1000 სტატუსშეჩერებული სტუდენტიდან, ბათუმის რუსთაველის სახელმწიფო უნივერსიტეტს სტატუსის აღდგენაზე ჯერჯერობით მხოლოდ 108 სტუდენტმა მიმართა.
როგორც უნივერსიტეტის ადმინისტრაციაში „ბათუმელებს“ უთხრეს, არც ჰქონდათ იმის მოლოდინი, რომ სტატუსის აღდგენას ყველა სტუდენტი მოინდომებდა.
რაზე შეთანხმდა ბსუ სახელმწიფოსთან? – ამ თემაზე უნივერსიტეტის კანცლერს, მერაბ დიასამიძეს ვესაუბრეთ.
- ბატონო მერაბ, როგორც ვიცით, მთავრობამ უმაღლეს სასწავლებლებს დაგავალათ სტატუსშეჩერებული სტუდენტებისთვის სწავლის საფასურის განულება. რაზე შეთანხმდით საბოლოოდ მთავრობასთან – ეს ვალი დაიფარება ბიუჯეტიდან, თუ, უბრალოდ, თქვენ უნდა გაანულოთ?
ის მემორანდუმი, რომელიც უნივერსიტეტებთან გაფორმდა, არ ითვალისწინებს თანხის გადახდას. თუმცა ჩვენ სტუდენტებს არაფერს ვთხოვთ, მათ გაუნულდებათ ყველა ფინანსური დავალიანება. ეს პროცედურა დავიწყეთ, ოღონდ ასეთი დათქმით, რომ სტუდენტს სტატუსის აღდგენა არ შეეძლება მანამ, სანამ მიმდინარე სემესტრის სწავლის საფასურის 40%-ს მაინც არ გადაიხდის.
მთავრობის ინიციატივას მხარი რომ ავუბათ, ჩვენი შიდა რეგულაციებით, წინა კვირას მივმართეთ წარმომადგენლობით საბჭოს, რომ ერთჯერადად მოეცათ უფლება, ფინანსური დავალიანების სტატუსის მქონე სტუდენტებიც აღგვედგინა და მიგვეცა მათთვის სასწავლო პროცესში ჩართვის უფლება.
სახელმწიფოსთან კი შევთანხმდებით იმაზე, რომ განათლების სამინისტრო, ფინანსთა სამინისტროსთან ერთად შეიმუშავებს იმ რეგულაციებს, რაც უნივერსიტეტებს დაეხმარება სტუდენტებისთვის ვალის განულებაში. ამას სჭირდება სამართლებრივი ბაზა.
- ეს რეგულაციები ჯერ არ არსებობს?
დღე-დღეზე მივიღებთ ამ რეგულაციებს. თუმცა შეთანხმება არსებობს მემორანდუმის სახით, რომელსაც აწერენ ხელს უნივერსიტეტის რექტორები.
- რამდენ სტუდენტს აქვს ამ დროისთვის სწავლის საფასურის დავალიანება?
1800 სტუდენტს აქვს მთლიანობაში სტატუსი შეჩერებული, თუმცა სწავლის საფასურის დავალიანება აქვს მხოლოდ ათას სტუდენტს, 1 ლარიდან 3 ათას ლარამდე.
თუმცა არიან კეთილსინდისიერი გადამხდელებიც, რომლებიც აკადემიურ შვებულებაში გავიდნენ იმის გამო, რომ ვერ იხდიდნენ სწავლის საფასურს.
- ამ ათასიდან რამდენმა სტუდენტმა გამოთქვა სწავლის გაგრძელების სურვილი?
დღევანდელი ანუ 3 ოქტომბრის მონაცემებით, 108 სტუდენტმა მოგვმართა სტატუსის აღდგენაზე. სტუდენტებს ხვალ დღის ბოლომდე შეუძლიათ განცხადებების შემოტანა. შემდეგ უკვე ვეღარავინ დაემატება.
- ამ ათასიდან ყველას რომ გამოეთქვა დაბრუნების სურვილი, შეძლებდა უნივერსიტეტი მათ მიღებას?
ჩვენ არც გვქონდა იმის მოლოდინი, რომ ყველა სტატუსშეჩერებული სტუდენტი დაბრუნდებოდა. არც ახლა ველით.
- ფაქტია, რომ სურვილის შემთხვევაში ყველა სტუდენტი ვერ დაბრუნდებოდა, რადგან ბსუ-ს ხომ არ აქვს ავტორიზაციით ამდენი კვოტა მინიჭებული?
ჩვენ 8 ათასი სტუდენტის მიღების საშუალება გვაქვს. ამ ეტაპზე, აქტიური სტატუსი დაახლოებით 7 350 სტუდენტს აქვს. ესე იგი, 650 ადგილი თავისუფალი გვაქვს და შეგვიძლია ამ რაოდენობის სტუდენტების მიღება. განაცხადი კი 108 პირს აქვს შემოტანილი. ხვალამდე ეს რიცხვი შესაძლოა უმნიშვნელოდ გაიზარდოს.
თუმცა, თუ უფრო მეტი მოინდომებდა, ეს მემორანდუმი ითვალისწინებს იმას, რომ სახელმწიფო, ამ შემთხვევაში განათლების სამინისტრო, უზრუნველყოფდა კვოტების გაზრდას.
- თუმცა ვიცით, რომ კვოტებს ავტორიზაციის საბჭო განსაზღვრავს და არა სამინისტრო.
მომავალ წელს გვაქვს გეგმური ავტორიზაცია და ჩვენ ათი ათას სტუდენტზე უნდა წარვადგინოთ განაცხადი.
- გასაგებია, მაგრამ ეს იქნება მომავალ წელს და არა ახლა, როცა მთავრობამ დაგავალათ ვალების განულება.
გასაგებია, დოკუმენტურად არ გვაქვს დღეს ეს კვოტა, მაგრამ მემორანდუმში წერია, რომ სახელმწიფო იღებს ვალდებულებას უნივერსიტეტებისთვის გაზარდოს კვოტა და ეს მარტივად შეიძლება. უნივერსიტეტმა შეიძლება დაჩქარებული წესით მიმართოს ავტორიზაციის საბჭოს და უთხრას, რომ გვაქვს ახალი კორპუსი, შეაფასეთ და დაგვიმატეთ კვოტები. ესეც ერთ-ერთი გზაა, პირობითად.
- რა ფინანსური ზიანი მიადგა ვალების განულებით ბსუ-ს, შეგიძლიათ გვითხრათ. თქვენ ხომ რესურსები დახარჯეთ ამ წლებში?
ამ შემთხვევაში, ჩვენ პოზიტიურად რომ შევხედოთ, ეს არის გაცოცხლებული შემოსავალი უნივერსიტეტისთვის.
ზარალს რაც შეეხება, ინფრასტრუქტურულ ნაწილში, მაგალითად ბოლო ათი წლის განმავლობაში, უნივერსიტეტს საკუთარი ბიუჯეტიდან სადღაც 10-15 პროცენტი თუ ექნება დახარჯული, დანარჩენი მაინც ბიუჯეტიდან ფინანსდება.
თითქმის ასევეა სასწავლო რესურსებშიც.
- ხომ არ გაქვთ მოკვლეული, სად არიან ის სტუდენტები, ვინც ვალის განულების შემთხვევაშიც ვერ ახერხებს სწავლის გაგრძელებას. როგორ პირობებში ცხოვრობენ ან ხომ არ დაუტოვებიათ ქვეყანა?
ჩვენ არ გვაქვს ამის რესურსი, რომ ეს ინფორმაცია მოვიძიოთ. ამის გარკვევა არც არის უნივერსიტეტის კომპეტენცია, ვკითხო სტუდენტს აპირებს თუ არა დაბრუნებას.
- მაშინ როგორ აპირებთ იმ დავალიანების ამოღებას, რომელიც ვთქვათ სტატუსის შეწყვეტის შემთხვევაში ექნება სტუდენტს, თუკი არ იცით არაფერი მათი მდგომარეობის შესახებ?
ახლა ჩვენ რასაც ვაკეთებთ, ვაკეთებთ იმას, რომ იმ სტუდენტებს, ვისაც აქვს სწავლის სურვილი, პროცესებს რომ არ ჩამორჩეს, მომართვის შემთხვევაში აღვუდგენთ სტატუსს დღესვე.
ვინც არ აღიდგენს სტატუსს, მაგრამ აქვს დავალიანება და წლების შემდეგ, თუკი ამის გამო შეუწყდებათ სტატუსი, ჩვენ სასამართლოს წესით მაინც ამოვიღებთ ამ ვალს.
რაც შეეხება სტატუსაღდგენილ სტუდენტებს, მათთან ახალი ხელშეკრულება 9-10 ოქტომბერს უნდა გაფორმდეს.
