ქობულეთის „შუქურას“ ფეხბურთელებს ორი თვეა ხელფასი არ აუღიათ. ფეხბურთელები აპირებენ პროტესტის ნიშნად 24 ნოემბერს არ გავიდნენ თამაშზე, თუკი ხელფასები უახლოეს ვადაში არ ჩაირიცხება.
ფეხბუთელებმა განცხადებით ფედერაციასაც მიმართეს.
„ბათუმელები“ „შუქურას“ ერთ-ერთ ფეხბურთელს, გია აფხაზავას ესაუბრა, რომელიც ადასტურებს გუნდში არსებულ პრობლემებს.
„პრობლემა მოდის წინა სეზონიდან. გვქონდა დავალიანება სამი თვე, ასევე ეროვნულ ლიგაში გადასვლის პრემია გვქონდა ასაღები საჩემპიონო და მოგვატყუეს, არ აგვიღია.
ამის გამო გუნდი დატოვა ფეხბურთელების თითქმის 70-მა პროცენტმა, მაგრამ მათ ფედერაციაში იჩივლეს და აიღეს ხელფასები.
მერე თავიდან შეიკრა ახალი გუნდი და თითქოს ნორმალურად მიმდინარეობდა ყველაფერი, თუმცა ისევ დაიწყო ფინანსური პრობლემები. ახლა ასაღები გვაქვს ორთვენახევრის ხელფასი“ – გვეუბნება გია აფხაზავა.
მისი თქმით, ხელფასები დღეს, 21 ნოემბერს უნდა დაერიცხვოდათ, თუმცა არ დაირიცხა.
„აქამდე არ ვვარჯიშობდით, გუშინ დავიწყეთ ვარჯიში, მაგრამ არ გვაქვს ის პირობები მაინც, რომ წესიერად ვივარჯიშოთ. მით უმეტეს, ახლა თბილისში ვართ ჩამოსული და როცა ელემენტარული პირობა არ გაქვს – საკვების ფული, ან ვარჯიშზე რომ მიხვიდე, ძალიან რთულია… „ოთხშაბათს იქნება ფული“ გვითხრეს ახლა. ასეთი უამრავი ოთხშაბათი გავიდა უკვე“ – ამბობს გია აფხაზავა.
ის ამბობს, რომ „შუქურა“ ფეხბურთის ფედერაციიდანაც იღებს გარკვეულ დაფინანსებას, მაგრამ რას ხმარდება ეს თანხა კონკრეტულად, ფეხბურთელებისთვის უცნობია.
„ბათუმელები“ კლუბის ხელმძღვანელს მიშა აბაშიძესაც ესაუბრა, რომელიც გუნდში შექმნილ კრიზისს აღიარებს.
„მართალი გითხრათ, მე ფინანსურ ნაწილზე არ ვარ პასუხისმგებელი, ამიტომ ზუსტად ვერ გეტყვით რა ოდენობის დავალიანებაზეა საუბარი, თუმცა პრობლემები ნამდვილად არსებობს.
გვაქვს არასასურველი ფინანსური ვითარება. ელოდება გუნდი ფონდიდან და ინვესტორისგანაც თანხების ჩარიცხვას.
დღესაც იყვნენ გუნდის მენეჯმენტის წარმომადგენლები ფონდში და როგორც ვიცი, რაღაც დოკუმენტაციაა მისაწოდებელი და ამ დოკუმენტაციის მოგროვება-მიწოდება მიმდინარეობს ამჟამად“ – ამბობს მიშა აბაშიძე.
მას ვკითხეთ, აქამდე რატომ ვერ მოხერხდა დოკუმენტაციის შეგროვება, რაზეც მიშა აბაშიძე ამბობს, რომ გუნდი გარკვეული ვალდებულებების შეუსრულებლობის გამო დასანქცირებულია და დაფინანსების პროცესიც ამიტომ გაჭიანურდა.
„მწვრთნელების, ფეხბურთელების სახელფასო დავალიანებებია გასული სეზონის და მათზე დაკისრებული სხვა ვალდებულებების შეუსრულებლობის გამო მიღებულია გადაწყვეტილება გუნდის დასანქცირებასთან დაკავშირებით.
თუ ისე მოხდა, რომ 24-ში თამაშზე არ გავიდა გუნდი, მაშინ „შუქურა“ ჩემპიონატიდან მოიხსნება, რაც ძალიან ცუდი იქნება კლუბის მომავლისთვის. იმედია ეს არ მოხდება და ხელფასების პრობლემაც მოგვარდება“ – ამბობს მიშა აბაშიძე.
მან გვითხრა, რომ „შუქურას“ მთავარი სპონსორი „ალიანს ჰოლდინგი ჯგუფია“.
გუნდი ფინანსური პრობლემების წინაშე წინა წლებშიც არაერთხელ მდგარა.
_________________
ფოტო: „ქობულეთის შუქურას“ გვერდი ფეისბუქზე
