აჭარის უმაღლეს საბჭოში ფრაქცია „ერთიანი ნაციონალური მოძრაობის“ წევრებმა ახალი კანონპროექტი დაარეგისტრირეს.
ფრაქციის წევრის, გია აბულაძის თქმით, ახალი კანონპროექტი უზრუნველყოფს საბიუჯეტო პროცესის გამჭვირვალეობასა და მოსახლეობის ჩართულობის ზრდას.
„აჭარის მოსახლეობის ძალიან დიდი ნაწილი ცხოვრობს სიღარიბეში, ან სოციალურად დაუცველთა ბაზაში რეგისტრირებულია დახმარების მიმღებად, ან გაჭირვებულია, მაგრამ ისეთი მონაცემები არ აქვს, რომ დახმარება მიიღოს.
ყოველი ბიუჯეტის ყველა განხილვისას ვითხოვ პრიორიტეტების განხილვისას დოკუმენტში ჩაიწეროს, რომ აჭარაში არის სიღარიბე. სამწუხაროდ ვერ შევასმინე, დაინახონ გაჭირვებული მოსახლეობის არსებობა.
ახალი კანონით, აჭარის მთავრობა ვალდებული იქნება პრიორიტეტების დოკუმენტიც და ბიუჯეტიც განიხილოს მოსახლეობასთან ერთად ყველა მუნიციპალიტეტში, წინასწარ გამოაქვეყნონ თარიღები როდის მოხდება თითოეულ მუნიციპალიტეტში განხილვა და მოსახლეობა რა პრიორიტეტებსაც დაასახელებს, ისინი ვალდებული იქნებიან ყველა პრობლემა მუხლების სახით ასახონ და როდესაც უმაღლეს საბჭოში შემოვა ბიუჯეტი, ამას თან მოაყოლონ,“- განმარტავს კანონპროექტის არსს გია აბულაძე.
მისი თქმით, ახალი კანონპროექტი ხელს შეუწყობს საბიუჯეტო პროექტის მომზადების, განხილვისა და დამტკიცებისას მოსახლეობის ჩართულობის ზრდას; გააუმჯობესებს ბიუჯეტის მიზნობრივი ხარჯვის კონტროლის მექანიზმებს და ბიუჯეტის შესრულების ანგარიშის კვალიფიციურად წარმოდგენას.
ახალი კანონპროექტი ასევე ითვალისწინებს გენდერული ბიუჯეტის მომზადებასა და მიღებას.
აჭარის უმაღლესი საბჭოს ოპოზიციის საკანონმდებლო ინიციატივას გამოეხმაურა აჭარის უმაღლესი საბჭოს თავმჯდომარე დავით გაბაიძე.
„ეს მხოლოდ პოლიტიკური განცხადებაა და კონკრეტული კანონპროექტი ამწუთას არაა დარეგისტრირებული საბჭოში, თუმცა მოლოდინი გვაქვს, რადგან ითქვა, დარეგისტრირდება.
ზოგადად მივესალმები იმას, რომ ნაციონალური მოძრაობა გამოჩნდა უმაღლეს საბჭოში და რაც მთავარია, გამოჩნდა საკანონმდებლო ინიციატივასთან დაკავშირებით.
უმაღლეს საბჭოში მომდევნო წლის ბიუჯეტი უნდა შემოვიდეს პირველ ნოემბრამდე, რამდენიმე დღე არის დარჩენილი და ეს კანონი, რომც ჩავთვალოთ, რომ გამართულია ტექნიკურად და იურიდიულად და მივიღოთ, ვერ მოესწრება 2024 წლის ბიუჯეტისათვის.
რაც შეეხება 2025 წელს და შემდგომ პერიოდს, ეტყობა „ნაცმოძრაობა“ უკვე რიგითი მოქალაქეების პოზიციებიდან აპირებს მხოლოდ პოლიტიკურ პროცესებში მონაწილეობის მიღებას,“ – განაცხადა დავით გაბაიძემ.
ფრაქცია „ერთიანი ნაციონალური მოძრაობის“ წევრი გია აბულაძე ამბობს, რომ კანონპროექტი დღეს, 25 ოქტომბერს ნამდვილად დაარეგისტრირეს უმაღლეს საბჭოში.
„დღეს დავარეგისტრირეთ უკვე კანონპროექტი. კანცელარიიდან თუ გაბაიძეს გვიან აუტანეს, რა უნდა ვქნათ. ჩვენ დავარეგისტრირეთ“, – ამბობს გია აბულაძე.
