ბათუმში დღეს, 8 ოქტომბერს, აქცია გაიმართა, რომლის მონაწილეებმა გააპროტესტეს პარლამენტის მიერ დამტკიცებული კანონი კარვების შეზღუდვასთან დაკავშირებით. აქციის მონაწილეთა ერთ-ერთი მოთხოვნა იყო იმ პოლიციელების დასჯა, „რომლებიც ძალადობენ მოქალაქეებზე და ბოროტად სარგებლობენ თავიანთი უფლებამოსილებით“; ასევე, ქვეყანაში დამოუკიდებელი სასამართლოს ჩამოყალიბება.
აქცია ბათუმში / 8.10.2023
თავდაპირველად აქციის მონაწილეები ბათუმის საქალაქო სასამართლოსთან შეიკრიბნენ და მსვლელობით გადაინაცვლეს ჯერ აჭარის უმაღლესი საბჭოს, შემდეგ კი – სპეციალური საგამოძიებო სამსახურის შენობასთან.
„აქ ვარ, რადგან თავად ვარ ზონდერი პოლიციელებისგან დაზარალებული, ნაწამები და სიკვდილისპირას მიყვანილი. ეს ჩაიდინა ხელვაჩაურის პოლიციამ იმის გამო, რომ ვამხილეთ მერი და მისი დამცველი დეპუტატები, რის გამოც მე და ჩემი მეგობარი დაგვაკავეს. ვუერთდებით დღევანდელ ამ პროტესტს ჩვენც და ყველა აქ უნდა იყოს.
სასამართლოსთან ვიყავით პირველად იმიტომ, რომ შეკერილი თუ ჩადებული საქმეების ბოლო კვანძი, რომელიც ამ ქმედებების გამართლებას ახორციელებს, სასამართლოა და გვინდა, რომ სასამართლო იყოს ობიექტური და სამართლიანი“, – გვითხრა აქციის მონაწილემ, თორნიკე ქავთარაძემ.
აქცია ბათუმში / 8.10.2023
„ჩემი პროტესტია, რომ უკანონოდ მეზღუდება საადვოკატო საქმიანობის უფლება. მოგეხსენებათ, დაცვის უფლება კონსტიტუციითაა გარანტირებული და ნებისმიერ მოქალაქეს აქვს უფლება, აირჩიოს ადვოკატი.
ვაპროტესტებთ კანონს კარვების შესახებ, რადგან ნებისმიერ მოქალაქეს აქვს პროტესტის გამოთქმის უფლება კარვით თუ სხვა სახით [რა თქმა უნდა, კანონის ჩარჩოში] და ამ კანონით იზღუდება საქართველოს მოქალაქეების პროტესტის უფლება. მოვითხოვთ, დამნაშავე პოლიციელების დასჯას, რომლებიც ძალადობენ მოქალაქეებზე და იყენებენ მათ უფლებამოსილებას ბოროტად.
ყველა მიღებული უსამართლო კანონი იმის წინაპირობაა, რომ შემდგომში უარესი და კიდევ უფრო უსამართლო კანონი მიიღონ. თუ ჩვენ ახლა ამას არ გავაპროტესტებთ, ხვალ კიდევ უფრო შეზღუდავენ ჩვენს უფლებებს. ეს იქნება პროფესიული საქმიანობის უფლება თუ სხვა“, – გვითხრა ზაზა პაპიძემ, რომელმაც რამდენჯერმე სიტყვითაც მიმართა აქციის მონაწილეებს.
აქციის მონაწილეები ბათუმში, სპეციალური საგამოძიებო სამსახურის ოფისთან / 8.10.2023
„ეს ადამიანები აპროტესტებენ იმას, რომ საქართველოში ბოლო პერიოდში ხელისუფლება უფრო ხშირად და ადვილად ახერხებს დემოკრატიული საზოგადოების საქმიანობის ჩახშობას და ეს არ უნდა მოხდეს“, – განაცხადა აქციაზე თამაზ ბაკურიძემ, ორგანიზაცია „ჩვენი უფლებებისთვის“ ხელმძღვანელმა.
