ბათუმში, სასტუმრო „მერიდიანში“, დღეს, 22 ნოემბერს, ბელარუსმა მხატვარმა, ვადის კრასოვსკიმ საკუთარი ახალი ნამუშევარი წარმოადგინა – ვახტანგ კიკაბიძის პორტრეტი, რომელიც 5-თეთრიანი, შეღებილი მონეტებითაა შექმნილი.
ნამუშევრის წარდგენას წინ უძღოდა ვახტანგ კიკაბიძის პორტრეტზე მუშაობის ამსახველი ვიდეორგოლი, სადაც ნაჩვენები იყო, რომ პორტრეტი სასტუმრო „მერიდიანის“ კოშკზეც იყო გამოფენილი.
ვადის კრასოვსკიმ პორტრეტის პრეზენტაციაზე თქვა, რომ ეს პორტრეტი მის პატივისცემას გამოხატავს ქართული კულტურის და ვახტანგ კიკაბიძის პერსონის, მისი შემოქმედების მიმართ.
მხატვარმა აღნიშნა, რომ პორტრეტი თბილისში პრეზენტაციის შემდეგ აუქციონზე გაიყიდება და თანხა საქართველოში ქველმოქმედებას მოხმარდება. მისივე თქმით, პორტრეტის სასტუმროს კოშკურაზე გამოფენა ასევე, შესაძლოა, გინესის რეკორდებშიც მოხვდეს.
ბუბა კიკაბიძის პორტრეტი „მერიდიანის“ კოშკურაზე. კადრი ვიდეოდან
პორტრეტის პრეზენტაციას ბათუმში ესწრებოდნენ ვახტანგ კიკაბიძის ოჯახის წევრებიც.
ვადის კრასოვსკი წლებია მონეტებით ხატავს, მან თავისი ორი მთავარი ჰობი – ნუმიზმატიკა და ფერწერა ამ ტექნიკაში გააერთიანა. შექმნილი აქვს სხვადასხვა ცნობილი ადამიანის პორტრეტი, მათ შორის: პიკასოს, მარგარეტ ტეტჩერის, სალვადორ დალის და ა.შ.
პრეზენტაცია „მერიდიანში“
