გადარჩება შენობა ბათუმში, სადაც „მონანიების“ კადრები გადაიღეს? – რესტავრაცია დაიწყო

ბათუმში, ნინოშვილის #23-ში მდებარე კულტურული მემკვიდრეობის ძეგლში მესაკუთრემ სარემონტო სამუშაოები დაიწყო. ამ ეტაპზე შიდა სამუშაოებს ატარებენ. ადგილზე დასაქმებულების თქმით, შენობის ჭერი და კედლები მყარია.

გასულ წლებში აქ დიდი ხნის განმავლობაში კვლევითი ინსტიტუტი ფუნქციონირებდა. შემდეგ შენობა სხვა ქონებასთან ერთად მთავრობამ გაყიდა.

შენობისთვის იერ-სახის შენარჩუნებას დიდი მნიშვნელობა აქვს ქალაქისთვის, რომელმაც ბევრი ძეგლის სტატუსის მქონე შენობა უკვე დაკარგა. გარდა იმისა, რომ კულტურული მემკვიდრეობის ძეგლია, ამ  შენობის ეზოში გადაიღო თენგიზ აბულაძემ თავისი ერთ-ერთი ცნობილი ფილმის – „მონანიების“ კადრებიც.

ბათუმში, სამეცნიერო-კვლევითი ინსტიტუტის ეზოშია გადაღებული თენგიზ აბულაძის „მონანიების“ რამდენიმე სცენა, მათ შორის გულიკოს ცეკვა ვარლამის კუბოსთან.

ნიკო ბერძენიშვილის სახელობის სამეცნიერო კვლევითი ინსტიტუტის ადმინისტრაცია შენობიდან 2010 წლის ბოლოს გამოასახლეს. ვიდრე ქონებას გაყიდდნენ, აჭარის ფინანსთა და ეკონომიკის სამინისტროს ამ ინსტიტუტის პროფესორ-მასწავლებლებმა არაერთი წერილით მიმართეს. ისინი მინისტრს სთხოვდნენ შენობა ინსტიტუტისთვის დაეტოვებინა, თუმცა სამინისტრომ მათი თხოვნა არ გაითვალისწინა.

ბათუმი, ნინოშვილის #23

ბოლო წლებში შენობაში საქართველოს ეკონომიკისა და მდგრადი განვითარების სამინისტროს სსიპი – საზღვაო ტრანსპორტის სააგენტო ფუნქციონირებდა. შენობის ფასადისა და ეზოს ვიზუალის მიხედვით, წლებია ამ ძეგლს არავინ უვლიდა.

აჭარის კულტურული მემკვიდრეობის სააგენტოს ინფორმაციით, გაცემულია ძეგლის რეაბილიტაციის ნებართვა და მის იერ-სახეს შეინარჩუნებენ.

სააგენტოს ვებგვერდზე განთავსებული ინფორმაციით: „ორსართულიანი შენობა ნინოშვილისა და 26 მაისი ქუჩების გადაკვეთაზე აგებულია XX საუკუნის დასაწყისში. 1958-2011 წლებში მასში განთავსებული იყო ნ. ბერძენიშვილის სამეცნიერო-კვლევითი ინსტიტუტი. 2011 წელს შენობაში ბინა დაიდო ახალშექმნილმა საზღვაო ტრანსპორტის სააგენტომ.“

მთავარი ფასადით სახლი ნინოშვილის ქუჩაზე გადის. ის ქუჩიდან ცოტა მოშორებით, პატარა ეზოში დგას.

კულტურული მემკვიდრეობის ძეგლი- ბათუმი, ნინოშვილის #23

ფასადის მარჯვენა ბოლოში, კუთხეზე ირიბად არის მიდგმული თაღებით გახსნილი პორტიკი, რომლის თავზეც მეორე სართულის ღია ვერანდაა მოწყობილი.

სპეციალისტების შეფასებით: მთავარი ფასადი უხვად არის მორთული რენესანსულ-ბაროკული ეკლექტიზმის ელემენტებით. კედლის სიბრტყე შელესილია და ზედ თეთრი და ღია მწვანე ჰორიზონტალური ზოლებია დატანილი. ერთ-ერთი საუკეთესო შენობაა, გამორჩეული როგორც მხატვრული ჩანაფიქრით, ისე შესრულების მაღალი ხარისხით.

მიმდინარე სამუშაოები

ინტერიერი

მიმდინარე სამუშაოები

არანაკლებ საინტერესოა ძეგლის გადაყიდვის ისტორია.

ყოფილმა მესაკუთრემ შპს „Tam Geo“-მ ეს ქონება – ყოფილი ინსტიტუტის ორსართულიანი შენობა ბათუმის ბულვართან [513,3 კვ.მ.] და მასზე დამაგრებული ნაკვეთი [982 კვ.მ], ასევე რუსთაველის 30-ში მდებარე ნაკვეთი [3670 კვ.მ] 2012 წელს იყიდა პირდაპირი წესით. კომპანიამ ამ უძრავ ქონებაში 1,5 მილიონ აშშ დოლარი გადაიხადა.

2012 წელს შპს „Tam Geo“-მ  საკუთრებაში მიიღო 4 652 კვ.მეტრი მიწის ნაკვეთი ქალაქის ცენტრში და ძეგლის სტატუსის მქონე შენობა – მილიონ-ნახევრად. წლების შემდეგ ამ ქონების მხოლოდ ნაწილი [ნინოშვილის ქუჩაზე მდებარე შენობა და მასთან დაკავშირებული მიწა] 1 მილიონ 125 000 დოლარად გაყიდა [ეს საერთო ქონებაში გადახდილ ფასზე მხოლოდ 375 000 ლარით არის ნაკლები].

ახალი მფლობელი შპს „EVENTUS“- ია. კომპანიის 88 პროცენტს შპს „გუმბათი“ ფლობს, დარჩენილი 12 პროცენტი ნატო ჭანტურიას საკუთრებაა.

მეორე მიწის ნაკვეთი, სადაც კომპანია „ბაბილონ თაუერს“ აშენებდა და ვერ დაასრულა, ასევე სარფიანად გაიყიდა. შესაბამისად, შპს „Tam Geo“, რომელმაც ვალდებულება აიღო და ვერ შეასრულა, სახელმწიფოს ქონების ხარჯზე დიდი ფული გააკეთა.

გაწელილი პროცედურების, პირგასამტეხლოს დაკისრების, შემდეგ ჩამოწერა-პატიებასა და ხელშეკრულებით გათვალისწინებული პირობების მრავალჯერ განახლების მიუხედავად, Tam Geo-მ ამ პროექტის დასრულება ვერ შეძლო და მშენებარე პროექტი რუსთაველის ქუჩაზე თავისი მიწით 24 მილიონ 990 000 ლარად გაყიდა. შემძენი კომპანია „ემ სი ქონსთრაქშენია“.

ახალმა მფლობელმა აიღო ყველა ის ვალდებულება, რასაც ყოფილ მეპატრონეს, Tam Geo-ს აჭარის მთავრობასთან გაფორმებული ხელშეკრულება ავალდებულებდა. მშენებლობა ჯერ კიდევ არ დასრულებულა.