არასტანდარტულ ციტრუსზე წელს სახელმწიფო სუბსიდია აჭარის რეგიონში 15 თეთრის ნაცვლად 30 თეთრი იქნება. ინფორმაცია ამის შესახებ დღეს, 25 ოქტომბერს, თორნიკე რიჟვაძემ, აჭარის მთავრობის თავმჯდომარემ გააჟღერა აჭარის მთავრობის სხდომაზე.
„მივიღეთ გადაწყვეტილება, რომ გავაორმაგოთ არასტანდარტულ ციტრუსზე სახელმწიფო სუბსიდია, ნაცვლად 15 თეთრისა, მეციტრუსე ფერმერებს გაუორმაგდებათ შესაბამისი სუბსიდია და ის შეადგენს 30 თეთრს.
წელს ველოდებით დაახლოებით 55 ათას ტონამდე ციტრუსს. 20-ზე მეტი სარეალიზაციო საწარმო მიიღებს საექსპერტო მანდარინს, ასევე, ქობულეთის საკონსერვო საწარმო მიიღებს არასტანდარტულ მანდარინს,“ – აღნიშნა მთავრობის სხდომაზე თორნიკე რიჟვაძემ.
დღეიდან ამოქმედდება ციტრუსის რეალიზაციის საკოორდინაციო შტაბი.
