ბათუმში, ევროპის მოედანზე, სარეაბილიტაციო სამუშაოები კანონდარღვევით მიმდინარეობს.
ქალაქის ტურისტულად ერთ-ერთი ყველაზე დატვირთული ადგილი ორ კვირაზე მეტია პერიოდულად მტვრის ბუღში ეხვევა.
კომპანია, რომელმაც თითქმის მილიონ ნახევრიანი ტენდერი მოიგო, ღია სივრცეში სარემონტო სამუშაოების წარმოების წესებს არღვევს. კერძოდ, საწარმოს ნაცვლად ფილებს ევროპის მოედანზე ამუშავებენ.
ევროპის მოედანზე სარეაბილიტაციო სამუშაოებზე ტენდერი საქალაქო ინფრასტრუქტურისა და კეთილმოწყობის სამმართველომ გამოაცხადა.
სამუშაოებს კომპანია „მონოლითი 2005“ ასრულებს. ხელშეკრულების თანახმად, რომელიც საქალაქო ინფრასტრუქტურისა და კეთილმოწყობის სამმართველოსა და „მონოლითი 2005“-ს შორის გაფორმდა, კომპანიამ ბათუმში ორ ობიექტზე უნდა ჩაატაროს სარეაბილიტაციო სამუშაოები – ევროპის მოედანზე და აკაკი წერეთლის სკვერში. ხელშეკრულების საერთო ღირებულება 1 444 441 ლარს შეადგენს.
მოქმედი კანონმდებლობის თანახმად, ღია სივრცეში სარემონტო სამუშაოების წარმოება საქართველოს ადმინისტრაციულ სამართალდარღვევათა კოდექსით რეგულირდება. კერძოდ, 152 პრიმა 5 მუხლით.
კანონის თანახმად, ამტვერებადი მასალის სველი მეთოდის გარეშე დამუშავება (დაჭრა, დაფქვა, დახერხვა, დაქუცმაცება და სხვა), რაც მტვერჩახშობას ვერ უზრუნველყოფს, გამოიწვევს ფიზიკური პირის დაჯარიმებას 500 ლარის ოდენობით, ხოლო იურიდიული პირის დაჯარიმებას − 1 000 ლარის ოდენობით.
თუ პირი ან კომპანია იგივე ქმედებას განმეორებით ჩაიდენს, ფიზიკური პირი დაჯარიმდება 1 000 ლარით, ხოლო იურიდიული პირი − 2 000 ლარით.
„ბათუმელები“ კომენტარისთვის დაუკავშირდა ბათუმის საქალაქო ინფრასტრუქტურისა და კეთილმოწყობის სამმართველოს.
დავინტერესდით, ზედამხედველობდა თუ არა საქალაქო სამსახური ტენდერში გამარჯვებულ კომპანიის მიერ შესრულებულ სამუშაოებს, თუმცა ბათუმის მერიის დაქვემდებარებაში მყოფი სამსახურიდან პასუხი ჯერჯერობით პასუხი ვერ მივიღეთ.
„ბათუმელები“ ასევე დაუკავშირდა გარემოსდაცვითი ზედამხედველობის დეპარტამენტს, სადაც გვითხრეს, რომ დარღვევის შესახებ მათთან შეტყობინება არ შესულა. ამასთან, 152-ის მეხუთე პრიმა მუხლით გათვალისწინებული ჯარიმის გამოწერის უფლება მუნიციპალიტეტს აქვს.
„ბათუმელები“ დაუკავშირდა ბათუმის მუნიციპალურ ინსპექციასაც, რომელიც საზედამხედველო ფუნქციას ითავსებს. მუნიციპალური ინსპექციიდან ამ დრომდე კომენტარი არ მიგვიღია. იმ შემთხვევაში, თუკი რომელიმე უწყება კომენტარს გააკეთებს, ის მასალაში აისახება.
რაც შეეხება თავად კომპანიას, „მონოლითი 2005“-ის დირექტორი მერაბ დოლიძე ადასტურებს, რომ ევროპის მოედანზე ფილები მშრალი წესით იჭრებოდა.
„გამოვასწორეთ უკვე, ხვალიდან აღარ იქნება ეგრე,“ – გვითხრა მერაბ დოლიძემ. კითხვაზე, აქამდე რატომ ხდებოდა, მერაბ დოლიძემ გვიპასუხა:
„თვითონ ფილა და გრანიტი ისეთია, რომ ადგილზე უნდა მოარგო. ეს წყლით საჭრელი რაც არის, იმას ვერ მოიხმარ, ეს არის დაზგა. რესტავრაციის დროს ხდება ცოტა დამტვერიანება. ვერაფერი ვერ მოვუხერხეთ სხვანაირად“.
ეს არ არის პირველი შემთხვევა, როდესაც „მონოლითი 2005“ სამუშაოებს დარღვევით აწარმოებს. მსგავსი შემთხვევა იყო გასულ თვეშიც. „მონოლითი 2005“ სამუშაოებს ასრულებდა ბათუმის ბულვარშიც. კომპანია ფილებს მაშინაც მშრალი წესით ამუშავებდა.
ამავე თემაზე:
