2024 წლის ბიუჯეტის პროექტთან დაკავშირებული შენიშვნები ბათუმის მერიაში 10 დეკემბრამდე უნდა განიხილონ. ამის შემდეგ გავიგებთ, რას გაითვალისწინებენ და რა არა იმ შენიშვნებიდან, რაც საკრებულოდან შევიდა ბიუჯეტთან დაკავშირებით.
რიგი პროექტების დაფინანსების მოთხოვნების ჩამონათვალი გრძელი და მრავალმხრივია. ხუთ ვერსიად შესული შენიშვნების ძირითადი ნაწილი შინაარსობრივად თითქმის იდენტურია და ქალაქში არსებულ ბევრ მწვავე პრობლემას ეხმიანება, ზოგ შემთხვევაში კი მათ მოგვარებასთან დაკავშირებით განსახორციელებელ გზებზე ოპოზიციას სხვადასხვა ხედვა აქვს.
„ერთიანი ნაციონალური მოძრაობის“ წარმომადგენლებიდან შენიშვნები მერიაში ორ ნაწილად შევიდა. ერთია ენმ-ის ფრაქციის შენიშვნები და რეკომენდაციები და მეორე – საკრებულოს ხუთი წევრის შენიშვნები და რეკომენდაციები. საკრებულოს ეს ხუთი წევრია: რევაზ ხარაზი, ნაზი ფუტკარაძე, კახა ქაშიბაძე, ალექსანდრე ვარშალომიძე და ირაკლი ძიძიგური. ენმ- ის ფრაქციას ამ დრომდე ნოდარ დუმბაძე ხელმძღვანელობდა.
თავისი შენიშვნები მოამზადა ასევე „ლელომ“, რომელიც ბათუმის საკრებულოში ერთი წევრით არის წარმოდგენილი, პარტიამ – „გახარია საქართველოსთვის“, რომელიც ასევე ერთი წევრით არის საკრებულოში, მას შემდეგ რაც ნატალია ძიძიგური პარტიიდან გარიცხეს და მმართველი პარტიის „ოცნების“ ფრაქციამ.
„ბათუმელებმა“ ყველა შენიშვნა შეისწავლა.
მერიაში შესული შენიშვნების მიხედვით ოპოზიციაში მიიჩნევენ, რომ ბათუმის მუნიციპალიტეტის 2024 წლის ბიუჯეტის პროექტი ვერ პასუხობს ქალაქის გამოწვევებს.
„ქალაქში ყოველწლიურად იზრდება პრობლემები, მათი გადაწყვეტის შესაძლებლობები კი წარმოდგენილ დოკუმენტში არ ჩანს. სასიცოცხლოდ მნიშვნელოვანია ახალი საპარკინგე სივრცეები, რაც მოგვცემს საშუალებას მზარდი ტურისტული ნაკადის შემთხვევაში არ მივიღოთ ქალაქის პარალიზება, როგორც ეს ხდება ყოველწლიურად. ასევე, ჩვენს მიერ წარმოდგენილი წინადადებებით შეიქმნება ახალი სარეკრეაციო და დასასვენებელი სივრცეები, რაც განტვირთავს მიმდინარე სამშენებლო პროცესების შედეგად მიღებულ ნეგატიურ ზემოქმედებას ქალაქზე“ – ნათქვამია ენმ-ის ფრაქციის შენიშვნებში.
- მიწისქვეშა და მაღლივი პარკინგები
„ერთიანი ნაციონალური მოძრაობის“ შენიშვნების ორივე ვერსიის მიხედვით საკრებულოს წევრები მიიჩნევენ, რომ ქალაქის საგზაო ინფრასტრუქტურის გამართული ფუნქციონირებისა და ტრანსპორტის შეუფერხებელი გადაადგილებისათვის საჭიროა მიწისქვეშა და მაღლივი პარკირებების მოწყობა.
„მომდევნო წლის ბიუჯეტში დაგეგმილია ისეთი ქვეპროგრამები, როგორიცაა ქუჩებისა და ტროტუარების მოვლა-პატრონობა, დაზიანებული მონაკვეთების რეაბილიტაცია, განათებების მოვლა და ასე შემდეგ, თუმცა პარკირების პრობლემის გადასაჭრელად დოკუმენტში არაფერი წერია, არადა ქალაქში ყველაზე მწვავედ სწორედ ეს პრობლემა დგას“ – ნათქვამია ენმ-ის ფრაქციის შენიშვნებში.
„ლელო“ სატრანსპორტო პოლიტიკის განმსაზღვრელი დოკუმენტის შექმნას ითხოვს. საკრებულოს წევრი ამ პარტიიდან, ვაჟა დარჩია მიიჩნევს, რომ არსებული დოკუმენტები ფრაგმენტულია და ვერ პასუხობს ქალაქში არსებულ გამოწვევებს. ის ითხოვს ბიუჯეტში გამოიყოს თანხა ამ დოკუმენტის მოსამზადებლად.
ვაჟა დარჩია წერს ქალაქში ტროტუარების პრობლემაზეც: „მაგალითად, საჭიროა მთისძირის ქუჩაზე სრული ინფრასტრუქტურის შექმნა ამ მიმართულებით, სტანდარტების შესაბამისად.“
„ლელო“ ასევე ითხოვს საავტომობილო გადაადგილების შეზღუდვას და ადგილობრივი მოსახლეობისთვის შესაბამისი სისტემების დანერგვას ძველ ბათუმში, მაზნიაშვილიდან გოგებაშვილის ქუჩამდე და ფეხით მოსიარულეთათვის გადასასვლელი ხიდის მოწყობას რუსთაველის ქუჩაზე, დელფინარიუმის წინ.
შენიშვნებში მოხვდა ტრაილერების გადაადგილებისა და პარკინგის პრობლემაც: „მუნიციპალური ინსპექციას არ აქვს შესაბამისი ტექნიკური და არც ადამიანური რესურსი“ – წერს საკრებულოს წევრი „ლელოდან“.
„ქალაქის ტერიტორიიდან უნდა მოხდეს ტრაილერების გაყვანა. მსგავსი პარკირება ქალაქის ტერიტორიაზე მიუღებელია, ბავშვებისა და ადგილობრივებისთვის კი საფრთხის შემცველი. ბიუჯეტიდან გამოიყოს შესაბამისი რესურსი ამ პრობლემის მოსაგვარებლად.“ – წერენ ენმ-ის შენიშვნებში.
- უსინათლოთა ბილიკების არსებობა სიმბოლურია
„ უსინათლოთა ბილიკების ძირითადად სიმბოლურად არის ქალაქში გაკეთებული და თითქმის შეუძლებელია, რომ უსინათლო ადამიანი ამ ინფრასტრუქტურით უსაფრთხოდ გადაადგილდეს ქალაქში, ხშირად ველობილიკია მომიჯნავედ და საფრთხეს უქმნის გადაადგილებას, არსებული ინფრასტრუქტურის უსინათლოებზე მორგება და დამატებითი ინფრასტრუქტურის შექმნა“ – წერს ვაჟა დარჩია
ენმ-ის ფრაქცია თავის შენიშვნებში ასევე წერს:
„2021 წელს თქვენს მიერ იქნა დაანონსებული ცენტრალური პარკის განაშენიანება ლეონიძის ქუჩაზე, ურეხის და ე.წ. სტეფანოვკის დასახლებაში, რომლის მიხედვითაც აქ უნდა აშენებულიყო საბაგირო, რომელიც დაუკავშირდება არგოს მთას, რითაც შეიკვრება ერთგვარი სამკუთხედი და საბაგიროს მეშვეობით ტერიტორია დაუკავშირდება ბულვარს, სადაც შეიქმნებოდა ტურისტული მიზიდულობის ცენტრი, რომელიც ეკონომიკური პროცესების გააქტიურებას და ახალი სამუშაო ადგილების შექმნას შეუწყობს ხელს.
აღნიშნული პარკის განაშენიანება უნდა დასრულებულიყო 2023 წელს, თუმცა ბიუჯეტში თანხა ისევ არ არის გათვალისწინებული“.
- ზოოკუთხის გადატანა და თავშესაფარები მიუსაფარი ცხოველებისთვის
ბათუმში, ცენტრალური პარკის ტერიტორიაზე არსებული ზოოკუთხის გადატანაზე ოპოზიციის ოპოზიციის შენიშვნების სამივე ნაწილში არის საუბარი: „ვოლიერებისგან გამოთავისუფლებული ტერიტორიის ადგილზე უნდა დარჩეს მწვანე ზონა“ – მიიჩნევენ შენიშვნების ავტორები.
ოპოზიცია ითხოვს ასევე თავშესაფრების მშენებლობას მიუსაფარი ცხოველებისთვის.
„მიუსაფარი ძაღლებისთვის შესაბამისი ინფრასტრუქტურის საერთაშორისო პრაქტიკის შესაბამისად მოწყობა, საერთო თავშესაფრები არაეფექტურია და არსებობს კლასტერული თავშესაფრების პრაქტიკა“ – წერს „ლელო“ და იქვე მიუთითებს, რომ ეს არის მოსახლეობის მოთხოვნა.
ოპოზიციის მოთხოვნებშია ასევე ქალაქის სრულად დაქსელვა ველობილიკით და ველოსიპედების საპარკინგე სივრცეებით, ველოსტრატეგიის შესაბამისად.
- სახანძრო კიბე
ბათუმის საკრებულოს ოპოზიცია ქალაქისთვის სახანძრო კიბის შეძენის დაფინანსებას ითხოვს. ახალი კიბე ბათუმში არსებული ცათამბჯენების ბოლო სართულებსაც უნდა მისწვდეს.
გარდა ამისა, ოპოზიციის მოთხოვნაა მრავალსართულიანი სახლების სახანძრო ექსპლუატაციის ნორმებში მოქცევა, რაც გულისხმობს კოდექსში ცვლილების შეტანამდე აშენებულ კორპუსებში მშრალი ჰიდრანტებისა და სხვა მოწყობილობების დამონტაჟებას, „რაც უზრუნველყოფს მეთერთმეტე და ზედა სართულების მცხოვრებლების უსაფრთხოებას და ხანძრის დროულ ჩაქრობას არსებობის შემთხვევაში, ვინაიდან არსებული ტექნიკა ვერ უზრუნველყოფს ამას“.
„ბათუმელების“ ინფორმაციით, ბათუმში საგანგებო სიტუაციების მართვის სამსახურს ორი სახანძრო კიბე აქვს. ერთი, ძველი, 30-მეტრიანი და უფრო ახალი, 40-მეტრიანი გასაშლელი კიბე, რომელიც საგანგებო სიტუაციების სამსახურს საქართველოში იაპონიის საელჩომ 2021 წელს აჩუქა.
- ხიდი ჭოროხზე
ჭოროხზე ხიდის მშენებლობას ითხოვენ როგორც ენმ-ის ასვე ლელოს წევრები: „უნდა მოხდეს ბათუმის ბულვარის გაგრძელება და მდინარე ჭოროხზე ახალი, გონიოსთან დამაკავშირებელი ხიდის მშენებლობა“.
ოპოზიცია მიიჩნევს, რომ ამ ტერიტორიას აქვს პოტენციალი რომ განვითარდეს როგორც მაღალი დონის საზღვაო კურორტი, შესაბამისი ტურისტული ინფრასტრუქტურით.
- საბავშვო ბაღების მშენებლობა
საბავშვო ბაღების მშენებლობის აუცილებლობაზე შენიშვნების ოთხივე ნაწილშია საუბარი. „ოცნების“ უმრავლესობა მომავალ წელს მინიმუმ 2 ბაღის მშენებლობის დაფინანსებას ითხოვს.
ენმ- ში მიიჩნევენ, რომ უნდა გაგრძელდეს როგორც ახალი ბაღების მშენებლობის, ასევე ბაღების რეაბილიტაციის პროგრამა და, ასევე, უნდა დაიყოს ბაღების ვაუჩერიზაციის პროგრამა.
„ამავდროულად, ვაუჩერები უნდა მიეცეს ბათუმში ყველა ბავშვს, რომლის გამოყენება მათ როგორც საჯარო, ასევე კერძო ბაღებშიც შეეძლებათ. ასეთი პოლიტიკა სახელმწიფო ბაღებში ბავშვთა რაოდენობასაც განტვირთავს და იმ ოჯახებისთვისაც იქნება შეღავათი, ვინც სხვადასხვა მიზეზის გამო, იძულებულია, რომ ბავშვი კერძო ბაღში ატაროს“.
- ქუჩების გაგრძელება და ახლებური მოწყობა
ენმ ასევე მიიჩნევს, რომ ბათუმის ბიუჯეტის პროექტში გათვალისწინებული უნდა იქნას ახალი ქუჩების მოწყობა, „მათ შორის მიზანშეწონილად მიგვაჩნია ქათამაძის ქუჩის გაგრძელება თამარის დასახლებამდე, რაც განტვირთავს ოდისეი დიმიტრიადისა და ძმები ნობელების ქუჩებზე საცობს, ლერმონტოვის ქუჩის გაგრძელება სულხან-საბა ორბელიანის ქუჩიდან ხახულის ქუჩამდე“.
- ქალაქის 3 D მოდელების შექმნა – რას ითხოვს „ოცნება“
„ოცნება“ დადებითად აფასებს ბიუჯეტის ზრდას და წერს, რომ მნიშვნელოვანია შენარჩუნდეს შემოსავლების ზრდის დინამიკა. ფრაქცია ასევე განმარტავს, რომ რიგი ინფრასტრუქტურული პრობლემების უმეტესობა, რაც მიმდინარე წლის განმავლობაში დეპუტატებმა საკრებულომდე მიიტანეს, ბიუჯეტში უკვე გათვალისწინებულია.
„ოცნება“ მერიას სთხოვს ქალაქის 3 D მოდელების შექმნაზე იზრუნოს, ასევე, მერიას რეკომენდაციას აძლევს, შეისყიდოს ქალაქის აქტივების პროგრამული უზრუნველყოფა და რეესტრის შექმნა. იმის გამო კი, რომ ბიუჯეტში აღარ არის „იაფი სახლის“ პროგრამის დაფინანსება, „ოცნების“ ფრაქცია მერიას რეკომენდაციას აძლევს, კარგი იქნებოდა რამდენიმე ახალი საცხოვრისის მშენებლობას გაგეთვალისწინებინათო.
„ოცნება“ ასევე წერს, რომ ბიუჯეტის პროექტი გამართული და თანმიმდევრულია და იმსახურებს დადებით შეფასებას.
