ქობულეთში ზღვისპირა ზოლის 1,4-კილომეტრიანი მონაკვეთის რეაბილიტაციაა დაგეგმილი, რაზეც მერიამ ტენდერი 10,9 მილიონი ლარით გამოაცხადა.
ტენდერის ფარგლებში სანაპირო ზოლის, ზღვისპირა პარკის მოწყობის სამუშაოებია დაგეგმილი.
სარეაბილიტაციო სამუშაოები სანაპიროზე, დავით აღმაშენებლის გამზირის 301-ის მიმდებარე ტერიტორიიდან დაიწყება და ფიჭვნარში, აღმაშენებლის გამზირის 375ბ-ს მიმდებარედ დასრულდება.
რაც შეეხება აღმაშენებლის გამზირის 375ბ-დან მდინარე ჩოლოქის მიმართულებით პლაჟს, ქობულეთის მერიაში გვითხრეს, რომ ამ მონაკვეთის კეთილმოწყობა ჯერჯერობით მხოლოდ იდეის დონეზე განიხილება. ფიჭვნარში ამ მონაკვეთის სიგრძე კი [მდინარე ჩოლოქის შესართავამდე], დაახლოებით 3,5 კილომეტრია.
ქობულეთის მერიის მიერ 10 მილიონ 959 ათასი ლარით გამოცხადებულ ტენდერში წინადადებების მიღება 2023 წლის 26 ოქტომბერს დაიწყება და 31 ოქტომბერს დასრულდება.
პირობის მიხედვით, სამუშაოები ტენდერში გამარჯვებულთან ხელშეკრულების დადების მომდევნო დღიდან უნდა დაიწყოს და 510 დღეში დასრულდეს.
ქობულეთი / სარეაბილიტაციო ტერიტორიის არსებული მდგომარეობა და რენდერები პროექტიდან
პროექტის მიხედვით, სარეაბილიტაციო ტერიტორია მოიცავს დაახლოებით 47 193 კვადრატული მეტრი ფართობის, 1 400 მეტრი სიგრძის ზოლს. არსებულ ტერიტორიაზე გადის მეორეხარისხოვანი ქუჩა და მას აქვს ცენტრალურ ქუჩაზე რამდენიმე გასასვლელი, როგორც საფეხმავლო, ასევე სამანქანო გზა.
გათვალისწინებულია ტერიტორიის სრულად ათვისება და ახალი სამანქანო და საფეხმავლო გზისა და ბილიკის მოწყობა, რისთვისაც არსებულ სამანქანო გზაზე დაგებული ბეტონის დეკორატიული ფილების, ბორდიურების, ბეტონის ფილების, გარე განათების ლამპიონებისა და არსებული ცოკოლის დემონტაჟი მოხდება.
პროექტით დაგეგმილი სამუშაოები:
- „მოეწყობა ახალი სამანქანო გზა ბეტონის ვიბროდაწნეხილი დეკორატიული ფილებით, საფეხმავლო ბილიკები რკ/ბეტონის ფილაზე დაგებული ბეტონის ვიბროდაწნეხილი დეკორატიული ფილებით, გამწვანებული სივრცეები;
- გათვალისწინებულია არსებული ნაპირსამაგრი კედლის რეაბილიტაცია (მოპირკეთება). ტერიტორიაზე მოეწყობა ახალი კიბეები ლითონის მოაჯირებით და პანდუსები შშმ პირთათვის;
- სამანქანო გზიდან გამოყოფილად მოეწყობა საფეხმავლო ბილიკი, მოსასვენებელი სივრცეები სკამებითა და სანაგვე ურნებით;
- საპროექტო ტერიტორიის სრულ სიგრძეზე მოეწყობა ველობილიკი, ველოპარკინგი დასაჯდომი სივრცით, წყლის დასალევი შადრევანი.
- საპროექტო სანაპირო ზოლზე მოეწყობა სრულიად ახალი სივრცე „ზღვისპირა პარკი“/„ბულვარი“, რომელიც გამოყოფილი იქნება სამანქანო გზიდან რკ/ბეტონის ცოკოლით, დონეთა სხვაობის გამო მოეწყობა კიბეები და პანდუსები;
- „ზღვისპირა პარკის“ ნაწილში მოეწყობა გამწვანებული სივრცეები, მოსასვენებელი სივრცეები სხვადასხვა სახის დეკორატიული სკამებით, სანაგვე ურნებით, დეკორატიული პერგოლებით, საბავშვო გასართობი და სავარჯიშო სივრცეებით, ასევე ტერიტორიაზე განთავსდება სხვადასხვა დეკორატიული ქანდაკებები;
- საფეხმავლო ნაწილში ასევე მოეწყობა უსინათლოთა ბილიკი ბეტონის „ტაქტილური“ ფილებით. „ზღვისპირა პარკის“ ნაწილი ზღვის მხრიდან გამოყოფილია რკ/ბეტონის კედლით;
- ტერიტორიაზე ასევე მოეწყობა გარე განათების დეკორატიული ლამპიონები, დეკორატიულ სკამებისა და პერგოლების განათება მოხდება ლენტური დიოდური სანათით. ტერიტორია სრულად გამწვანდება.“
შესრულებული სამუშაოების საგარანტიო ვადა 5 წელია და მიმწოდებელი პასუხს აგებს საგარანტიო ვადის ფარგლებში ობიექტის შეუფერხებელ ფუნქციონირებაზე. თუ საგარანტიო ვადის განმავლობაში აღმოჩნდება ობიექტის ნორმალური ექსპლუატაციისათვის ხელის შემშლელი ნაკლი, მიმწოდებელი ვალდებულებას იღებს საკუთარი ხარჯით აღმოფხვრას ნაკლი შემსყიდველის მიერ მითითებულ ვადაში.
პრეტენდენტს 2020 წლის პირველი იანვრიდან წინამდებარე ტენდერის გამოცხადების დღემდე პერიოდში შესრულებული უნდა ჰქონდეს ანალოგიური ხასიათის, სირთულისა და შინაარსის, არანაკლებ 20 მილიონი ლარის ღირებულების პარკის ან/და სკვერის ან/და ბულვარის ან/და მოსასვენებელი სივრცის კეთილმოწყობის სამუშაოები. მათ შორის ერთი ხელშეკრულების ფარგლებში არანაკლებ 4 მილიონი ლარის სამუშაოები.
ტენდერის მიხედვით სამუშაოები სრულად დაფინანსდება აჭარის ბიუჯეტიდან.
აღნიშნული ტენდერის ფარგლებში რეაბილიტირებული 1,4 კილომეტრი მონაკვეთის შემდეგ ქობულეთს მდინარე კინტრიშის შესართავიდან ფიჭვნარამდე მონაკვეთში 8 კილომეტრზე მეტი სიგრძის კეთილმოწყობილი ზღვისპირა ზოლი ექნება – ბილიკებით, გამწვანებით და სხვა საპლაჟე ინფრასტრუქტურით.
თუმცა, ქობულეთის სანაპირო ერთ-ერთი ავარიული უბანია აჭარაში.
ის კი, თუ რა ხდება ქობულეთში, უკვე რეაბილიტირებულ ზოლში, შეგიძლიათ ნახოთ ამ ბმულზე:
უკანონო კაფე ქობულეთის პლაჟზე მერიასთან ახლოს – როგორ მუშაობენ მუნიციპალიტეტში
