ქობულეთში საახალწლო ღონისძიებების ორგანიზებისთვის ადგილობრივი ბიუჯეტიდან 250 ათასი ლარია გათვალისწინებული და შესაბამის მომსახურებაზე მერიამ ტენდერიც გამოაცხადა. ამავე ტენდერის ფარგლებში ქობულეთის მერია წლის შემაჯამებელი ღონისძიების ორგანიზებასაც შეისყიდის.
ქობულეთში საახალწლო დღეებში კულტურული ღონისძიებების ორგანიზების შესყიდვაზე გამოცხადებულ ტენდერში წინადადებების მიღება 2023 წლის 24 ნოემბერს დაიწყება და 27 ნოემბერს დასრულდება.
ღონისძიებების ჩატარების დრო კი 2023 წლის 25 დეკემბრიდან 2024 წლის 2 იანვრის ჩათვლით პერიოდია. საახალწლო ღონისძიებები ქობულეთში, აღმაშენებლის ქუჩის 141-ის [მერიის შენობის] წინ მდებარე სკვერის მიმდებარედ გაიმართება.
ტენდერში გამარჯვებულმა უნდა უზრუნველყოს:
- „8 დღის განმავლობაში ყავა, ჩაი, წყლით, წვენი და ერთჯერადი (ცეცხლგამძლე) ჭიქებით და დამხმარე პერსონალით უზრუნველყოფა – მერიასთან შეთანხმებით.
- 26 დეკემბრიდან 2 იანვრის ჩათვლით – DJ არანაკლებ 3-საათიანი პროგრამით; უნდა ჰქონდეს ღია სივრცეში დაკვრის გამოცდილება, სივრცის და სიტუაციური ხედვა. შესაბამისი აპარატურით.
- ღონისძიების ფარგლებში დაცვის ორი თანამშრომლის დაქირავება – საღამოს 9 საათიდან დილის 9 საათამდე, სცენისა და ნაძვის ხის მიმდებარე ტერიტორიაზე.
- 5 ადამიანისგან შემდგარი დამხმარე პერსონალის დაქირავება [20 დეკემბრიდან 31 დეკემბრის ჩათვლით].
- 27 დეკემბერი ბენდი – მომწოდებელმა უნდა უზრუნველყოს ბენდის მოწვევა. ბენდის მუსიკალური პროგრამა აერთიანებს Funk, Disco,Pop, Pop-Rock, R&B. შემადგენლობა-5 წევრი. დრამი, ბასი, გიტარა, კლავიში, ორი ვოკალი.
- 31 დეკემბერი – ზღაპრის გმირები [კიდევ ერთ დღეს, პროექტზე ბავშვებისთვის] ანიმატორების, სახეზე მოხატვის, ზღაპრის გმირების და საპნის ბუშტების შოუ; ფოიერვერკი; ბენდის კონცერტი [ქართველი სოლისტი ქალის და ბენდის მოწვევა. ცოცხალი შესრულებით (YOUTUBE-ზე არანაკლებ 2 სიმღერა,რომელთაგან თითოეულს აქვს არანაკლებ 3000 ნახვა);
- ბენდის კონცერტი – ბენდს უნდა ქონდეს სცენაზე 25-წლიანი გამოცდილება, უნდა შედგებოდეს არანაკლებ 4 წევრისგან, უნდა ჰქონდეს გამოცემული მინიმუმ 5 ალბომი. YOUTUBE-ზე ერთ-ერთი სიმღერის ნახვის რაოდენობა არანაკლებ 500 000.
- საახალწლო ნობათის მიწოდება. თითოეული საახალწლო ნობათი უნდა იყოს მოთავსებული მუყაოს მაღალი ხარისხის ჩანთაში; ჩანთა უნდა იყოს ფერადი, ნაწარმი (არანაკლებ 50 გრამი), რძიანი შოკოლადის შიგთავსით და სათამაშოთი (კინდერ სიურპრიზის მაგვარი), ორცხობილა არანაკლებ 430 გრამი (იუველერნოეს მაგვარი), კანფეტები (ჯოხიანი, ჩუპა-ჩუპსის მაგვარი), რძიანი შოკოლადი (M&M-ის მაგვარი), ბისკვიტიანი ნამცხვარი (ბარნის მაგვარი), შოკოლადის ნაწარმი (სნიკერსის მაგვარი, ასევე ბაუნტის მაგვარი), შოკოლადი ბატონი ( ტვიქსის მაგვარი), შოკო კრემი, კანფეტები: კარამელი, ნუგა, ხილის ან შოკოლადის შიგთავსით.
- საბავშვო ფურშეტის ორგანიზება. მენიუ უნდა შედგებოდეს შემდეგი დასახელების კერძებისგან: მინი ფენოვანი ხაჭაპური, ჰოთდოგი, მინი პიცა პეპერონი, მინი ბურგერი ქათმის ხორცით, ქათმის მწვადი ჩხირებზე, ქაფქეიქი, კოლა, პოპკორნი, ჩიფსი,ჟელიბონი და სხვადასხვა ტკბილეულისგან. მაგიდები სუფრებით, მოსამსახურე პერსონალით, ერთჯერადი ჭიქები და ერთჯერადი თეფშები. დეტალები შემსყიდველთან შეთანხმებით.“
2 იანვარი – „ადგილობრივი ქართული საესტრადო სიმღერების შემსრულებელი ბენდის მოწვევა, არანაკლებ 6 წევრისგან შემდგარი, ქართული და უცხოური სიმღერების შემსრულებელი [შესაძლებელია ბენდების და შემსრულებლების დღეების მონაცვლეობა შემსყიდველთან შეთანხმებით]“.
გამარჯვებულმა კომპანიამ, ხელშეკრულების გაფორმებიდან 7 დღის ვადაში უნდა წარმოადგინოს მონაწილე ჯგუფების, წამყვანის, შემსრულებლების, დჯ, ზღაპრის გმირების ხელშეკრულებები.
გარდა ამისა, ტენდერში გამარჯვებულმა „თეთრი საღებავით უნდა შეღებოს არსებული ჯიხურები დამხმარე პერსონალის დახმარებით. უნდა უზრუნველყოს ფოტოგრაფის დაქირავება 3 დღის განმავლობაში. მოთხოვნის შესაბამისად გადაიღოს მნიშვნელოვანი მოვლენები და დროულად შეძლოს დამუშავებული მასალის მოწოდება. ფოტოგრაფმა უნდა გადაიღოს და მოგვაწოდოს ღონისძიების მნიშვნელოვანი დეტალები ასახული ფოტოები + დრონით გადაღება, ვიდეოს მონტაჟი…“
უშუალოდ საახალწლო ღონისძიებების გარდა, ამავე ტენდერის ფარგლებში, ქობულეთის მერია გამარჯვებულს 2023 წლის შემაჯამებელი ღონისძიების ორგანიზებასაც ავალებს:
კონკრეტულად:
- „სიგელის დამზადება ჩარჩოთი, ორგმინის სასაჩუქრე ჯილდოს დამზადება მუნიციპალიტეტის ლოგოთი; თაიგულების, მისალოცი ბარათების დამზადება საახალწლო თემატიკით გაფორმებული.
- ფურშეტის ორგანიზება სტუმრებისთვის.
- წამყვანის (წამყვანი უნდა იყოს, ცნობილი ტელე სახე, რაც გულისხმობს, რომ გამოცდილება უნდა ჰქონდეს როგორც გალა კონცერტების წაყვანაზე, ასევე სატელევიზიო შოუ პროგრამებში) და მომღერლის (ქართული და უცხოური სიმღერების ინდივიდუალური შემსრულებელი) შერჩევა შემსყიდველთან შეთანხმებით.
- ვიდეო პრეზენტაციის დამზადება – მომწოდებელმა უნდა უზრუნველყოს განხორციელებული პროექტების შესახებ პრეზენტაციის ხმოვანი დიზაინის დამზადება და მუსიკალური გაფორმება. პრეზენტაციის ხანგრძლივობა არანაკლებ 5 წუთისა.
- მომწოდებელმა უნდა დაამზადებინოს და მერიას მიაწოდოს მაღალი მაგიდა ხის (მრგვალი ზედაპირით, რკინის ფეხებზე ზომები 80 სმ/120სმ, შავი ფერის. აღნიშნული საქონელი დარჩება მუნიციპალიტეტს].
- ასევე ხის და რკინის მასალისგან მაგიდის და სკამის დამზადება [ექვსკაციანი შავი ფერის დიზაინით. ზომები 60სმ/75სმ/140სმ აღნიშნული საქონელიც დარჩება შემსყიდველთან].
—
ქობულეთის მერია ცალკე ტენდერით საახალწლოდ ქალაქის გასაფორმებლად სხვადასხვა დეკორაციებსაც იყიდის.
ეს ტენდერი 201 ათას 600 ლარით იყო გამოცხადებული, სადაც შპს „ჯეო სტრიმი“ მერიას დეკორაციებს 144 ათას ლარად სთავაზობს.
„ჯეო სტრიმის“ შეთავაზება ქობულეთის მერიას / ფოტო ტენდერიდან
ქობულეთის მერიას „ჯეო სტრიმთან“ ხელშეკრულება ჯერ გაფორმებული არ აქვს. ტენდერი შერჩევა-შეფასების ეტაპზეა.
მერიის განმარტებით „მიწოდებული დეკორაციებით მოირთვება ქობულეთში დავით აღმაშენებლის ქუჩის ცენტრალური ნაწილი [სიგრძით მინიმუმ 500 მეტრი], ასევე მოედანი, სადაც განთავსებული იქნება ნაძვის ხე. სამონტაჟო სამუშაოებს მერია საკუთარი ძალებით შეასრულებს“.
ამ თემაზე:
ქობულეთის მერიის წინ მოედნის „პიაცად“ გადაკეთება სურთ – კონკურსი
