საქართველოს გაზის ტრანსპორტირების კომპანიამ ხულოს, შუახევის, ქედისა და ხელვაჩაურის 11 სოფლის გაზიფიცირებისთვის პროექტების შესყიდვაზე ტენდერები გამოაცხადა.
კომპანია ამ ეტაპზე გაზიფიცირების პროექტებს შეისყიდის შემდეგი სოფლებისთვის:
- შუახევის მუნიციპალიტეტი – ზედაყანა, ზამლეთი
- ხულოს მუნიციპალიტეტი – თხილაძირი
- ქედის მუნიციპალიტეტი – ზედა ბზუბზუ, ძენწმანი, არსენაული, გობრონეთი, ტაკიძეები
- ხელვაჩაურის მუნიციპალიტეტი – ქედქედი, ცხემლარა, ქვედა ქოქოლეთი
პროექტირებაზე ორი ტენდერია გამოცხადებული. ორივე ტენდერში წინადადებების მიღება 2023 წლის 28 ოქტომბერს დაიწყება და 30 ოქტომბერს დასრულდება.
ზედაყანის, ზამლეთისა და თხილაძირის გაზიფიცირების პროექტირებაზე ტენდერი 147 ათას 366 ლარითაა გამოცხადებული. ტენდერში გამარჯვებულმა პროექტები ხელშეკრულების გაფორმებიდან 38 დღეში უნდა მოამზადოს.
ზედა ბზუბზუს, ძენწმანის, არსენაულის, გობრონეთის, ტაკიძეების, ქედქედის, ცხემლარისა და ქვედა ქოქოლეთის შემთხვევაში კი, ტენდერი 312 ათას 500 ლარითაა გამოცხადებული. ამ სოფლების გაზიფიცირებისთვის საჭირო პროექტები ტენდერში გამარჯვებულმა 92 დღეში უნდა მოამზადოს.
როგორც წესი, პროექტების შესყიდვის შემდეგ, ცალკე გამოაცხადებენ ტენდერს გაზსადენი ქსელის მონტაჟზე სოფლებში, ხოლო დამონტაჟების შემდეგ ქსელი გადაეცემა გაზის მიმწოდებელ კომპანიას [ამ შემთხვევაში „სოკარს“], რომელმაც უნდა დაიწყოს მოსახლეობისთვის გაზის მიწოდებაც [ცენტრალური მილებიდან სახლებამდე გაზის მილებს მიმწოდებელი კომპანია მიიყვანს]. შესაბამისად, კონკრეტულად, თუ როდის მიიღებს მოსახლეობა გაზს ამ სოფლებში, განსაზღვრა ძნელია.
აღსანიშნავია ისიც, რომ გაზის ტრანსპორტირების კომპანიამ ქობულეთის არაერთ სოფელში გაზი 2021 წელს გაიყვანა, მოსახლეობას კი ბუნებრივი აირი დღემდე არ მიეწოდება.
ამ საკითხზე ვრცლად:
ვინ არ ურთავს გაზს და წყალს ქობულეთის სოფლებს – რა ჩანს დოკუმენტებში
