მიწის სისტემური [უფასო] რეგისტრაციის ფარგლებში „მასშტაბური საველე-საკადასტრო სამუშაოები ხელვაჩაურის მუნიციპალიტეტში – 2024 წლის იანვრიდან, ხოლო შუახევის მუნიციპალიტეტის ყველა ადმინისტრაციულ ერთეულში – 2024 წლის ივნისიდან არის დაგეგმილი“.
ეს ინფორმაცია საჯარო რეესტრის ეროვნულმა სააგენტომ „ბათუმელებს“ დღეს, 8 დეკემბერს მოგვაწოდა.
აღსანიშნავია, რომ აჭარის არცერთ სოფელსა თუ თემში მიწის უფასოდ აზომვა არ დაწყებულა იმ გეგმა-გრაფიკით მითითებულ პერიოდში, რაც საჯარო რეესტრმა თავიდანვე გამოაქვეყნა. ამასთან, ეს გეგმა-გრაფიკიც პერიოდულად იცვლებოდა.
„ბათუმელებმა“ საჯარო რეესტრს 2023 წლის ივნისში ოფიციალურად მიმართა ინფორმაციის მისაღებად, კონკრეტულ სოფელში რატომ არ დაიწყო გეგმა-გრაფიკით მიწის აზომვა და როდის დაიწყებოდა ეს სამუშაოები;
ასევე ვითხოვდით რა სამუშაოები ჩატარდა ან ჩატარდებოდა აზომვითი სამუშაოების დაწყების შესახებ მოსახლეობის ინფორმირებულობისთვის თითოეულ სოფელში.
საჯარო რეესტრმა ჩვენ წერილს 5 თვის შემდეგ უპასუხა.
„თქვენ განცხადებებში მითითებული მუნიციპალიტეტების (ქობულეთი, ხელვაჩაური, ქედა, შუახევი, ხულო) ადმინისტრაციულ ერთეულში საველე-საკადასტრო აგეგმვითი/აზომვითი სამუშაო დაწყებულია და პროცესი ამ დროისთვისაც მიმდინარეობს, კერძოდ:
- საველე-საკადასტრო აზომვითი/აგეგმვითი სამუშაოები დასრულდა ხულოს მუნიციპალიტეტში, ჯამში აზომილია 27 938 მიწის ნაკვეთი.
- საველე-საკადასტრო აზომვითი/აგეგმვითი სამუშაოები მიმდინარეობს ქედისა და ქობულეთის მუნიციპალიტეტებში (ჯამში აზომილია 7 000-ზე მეტი მიწის ნაკვეთი). საველე სამუშაოები დაფარავს ორივე მუნიციპალიტეტის ყველა ადმინისტრაციულ ერთეულს.
- შუახევის მუნიციპალიტეტის დღვანის ადმინისტრაციულ ერთეულში საველე სამუშაოები განხორციელდა 2022 წლის ნოემბერსა და დეკემბერში და აიზომა ადგილზე გამოცხადებული ყველა დაინტერესებული პირის მიწის ნაკვეთი (1 400-ზე მეტი); უჩამბას ადმინისტრაციულ ერთეულში მიმდინარეობს საველე სამუშაოები, აზომილია 500-ზე მეტი მიწის ნაკვეთი, ხოლო, დაბა შუახევში, ჯამურად აზომილია 3 699 მიწის ნაკვეთი.
- შუახევის მუნიციპალიტეტის ყველა ადმინისტრაციულ ერთეულში, მათ შორის, ზემოხსენებულ არეალებშიც მასშტაბური საველე-საკადასტრო სამუშაოები დაგეგმილია 2024 წლის ივნისიდან, ხოლო, ხელვაჩაურის მუნიციპალიტეტში – 2024 წლის იანვრიდან.“ – აღნიშნულია საჯარო რეესტრიდან მიღებულ წერილში.
საჯარო რეესტრის ინფორმაციით:
„სისტემური რეგისტრაციის ფარგლებში, ყველა სახის მომსახურება მოსახლეობას საცხოვრებელ ადგილზე უფასოდ მიეწოდება. უფლების რეგისტრაციასთან დაკავშირებულ ყველა პროცედურას, მათ შორის, მიწის ნაკვეთების აგეგმვა/აზომვას, დოკუმენტაციის მოძიებას, თვითნებურად დაკავებულ მიწაზე საკუთრების უფლების აღიარებასა და უფლებების რეგისტრაციას ახორციელებს სააგენტო.
საველე აგეგმვითი/აზომვითი პროცესი მოიცავს მიწის ნაკვეთის საკადასტრო აზომვა/აგეგმვას (მიწის ნაკვეთის გეომეტრია, დანიშნულება, საზღვრები, ნაკვეთზე განთავსებული შენობა-ნაგებობები შესაბამისი მახასიათებლებით და სხვა) და მიწის ნაკვეთის ადგილზე დათვალიერების ელექტრონული ოქმის შედგენას (დაინტერესებული პირის იდენტიფიცირება, უფლების დამდგენი დოკუმენტების მოძიება/დამუშავება, ფაქტობრივი გარემოებების შესწავლა, აღწერა, ფოტო მასალის შეგროვება და სხვა).
სამუშაო პროცესის გამართულობისათვის მობილიზებულია უძრავი ქონების სერტიფიცირებული საველე ამგეგმავები, რომლებიც აღჭურვილი არიან პორტატიული კომპიუტერებით (პლანშეტი, მაღალი სიზუსტის გეოდეზიური ხელსაწყოებით (GPS), GNSS ანტენის სახით და შესაბამისი პროგრამული უზრუნველყოფით.“
- აზომილი ნაკვეთების შესახებ მონაცემების გაცნობა შესაძლებელია საჯარო რეესტრის ეროვნული სააგენტოს ოფიციალურ ვებგვერდზე
- ამავე ვებგვერდზე, გრაფაში – „აზომვის მოთხოვნა“ – მოქალაქეებს შეუძლიათ დააფიქსირონ საკუთარი თავი [ე.წ. „მომლოდინეთა სიაში“], სადაც საკონტაქტო ინფორმაციასაც მიუთითებენ და მოითხოვონ მიწის ნაკვეთის უფასოდ აზომვა/რეგისტრაცია. რეესტრი ამ მონაცემებითაც ისარგებლებს.
ამავე თემაზე:
https://batumelebi.netgazeti.ge/news/482149/
