2024 წლიდან უმცროსი ექიმების, ექთნის თანაშემწეების, ბებიაქალებისა და სანიტრების შრომის ანაზღაურებაზე მინიმალური სახელფასო ზღვარი დაწესდება. ამ დროისთვის ქვეყნის მასშტაბით სანიტრების ხელფასი 120-დან 250 ლარამდე მერყეობს, ახალი რეგულაციით სანიტრის მინიმალური ხელფასი საათში 3 ლარით, ანუ თვეში 576 ლარით განისაზღვრა.
2023 წლიდან ჯანდაცვის სამინისტრომ სამედიცინო პერსონალის ნაწილისთვის, კერძოდ, ექიმებისა და ექთნებისთვის, საათობრივი მინიმალური ხელფასის ზღვარი დააწესა, თუმცა ცვლილება უმცროს და დამხმარე სამედიცინო პერსონალს არ შეხებია.
„სანიტრების ხელფასები კატასტროფულად დაბალია, განსაკუთრებით რეგიონებში. ერთ პოზიციაზე ხელფასი 145-180 ლარს შორის მერყეობს, გააჩნია, შვიდი ცვლა გექნება თვეში, თუ რვა; არ დაგავიწყდეთ, 24-საათიან ცვლებზეა საუბარი. თბილისშიც არ ულხინთ სანიტრებს, მათი ანაზღაურება 250 ლარამდეა, რაც საარსებო მინიმუმზე 0.80 თეთრით დაბალია“ – ამბობს ჯანდაცვისა და მომსახურების სფეროს პროფკავშირის – „სოლიდარობის ქსელის“ ხელმძღვანელი, რეზო კარანაძე.
ჯანდაცვის სამინისტროს ცნობით, სამედიცინო პერსონალის საათობრივი მინიმალური ანაზღაურება შემდეგი იქნება:
- სანიტარი – თვეში არანაკლებ 576 ლარი (საათში – 3 ლარი )
- ექთნის თანაშემწე – თვეში არანაკლებ 672 ლარი (საათში – 3,5 ლარი)
- ბებიაქალი – თვეში არანაკლებ 844 ლარი (საათში – 4,4 ლარი)
- უმცროსი ექიმი – თვეში არანაკლებ 960 ლარი (საათში – 5 ლარი)
*იგულისხმება დარიცხული და არა ხელზე ასაღები ხელფასი.
ამასთან ერთად ჩვენ კოლექტიური ბრძოლის შედეგად ის ვქენით, რომ ლანჩხუთის “მედალფაში” სიტუაცია გამოვასწორეთ, ფლაგმანივით იყო იქაური სანიტრების ამბავი, სხვა სანიტრები შემოგვიერთდნენ მერე. მთავრობა იძულებული შეიქმნა, რომ ეს რეფორმა გაავრცელოს სხვებზეც.
ჩვენ ამისთვის ვიბრძვით დიდი ხანია, თუმცა ეს არ არის საკმარისი. იმედი გვაქვს, 2025 წლიდან ექიმებისა და ექთნების ხელფასი კიდევ მოიმატებს და მერე მოჰყვება სხვა დანარჩენების ხელფასებიც. ამ მედპერსონალის არსებობა ძალიან მნიშვნელოვანია, მათ უწევთ ძალიან მძიმე შრომა და მათ უნდა ჰქონდეთ ღირსეული ანაზღაურება“.
რეზო კარანაძე ამბობს, რომ ეს ნამდვილად მნიშვნელოვანი ცვლილებაა, რაც განსაკუთრებით შესამჩნევი რეგიონში დასაქმებული მედპერსონალისთვის იქნება, თუმცა მისივე თქმით, ეს მატება მაინც არ არის საკმარისი არც საცხოვრებლად და არც იმისთვის, რომ შეაჩეროს ქვეყნიდან ამ პროფესიის ადამიანების შრომით მიგრანტებად გადინება:
„რა თქმა უნდა, ჩვენ არ ვართ კმაყოფილი. ეს ნამდვილად არ არის ახლოს საცხოვრებელ ხელფასთან, 2022 წლის მონაცემებით საცხოვრებელი ხელფასი დაანგარიშებულია, რომ არის 1770 ლარი; 2023 წლის ბოლოს, იანვარში ან დეკემბერში რიცხვი შეიცვლება და ჩვენ უკვე გვეცოდინება ამ მხრივ ახალი რეალობა, ჩვენი ვარაუდით 2100 ლარამდეა საცხოვრებელი ხელფასის მინიმუმი, ანუ ხელფასი რომლითაც შეიძლება იცხოვრო ადამიანმა, არა თუ საარსებო მინიმუმი, რომელიც 250 ლარია – წარმოუდგენელია, როგორ შეიძლება ამ თანხით დღეს საქართველოში იარსებოს ადამიანმა თვიდან თვემდე“.
ახალი რეგულაციით, ხელფასის ზრდა 6000-მდე პირს შეეხება. შედეგად, მინიმალური ხელფასის დაწესების რეფორმა სტაციონარულ განყოფილებაში ჩართულ ყველა სამედიცინო პერსონალზე აისახება.
რეფორმის შედეგად, საყოველთაო ჯანდაცვის პროგრამაში სტაციონარული კომპონენტით ჩართული ყველა კლინიკა ვალდებული იქნება, სამედიცინო პერსონალის სახელფასო ანაზღაურება ჯანდაცვის სამინისტროს მიერ წარმოდგენილი, მინიმალური ზღვრის გათვალისწინებით დაადგინოს.
პროცესს მონიტორინგს შრომის ინსპექციის სამსახური გაუწევს.
