ბათუმში, ასევე ხულოს, შუახევის, ქედისა და ხელვაჩაურის მუნიციპალიტეტებში 11 საბავშვო ბაღის რეკონსტრუქცია-რეაბილიტაციაზე საქართველოს მუნიციპალური განვითარების ფონდს ხუთი ტენდერი აქვს გამოცხადებული. შესყიდვის სავარაუდო ღირებულება ჯამში 31 მილიონ 972 ათას 52 ლარია.
ტენდერები პრეისკურანტითაა გამოცხადებული და Design-Build მეთოდით საბავშვო ბაღების რეკონსტრუქცია-რეაბილიტაციისთვის დეტალური საპროექტო-სახარჯთაღრიცხვო დოკუმენტაციის მომზადებას, შემდეგ კი ამ დოკუმენტაციის საფუძველზე შესაბამისი სამუშაოების ჩატარებას ითვალისწინებს.
ამ ტენდერების ფარგლებში დაგეგმილია:
- ბათუმში – N3, N12 და N26, N23 და N29 საბავშვო ბაღების
- ხულოში – სოფელ ხიხაძირის და სოფელ ოქრუაშვილების ბაღების
- შუახევში – სოფელ ბარათაულის და სოფელ ბუთურაულის ბაღების
- ქედაში – სოფელ ქვედა მახუნცეთის (აწჰესი) ბაღის
- ხელვაჩაურში – სოფელ ქედქედის საბავშვო ბაღის რეაბილიტაცია.
13 710 410 ლარით არის გამოცხადებული ტენდერი ბათუმის N3, N12 და N26 საბავშვო ბაღების რეკონსტრუქციაზე. წინადადებების მიღება იწყება 2023 წლის 17 ნოემბერს და მთავრდება 20 ნოემბერს. სამივე ბაღის შემთხვევაში პროექტირება და რეკონსტრუქციის სამუშაოები კი ხელშეკრულების გაფორმებიდან 18 თვეში უნდა დასრულდეს.
7 196 500 ლარით არის გამოცხადებული ტენდერი ბათუმის N23 და N29 საბავშვო ბაღების რეკონსტრუქციაზე. ამ შემთხვევაშიც წინადადებების მიღება დაიწყება 2023 წლის 17 ნოემბერს და დამთავრდება 20 ნოემბერს. სამუშაოები კი, ხელშეკრულების გაფორმებიდან 16 თვეში უნდა დასრულდეს.
3 157 705 ლარია გათვალისწინებული ხულოს მუნიციპალიტეტის სოფლების – ხიხაძირისა და ოქრუაშვილების საბავშვო ბაღების რეკონსტრუქციისთვის. ამ ტენდერში წინადადებების მიღება 2023 წლის 14 ნოემბერს დაიწყება და 17 ნოემბერს დასრულდება. სამუშაოები ტენდერში გამარჯვებულთან ხელშეკრულების გაფორმებიდან 13 თვეში უნდა დასრულდეს.
3 342 387 ლარითაა გამოცხადებული ტენდერი შუახევის მუნიციპალიტეტის სოფლების – ბარათაულის და ბუთურაულის ბაგა-ბაღების რეკონსტრუქციაზე. წინადადებების მიღება აქაც 2023 წლის 14 ნოემბერს დაიწყება და 17 ნოემბერს დასრულდება. სამუშაოები კი, ხელშეკრულების გაფორმებიდან 13 თვეში უნდა დასრულდეს.
4 565 050 ლარია გათვალისწინებული ხელვაჩაურის მუნიციპალიტეტის სოფელ ქედქედის საბავშვო ბაღის და ქედის მუნიციპალიტეტის სოფელ ქვედა მახუნცეთის (აწჰესი) საბავშვო ბაღის რეკონსტრუქციაზე. ტენდერში წინადადებების მიღება დაწყებულია და 2023 წლის 16 ნოემბერს დასრულდება. ამ შემთხვევაში სამუშაოები ტენდერში გამარჯვებულთან ხელშეკრულების გაფორმებიდან 15 თვეში უნდა დასრულდეს.
ამავე თემაზე
საქართველოს მუნიციპალური განვითარების ფონდს ცალკე ტენდერი აქვს გამოცხადებული ხელვაჩაურის მუნიციპალიტეტის სოფლების – ფერიის, მახინჯაურისა და ორთაბათუმის საბავშვო ბაღების რეკონსტრუქცია-რეაბილიტაციაზე, რისთვისაც მთლიანობაში 6 მილიონი ლარია გათვალისწინებული.
ამ ტენდერში წინადადებების მიღება 2023 წლის 15 ნოემბერს დასრულდება:
ფერიის, ორთაბათუმისა და მახინჯაურის საბავშვო ბაღების რეკოსტრუქციაზე 6 მილიონია გამოყოფილი
