ევა გოცირიძე ერთ-ერთია იმ მოსამართლეებს შორის, ვინც გადაწყვიტა, რომ პრეზიდენტმა კონსტიტუცია დაარღვია – მან, როგორც საკონსტიტუციო სასამართლოს მოსამართლემ, 16 ოქტომბერს მხარი დაუჭირა მმართველი პარტიის ინიციატივას საქართველოს პრეზიდენტის იმპიჩმენტზე.
ევა გოცირიძე საქართველოს საკონსტიტუციო სასამართლოს მოსამართლედ 2017 წლის პირველ დეკემბერს აირჩია პარლამენტმა – 90 ხმით.
მან, როგორც იუსტიციის უმაღლესი საბჭოს წევრმა, 2015 წლის 25 დეკემბერს მხარი დაუჭირა ლევან მურუსიძის სააპელაციო სასამართლოში არჩევას.
გირგვლიანის საქმის მოსამართლე ლევან მურუსიძე წელს აშშ-ის სახელმწიფო დეპარტამენტმა დაასანქცირა, როგორც „მნიშვნელოვან კორუფციულ საქმიანობაში ჩართული“ პირი.
2021 წლის შემდეგ, თითქმის ნახევარმილიონ ლარად ღირებული კომერციული ობიექტი დაამატა მოსამართლე ევა გოცირიძემ საკუთარი უძრავი ქონებების ჩამონათვალს. 150.4 კვ მეტრი კომერციული ფართობი დიღომში, ცამეტი ასურელი მამის ქუჩაზე, მას 450 223 ლარად შეუძენია. [წინა დეკლარაციის მიხედვით, ამ ქონების ფასი დოლარში აქვს მითითებული და წერს, რომ 141 960 დოლარი გადაიხადა].
დეკლარაციის მიხედვით, შეძენილი ფართობი მან იჯარით გასცა, თუმცა, როგორც თავად წერს, ხელშეკრულება დროზე ადრე შეუწყვიტეს, 2022 წლის თებერვალში. მოსამართლეს დეკლარაციაში მითითებული აქვს ასევე, რომ კომერციული ფართობი კრედიტით შეისყიდა.
ამავე, 2023 წლის დეკლარაციაში იძებნება ინფორმაცია მნიშვნელოვანი ფულადი საჩუქრის შესახებაც. საკონსტიტუციოს მოსამართლისთვის გასულ წელს 19 600 ევრო უჩუქებიათ. ქონებრივ დეკლარაციაში უთითებს, რომ საჩუქარი ოჯახის წევრისგან მიიღო, თუმცა კონკრეტულად ვინ აჩუქა ევა გოცირიძეს სოლიდური ფულადი თანხა, ეს არ ჩაუწერია.
ბოლო ქონებრივ დეკლარაციაში მოსამართლედ ოჯახის მხოლოდ ერთი წევრი – შვილი ჰყავს შეყვანილი. ამავე დეკლარაციის მიხედვით, 23 წლის გივი უგრეხელიძე არ მუშაობს და არც სხვა რაიმე შემოსავალი აქვს.
თითქმის ნახევარი მილიონი ლარის ღირებულების უძრავი ქონება ევა გოცირიძეს 2016 წელსაც შეუსყიდია. თბილისში, ილია ჭავჭავაძის გამზირზე, 223.75 კვ.მეტრ საცხოვრებელ ფართობში [ბინა] მას 227 111 დოლარი გადაუხდია.
მცირე ზომის ფართობი მას ადამ მიცკევიჩის ქუჩაზეც აქვს. ევა გოცირიძემ დეკლარაციაში შენიშვნის სახით ჩაწერა ასევე, რომ ზემოთ მითითებული ქონება სინამდვილეში 2000 წელს არის შეძენილი.
2014 წელს ევა გოცირიძეს მემკვიდრეობით მიუღია ბინა სან-ზონაში [71,86 ].
ამავე წელს მისთვის ასევე უჩუქებიათ 1300 კვ.მეტრი მიწის ნაკვეთი გარდაბანში, სოფელ თელეთში. როგორც 2022 წელს შევსებულ დეკლარაციაში მოსამართლე თავად მიუთითებს, ეს ნაკვეთი მან უსასყიდლოდ მიიღო სახელმწიფოსგან.
„აღნიშნული მიწის ნაკვეთი გადმომეცა სახელმწიფოსაგან უზენაესი სასამართლოს სხვა თანამშრომლებთან ერთად, აგარაკისთვის 1994-96 წლებში, საჯარო რეესტრში რეგისტრაცია მოხდა გვიან – რამდენიმე წლის შემდეგ“, – წერს ევა გოცირიძე.
2011 წელს კი მან თანამესაკუთრესთან, ოლან გოცირიძესთან ერთად მემკვიდრეობით მიიღო ასევე 3338 კვ.მეტრი ფართობი ამბროლაურში, სოფელ ხოტევში.
სესხის მომსახურებისთვის გასულ წელს ევა გოცირიძეს 40 974 დოლარი გადაუხდია. ამ ხარჯის გარდა გასულ წელს მოსამართლემ 8000 ლარი დახარჯა რემონტისთვის. წინა წელს შევსებულ დეკლარაციაში კი მან სარემონტო ხარჯის სახით 20 000 ლარი მიუთითა.
ამ ხარჯების პარალელურად ევა გოცირიძემ დანაზოგის შეგროვებაც მოახერხა. 2023 წლის იანვრის მდგომარეობით, როცა ქონებრივი დეკლარაცია შეავსო, მას დანაზოგის სახით 10 000 ევრო ჰქონდა. ლარის ანგარიშებზე კი – ჯამში 12 000-ზე მეტი ლარი. მან მიუთითა ასევე, რომ bank postal-ის ანაბარზე 21 000 ლარს ფლობს.
რაც შეეხება შემოსავლებს, ევა გოცირიძეს გასულ წელს შემოსავლის სახით 105 032 ლარი მიუღია, როგორც საკონსტიტუციო სასამართლოს მოსამართლეს, საპატრიარქოს უნივერსიტეტიდან კი მას ხელფასის სახით 30 360 ლარი აქვს მიღებული.
უფრო ადრე, 2014 წლიდან შევსებულ დეკლარაციებს თუ გადავხედავთ, ევა გოცირიძე ფლობდა ბინას საფრანგეთში, სტრასბურგში. ეს ბინა შემდეგი წლების დეკლარაციებში აღარ იძებნება, ისევე როგორც სხვა რამდენიმე ქონება. თუმცა მომდევნო დეკლარაციებში არც ამ ქონების გაყიდვით მიღებული შემოსავალია მითითებული.
2017 წლიდან 2021 წლის ჩათვლით შვილის, გაგი უგრეხელიძის სწავლისა და ქირის გადასახადის სახით გაღებულ ხარჯებში ევა გოცირიძემ 27 000 ევროზე მეტი მიუთითა. მისი წლიური ხარჯი სწავლის გადასახადისა და ბინის დაქირავებისთვის ერთ წელში დაახლოებით 7000 ან მეტი იყო. რამდენიმე დეკლარაციაში მითითებულია ისიც, რომ გაგი უგრეხელიძე სტიპენდიასაც იღებდა – 1800 ევროს.
2018 წლიდან დღემდე ევა გოცირიძეს რემონტისა და საოჯახო ნივთების შესაძენად 143 833 ლარი აქვს დახარჯული.
