უკრაინაში კიევ-პეჩერის ლავრა ახალ, იულიუსის კალენდარზე გადადის 15 ნოემბრიდან – წერს უკრაინული მედია კიევ-პეჩორის ლავრის დროებით წინამძღვარზე, არქიმანდრიტ აბრაამის განცხადებაზე დაყრდნობით.
„კიევ-პეჩერის ლავრის მრევლის ხშირი მოთხოვნით, მიტროპოლიტ ეპიფანეს კურთხევით, 15 ნოემბრიდან (შობის მარხვის დასაწყისი) ლავრა გადადის იულიუსის, ახალი კალენდრის გამოყენებაზე, რაც აუცილებელია ჩვენი ეკლესიისთვის“ – წერს არქიმანდრიტი ფეისბუქზე.
უკრაინის მართლმადიდებელი ეკლესიის ადგილობრივმა საბჭომ, რომელიც 2023 წლის ივლისში გაიმართა კიევის წმინდა სოფიას ტაძარში, დაადასტურა ახალ, იულიუსის კალენდარზე, ე.წ. „ახალი სტილზე“ გადასვლა.
ამ გადაწყვეტილების პარალელურად, სამრევლოებსა და მონასტრებს ძველი კალენდრით სარგებლობის უფლებაც შეუნარჩუნდებათ. „სამრევლოებსა და მონასტრებს, რომლებსაც სურთ ძველი კალენდრის დაცვა, ექნებათ ეს შესაძლებლობა – კალენდარული რეფორმა მოხდება იძულების გარეშე, თანდათან“ – ციტირებს „ინტერფაქს-უკრაინა“ უკრაინის მართლმადიდებლური ეკლესიის [ПЦУ] პრესსამსახურის განცხადებას.
ახალი იულიუსის კალენდარი დამტკიცდა კონსტანტინოპოლში მართლმადიდებლური ეკლესიების კრებაზე 1923 წელს. იგი ემთხვევა გრიგორიანულ კალენდარს, რომელიც უკრაინაში გამოიყენება ყველა დღესასწაულზე, გარდა გარდამავალი დღესასწაულებისა. ახალ იულიუსის კალენდარს იყენებს მსოფლიო საპატრიარქო, რუმინეთის, საბერძნეთის, კვიპროსის, ალექსანდრიის და ანტიოქიის საპატრიარქოები და ბულგარეთის მართლმადიდებელი ეკლესია.
შესაბამისად, წელს უკრაინის მართლმადიდებლური ეკლესია შობას, სხვა მართლმადიდებლური ეკლესიების მსგავსად, 25 დეკემბერს აღნიშნავს.
უკრაინის ერთიანი, ავტოკეფალიური მართლმადიდებელი ეკლესია 2018 წლის 15 დეკემბერს შეიქმნა. ამავე დღეს აირჩიეს წინამძღოლად მიტროპოლიტი ეპიფანე. უკრაინის ეკლესიამ კონსტანტინოპოლის მსოფლიო საპატრიარქოსგან ავტოკეფალიის ტომოსი 2019 წლის დასაწყისში მიიღო. დროთა განმავლობაში უკრაინის ავტოკეფალია აღიარეს ალექსანდრიისა და აფრიკის საპატრიარქოს, ასევე, საბერძნეთისა და კვიპროსის ეკლესიებმა.
რუსეთმა, რომელიც თავშივე ცალსახად ეწინააღმდეგებოდა უკრაინის ავტოკეფალიის იდეას, კავშირი გაწყვიტა როგორც კონსტანტინოპოლის საპატრიარქოსთან, ისე დანარჩენი სამი ეკლესიის მეთაურებთან. უკრაინაში მოსკოვზე დაქვემდებარებულ ეკლესიას არსებობა არ შეუწყვეტია – ის დღემდე განკარგავს მრავალ ეკლესია-მონასტერსა და სამრევლოს უკრაინის ტერიტორიაზე.
საქართველოს მართლმადიდებელ ეკლესიას უკრაინის ავტოკეფალია არ უღიარებია. 2022 წლის ბოლოს დმანისისა და აგარაკ-ტაშირის მთავარეპისკოპოსი, ზენონ იარაჯული უკრაინაში ჩავიდა, სადაც ადგილობრივი ეკლესიის უმაღლეს იერარქს, ეპიფანე პირველს შეხვდა.
