სოფლის სკოლებში გათბობა ჩართულია – რესურსცენტრები

საქართველოს მაღალმთიანეთში უკვე აცივდა და სკოლებში გათბობის საჭიროებაზე საუბრობენ.

„ბათუმელებს“ გასულ კვირას მშობელი დაუკავშირდა მაღალმთიანი აჭარიდან, რომლის თქმითაც სკოლაში გათბობა არ იყო ჩართული და ბავშვებს ცივ საკლასო ოთახებში უწევდათ ყოფნა. მოგვწერეს მარნეულის მუნიციპალიტეტიდანაც – მარნეულელმა პედაგოგმა გვითხრა, რომ სიცივის მიუხედავად, სკოლის ადმინისტრაცია გათბობას არ რთავს.

„ამბობენ, რომ 15 ნოემბრიდან უნდა ჩაირთოს გათბობა. სად წერია, ვინ გადაწყვიტა, რომ ნოემბერში უნდა ჩაირთოს? უკვე ძალიან ცივა“, – გვითხრა მასწავლებელმა.

„ბათუმელები“ რამდენიმე რესურსცენტრს დაუკავშირდა და ჰკითხა, ჩართულია თუ არა მაღალმთიანი სოფლის სკოლებში გათბობა და თუ არა, რატომ?

ხულოს რესურსცენტრში გვითხრეს, რომ სკოლებში გათბობის ჩართვას თავად სკოლა წყვეტს და მას სამინისტროს ან სხვა უწყების მითითება არ სჭირდება.

შუახევის რესურსცენტრში ამბობენ, რომ სკოლებმა უკვე ჩართეს გათბობა. იგივე გვითხრეს ონის მუნიციპალიტეტის რესურსცენტრშიც.

„ჩვენთან კარგა ხანია ჩართული გვაქვს, რადგან მოგეხსენებათ, რომ მთის ზონა ვართ და ძალიან ცივა. წინა დღეებში ჩამოთოვა ახლოს და რომ არ ჩავრთოთ, გავიყინებით. ღუმელი უნთიათ სოფელში და ჩართულია ცენტრალური გათბობაც“, – გვითხრა ნინო მეტრეველმა, ონის რესურსცენტრის ხელმძღვანელმა.

მისი თქმით, ბოლო წლებია, როგორც კი აცივდება, მაშინვე რთავენ დირექტორები გათბობას.

რაც შეეხება მარნეულის მუნიციპალიტეტს, აქ რესურსცენტრის იურისტმა გვიპასუხა ტელეფონზე, რომელიც ასევე ირწმუნება, რომ სკოლებში გათბობა ჩართულია.

„წესით, 15 ნოემბრიდან იწყება ზამთრის სეზონი, მაგრამ თუ ცივა, სკოლას შეუძლია ჩართოს გათბობა“, – გვითხრა მან.

საქართველოს მაღალმთიან სოფლებში სკოლები, ძირითადად, შეშის ღუმლით თბება.

ზოგიერთ სკოლას გასულ ზამთარში გათბობის პრობლემა ჰქონდა, რადგან სისტემა ხარვეზებით მუშაობდა და მოსწავლეებს ქურთუკებით უწევდათ საკლასო ოთახში ყოფნა.

_______________

ფოტო „ბათუმელების“ არქივიდან