულია. ეს არ იყო საქმე, რომელიც იყო გამყარებული ფაქტობრივი გარემოებებით, ემყარებოდა კანონს, მტკიცებულებას. ეს საქმე თავიდან ბოლომდე იყო ის, თუ როგორ გაბედა თეონა ბაკურიძემ სოციალურ სივრცეში მმართველი პოლიტიკური პარტიისა და ტელევიზიის გაკრიტიკება,“ – აღნიშნა ანა ბერძენიშვილმა „ბათუმელებთან“.
——-
თეონა ბაკურიძე „აჭარის ტელევიზიის“ მთავარი საინფორმაციო გამოშვების წამყვანი იყო, როცა 2020 წელს სამსახურიდან გაუშვეს, მას შემდეგ, რაც ამ ტელევიზიის დირექტორს – ნათია კაპანაძეს იმპიჩმენტი მოუწყვეს. მაშინ, როცა ტელევიზიაში კრიტიკულად განწყობილ ჟურნალისტებს საქმიანობის უფლება წაართვეს და გაჩნდა შეფასება „პოლიტიკურ ზეწოლაზე“, სასამართლოში 9 სარჩელი შევიდა. ამ საქმეებით საგრძნობია ერთი ტენდენცია, რაც ბოლო წლებში, ზოგადად, ქვეყანაში შრომით დავებს ახასიათებს:
გათავისუფლებულები მეტწილად შრომით დავებს იგებენ, დასტურდება უკანონო გათავისუფლება და ადამიანების დევნა, სასამართლოში დავას აგებს სამსახურიდან თანამშრომლების მასობრივად გათავისუფლებებით ცნობილი მინისტრი თეა წულუკიანიც, თუმცა ასევე მეტწილად სასამართლო სამსახურში არ აბრუნებს სისტემას ჩამოშორებულ ადამიანებს.
აჭარის ტელევიზიაში ცვლილებები 2019 წლის გაზაფხულზე დაიწყო — იმ პერიოდიდან, როდესაც დირექტორი, ნათია კაპანაძე თანამდებობიდან გადააყენეს. მაშინ ნათია კაპანაძემ აღნიშნული დაუკავშირა ხელისუფლების მიერ ტელევიზიის გაკონტროლების სურვილს.
ამ თემაზე:
