2.7 კილომეტრი სიგრძის ქუჩა ბათუმში ტროტუარის გარეშე - მოსახლეობა უსაფრთხო გზას ითხოვს | ფოტო - Batumelebi • ბათუმის მერია, ბათუმის მუნიციპალური ინსპექცია, ბათუმის ქუჩები, ტროტუარი, • batumelebi.ge

ბათუმში მამია ვარშანიძის ქუჩა, რომლის სიგრძე თითქმის 2,7 კილომეტრია, ფაქტობრივად, ტროტუარის გარეშეა. გარდა იმისა, რომ ამ ქუჩაზე სავალი ნაწილი, როგორც ავტომანქანებისთვის, ასევე ფეხით მოსიარულეებისთვის მოუწესრიგებელია, ის ვიწრო ბილიკებიც კი ჩახერგილია, სადაც ქვეითმა შეიძლება ისე გაიაროს, რომ სამანქანო გზაზე არ აღმოჩნდეს.

„იძულებული ვართ, ტრასაზე ვიაროთ და ავტობუსს და „მარშუტკასაც“ ტრასაზე ველოდებით. ქალაქის მერიისგან ვითხოვთ ქუჩაზე ტროტუარი მოაწყონ, მანამდე კი, დროებით რამე ნიშანი მაინც განათავსონ, რომ მანქანების დგომა არ შეიძლება. არის ადგილები, სადაც ჯართადქცეული მანქანები თუ ტრაილერები მუდმივად დგას იქ, სადაც, წესით, ქვეითებმა უნდა იარონ. ზოგან მითვისებული და შემოღობილია ტროტუარები“, – უთხრეს „ბათუმელებს“ მამია ვარშანიძის ქუჩაზე.

ამ პრობლემაზე ძირითადად უფრო ის მოქალაქეები საუბრობენ, რომლებიც მამია ვარშანიძის ქუჩის სხვადასხვა ჩიხში ცხოვრობენ ან ამ ქუჩაზე მდებარე საჯარო სკოლებში ბავშვები დაჰყავთ. ამ ქუჩაზე კი ბათუმის ორი – მე-13 და 28-ე საჯარო სკოლაა.

მამია ვარშანიძის N101-109 ნომრებში მცხოვრებმა მოქალაქეებმა პრობლემის მოგვარების თხოვნით ქალაქის მერიას წერილობითაც კი მიმართეს.

მოსახლეობის თქმით, მათთან იყვნენ მერიის სერვისცენტრისა და მუნიციპალური ინსპექციის თანამშრომლები, რომლებმაც უთხრეს, რომ „ტროტუარი, მათ სახლებთან შესასვლელი ჩიხის მიმდებარედ გათავისუფლდებოდა და მუდმივ მონიტორინგს დააწესებდნენ“.

მოქალაქეებმა მუნიციპალური ინსპექციიდან წერილზე პასუხიც მიიღეს:

„ბათუმის მუნიციპალურ ინსპექციაში 20.09.2023 წ შემოსული, თქვენი N19142326311- 14 წერილის პასუხად გაცნობებთ, რომ ჩვენი ინსპექციის შესაბამისი სამსახურის თანამშრომლების მიერ, საპატრულო პოლიციის თანამშრომლებისა და ადგილობრივი თვითმმართველობის თანამშრომლების თანდასწრებით, შესწავლილი იქნა და გატარდა კანონით გათვალისწინებული ღონისძიებები, თქვენი საცხოვრებელი ადგილის მიმდებარედ ჩახერგილი მოუწესრიგებელი ტროტუარის ავტომობილებისგან გათავისუფლების მიზნით.

ტროტუარზე მდგომი ავტომობილების მფლობელები გაფრთხილდნენ, შემდგომში აღნიშნულ ტერიტორიაზე ავტომობილების გაუჩერებლობის თაობაზე, აგრეთვე გაცნობებთ, რომ ინსპექციის მხრიდან დაწესდება სისტემატური კონტროლი აღნიშნული დარღვევების პრევენციის მიზნით.“

პასუხი მამია ვარშანიძის ქუჩის 101-109-ში მცხოვრებებს

მოსახლეობამ მერიას წერილობით 20 სექტემბერს მიმართა, პასუხი კი ინსპექციიდან 23 ოქტომბერს მიიღეს.

„ბათუმელები“ დღეს, 25 ოქტომბერს, იყო ამ ქუჩაზე. მამია ვარშანიძის 101-109 მისამართებზე მისასვლელში, მანქანებიც დგას და ტრაილერიც:

ბათუმი, მამია ვარშანიძის ქუჩის 99 ნომერთან / ფოტო: „ბათუმელები“ 25.10.2023

ბათუმი, მამია ვარშანიძის ქუჩის 111 ნომერთან / ფოტო: „ბათუმელები“ 25.10.2023

„ჩვენ არავის ბიზნესს ხელს არ ვუშლით. უბრალოდ ტროტუარს ვითხოვთ, რომ როგორმე იქნებ უსაფრთხოდ გავიაროთ“, – გვითხრა ერთ-ერთმა მცხოვრებმა. უნდა ითქვას, რომ მთელ ქუჩაზე ანალოგიური სიტუაციაა.

„ბათუმელები“ დღეს მუნიციპალურ ინსპექციასაც დაუკავშირდა და ჰკითხა, გააფრთხილეს [დააჯარიმეს] თუ არა ვინმე გარევაჭრობისთვის ან უკანონო მშენებლობისთვის მამია ვარშანიძის ქუჩაზე.

„მამია ვარშანიძის ქუჩაზე გარევაჭრობასთან დაკავშირებით მონიტორინგი ეტაპობრივად ხორციელდება. გაფრთხილებულია ყველა ობიექტი, რამდენიმეზე უკვე მიმდინარეობს საქმისწარმოება. თუ არ მოხდება სამართალდამრღვევების მიერ აღნიშნულის შესაბამის ვადებში გამოსწორება, მუნიციპალური ინსპექცია იმოქმედებს კანონის შესაბამისად. მშენებლობას რაც შეეხება, 3 ობიექტია დაჯარიმებული“, – მოგვწერეს ბათუმის მუნიციპალური ინსპექციიდან.

მოსახლეობის მთავარი მოთხოვნა დღეს მამია ვარშანიძის ქუჩაზე ტროტუარების მოწყობაა, ასევე ის, რომ მიეცეთ შესაძლებლობა, ქუჩაზე ფეხით უსაფრთხოდ გადაადგილდნენ.

„დაწყებულია პროექტი, რომელიც ითვალისწინებს მამია ვარშანიძისა და ხახულის ქუჩების კეთილმოწყობას [ალ. სულაბერიძისა და მ. ვარშანიძის ქუჩების კვეთიდან ფრ. ხალვაშის გამზირამდე], რისთვისაც გამოყოფილია 30 999 929 ლარი. აღნიშნულ მონაკვეთზე მოეწყობა 15 ხიდი, სანიაღვრე არხი, ტროტუარები, ბორდიურები, საყრდენი კედლები, დამონტაჟდება საგზაო ნიშნები.

სამუშაოების მასშტაბურობიდან გამომდინარე, პროექტი მრავალწლიანია. სამუშაოები მიმდინარე წლის აპრილში დაიწყო და 2026 წლის მარტში უნდა დასრულდეს“, – მოგვწერეს დღეს ბათუმის მერიის კეთილმოწყობისა და ინფრასტრუქტურის სამმართველოდან.

[შესყიდვების პორტალის მიხედვით, მამია ვარშანიძის და ხახულის ქუჩების კეთილმოწყობაზე ხელშეკრულება მერიის სამმართველოს შპს „ბონდი-2009“-სთან აქვს გაფორმებული 2023 წლის 3 აპრილს. სამუშაოები ხახულის ქუჩაზე მიმდინარეობს. კომპანიისთვის ამ დროისთვის 5 500 000 ლარია გადარიცხული].

ნახეთ „ბათუმელების“ მიერ დღეს, 25 ოქტომბერს, ვარშანიძის ქუჩაზე გადაღებული ფოტოები: