„რატომ იღებ, მერიიდან ხარ?“ – მეკითხება კაცი, რომელმაც გორგასლის ქუჩაზე, მესამე სკოლასთან ახლოს, ავტომანქანა ზებრა-გადასასვლელზე გააჩერა. როცა გაიგო, რომ მერიიდან არ ვიყავი და ფოტოები რეპორტაჟის მოსამზადებლად მინდოდა, თავად დაიწყო კითხვების დასმა.
„ადგილი რომ არ არის, მაგაზე წერ?… ამდენი სახლი რომ აშენდა და ეზო არ აქვს, ყველა ქუჩაში რომ აჩერებს მანქანას, მაგაზე წერ? – წამოდი, აბა, მაპოვნინე ადგილი და გავაჩერებ, სურათს რომ იღებ, მასე არ შეიძლება.“
თითქმის ყველა ავტომანქანის მფლობელი, რომელიც ხედავს, რომ წესების დარღვევით გაჩერებულ მის ავტომანქანას ფოტოს უღებენ, მიიჩნევს, რომ „ასე არ შეიძლება“ და თავს პარკინგისთვის გამოყოფილი ადგილების ნაკლებობით იმართლებს.
ბათუმის ქუჩებში, არამხოლოდ ცენტრალურ ნაწილში, ავტომანქანები გზის ორივე მხარეს ორ რიგად არის ჩამწკრივებული – ქუჩის კიდესთან, სადაც პარკინგის ადგილებია და ტროტუარზე.
ბათუმში, ლერმონტოვის ქუჩაზე, თითქმის მთელ პერიმეტრზე, დღის ნებისმიერ მონაკვეთში ტროტუარები ავტომანქანებს აქვთ ათვისებული.
ავტომანქანებს ხშირად ქუჩის ერთი ან ორივე მხრიდან ჩახერგილი აქვთ ზებრა-გადასასვლელებიც, რაც განსაკუთრებით პრობლემურია მცირეწლოვან ბავშვებთან ერთად ან ეტლით გადაადგილების დროს. მძღოლების თქმით, პრობლემური და საფრთხის შემცველია ისიც, როცა ზებრა-გადასასვლელის ნაწილი დიდ ჯიპს აქვს დაკავებული და ადამიანი ამ ავტომანქანის შემოვლით იწყებს გადასვლას:
„ამ დროს არ ჩანს ის, მით უმეტეს, თუ არ არის მაღალი და საშუალო ტანის ადამიანი ან ბავშვია. მოდიხარ და უცებ ჩნდება, ამიტომ ზებრაზე სულ უნდა შეანელონ, მაგრამ ყველა ასე არ იქცევა.“
ლერმონტოვის და გორგასლის კვეთა
მოქალაქეები აპროტესტებენ იმასაც, რომ მერია ისე ამტკიცებს სამშენებლო პროექტებს, რომ ქმნის მჭიდრო განაშენიანებას. შესაბამისად, ქალაქში პარკინგის ადგილებს თანდათან ამცირებს. მით უფრო, რომ სახელმწიფო უწყებებს ავტომანქანების გასაჩერებლად თავიანთი სამსახურების წინ ადგილი სხვებისთვის შეზღუდული აქვთ.
გარემოს დაცვის სააგენტოს წინ ადგილი დაკავებულია თანამშრომლობისთვის, ასეა სხვა უწყებებთანაც.
ბათუმი, ლერმონტოვის ქუჩა
ნებისმიერ ქუჩაზე შეხვდებით თვითნებურად დაკავებულ პარკინგის ადგილებსაც. როცა კონკრეტული ადგილიდან დილით მფლობელს ავტომანქანა გაჰყავს, იქ რაიმე ნივთს ან ამკრძალავ ნიშანს ტოვებს იმის სადემონსტრაციოდ, რომ აქ ავტომანქანა არავინ უნდა გააჩეროს. ასეთ ადგილებს მთელი დღის განმავლობაში ვერავინ იყენებს.
„ადგილი არ არის და რა ვქნათ“ – ამ არგუმენტით ბათუმში უკვე მერიის თანამშრომლებიც ამართლებენ პარკინგის წესების დარღვევას. ისინიც აჩერებენ ავტომანქანებს ტროტუარებზე, ველობილიკებზე, ავტობუსის გაჩერების ადგილებზე.
ბათუმის მუნიციპალური ინსპექციის ავტომანქანა ტროტუარზე
რეპორტაჟის მომზადებისას ბათუმის მუნიციპალური ინსპექციის თანამშრომლებს ორ ქუჩაზე შევხვდით. ისინი ახალი აპარატებით აფიქსირებდნენ დარღვევებს. ოფიციალური კომენტარი მათთან ვერ ჩავწერეთ, რადგან „ამისთვის უფროსთან შეთანხმებაა საჭირო“. პირად საუბარში კი გვითხრეს, რომ დაჯარიმებისას მოქალაქეების ნაწილი აგრესიას გამოხატავს, რაც მათ სამუშაოს ართულებს.
ახალი აპარატებით, რომლებიც ინსპექციამ ბოლო პერიოდში შეიძინა, ადგილზე შესაძლებელია დარღვევის ფოტოფიქსაცია და ჯარიმის გამოწერა.
ერთი მხრივ, მერია აღიარებს ქალაქში პარკირების ადგილების ნაკლებობას, როგორც გამოწვევას, მეორე მხრივ კი, საზოგადოების პროტესტის მიუხედავად საკრებულოსთან ერთად ამტკიცებს სამშენებლო პროექტებს, რომლებიც პარკინგების ადგილების მოწყობას, ბინების რაოდენობის პროპორციულად, არ ითვალისწინებს.
ამას ემატება ის გარემოებაც, რომ ახალი, მრავალფუნქციური კომპლექსების მშენებლობისთვის კომპანიები საკუთრებაში არსებულ მიწის ნაკვეთს თითქმის სრულად ითვისებენ, პარკინგისთვის ადგილი ძირითადად ე.წ. ნულ სართულზე [მიწისქვეშა სართული] აქვთ გათვალისწინებული, ეზოს სივრცეში კი ძირითადად მცირე, მაქსიმუმ ოცამდე ავტომანქანის ადგილს ტოვებენ.
ეზოს სივრცეში დატოვებული ადგილები უფასო პარკინგია, მიწისქვეშა სართულზე პარკინგისთვის გათვალისწინებულ სივრცეში კი ერთი ავტომანქანის ადგილის ღირებულება 10-12 ათასი დოლარია.
ამ კომპლექსების მშენებლობის დასრულების შემდეგ ქალაქში პარკინგის ადგილების პრობლემა კიდევ უფრო გამწვავდება. თუმცა ეს არ არის და არც მომავალში იქნება მშენებლის პრობლემა, რომელიც მერიისგან განაშენიანების მაქსიმალურ კოეფიციენტს [კ2] ითხოვს და იღებს კიდეც.
კოეფიციენტი განაშენიანების ფართობის მიხედვით გამოითვლება, თუმცა მარტივად რომ ავხსნათ, ეს კონკრეტულ ზონაში დადგენილი პარამეტრების გადამეტებას, შედეგად კი მაქსიმალურად მაღალი შენობის მშენებლობას გულისხმობს – ასე მშენებელი იღებს მეტ გასაყიდ ფართობს და მეტ მოგებას.
„დავავალდებულოთ, რომ პარკინგის ადგილი არ გაყიდოს, ასეთი პირობით მივცეთ თანხმობა კოეფიციენტის გაზრდაზე“, – ეს იდეა საკრებულოს გასულ სხდომაზე „ერთიანი ნაციონალური მოძრაობის“ ფრაქციის თავმჯდომარემ გააჟღერა. ეს იდეა იდეად დარჩა, რადგან გადაწყვეტილებას საკრებულოში „ოცნების“ უმრავლესობა იღებს.
ამავე თემაზე:
https://batumelebi.netgazeti.ge/news/480300/
