29 სექტემბერს ქობულეთის საკრებულომ ორი განაშენიანების გეგმა დაამტკიცა. ორივე ზღვის სანაპირო ზოლში მასშტაბური პროექტის მშენებლობას ითვალისწინებს.
ქობულეთში მუნიციპალური ავტობუსებისთვის რამდენიმე მიმართულება დაამატეს და ფასიც განსაზღვრეს. გარდა ამისა ქობულეთის საკრებულომ მხარი დაუჭირა რამდენიმე მცირე ზომის ნაკვეთის საიჯარო წესით გასხვისებისა და პოპოვის ქუჩისთვის სახელის გადარქმევის საკითხს.
გარდა დღის წესრიგით გათვალისწინებული საკითხებისა ოპოზიციამ კიდევ რამდენიმე საკითხზე მოითხოვა ყურადღების გამახვილება.
საკრებულოს „ერთიანი ნაციონალური მოძრაობის“ [ენმ] ფრაქციის თავმჯდომარემ ლაშა კომახიძემ კოლეგებს ორგანიზაცია „გამჭვირვალობა საქართველოს“ კვლევა და რეკომენდაციები შეახსენა:
„ეს კორუფციაა, ორგანიზაცია რეკომენდაციას გვაძლევს ყურადღება გავამახვილოთ ამაზე და ამას მხოლოდ მე არ მთხოვს, თქვენც გთხოვთ. გარდა ამისა, ისეთი ნიუსი ჰქონდათ ქობულეთის წყალში ხელფასებთან დაკავშირებით, რომ თავი აღარ გამოგვეყოფა. ამ თემებთან დაკავშირებით ვინმემ პოლიტიკური პასუხისმგებლობა უნდა აიღოს“ – განაცხადა მან სხდომაზე.
საკრებულოს თავმჯდომარემ, დავით მჭედლიშვილმა, მას უპასუხა, ხელფასების ავანსად გაცემასთან დაკავშირებით გამოძიება დაწყებულია, ვერ ჩავერევით და რაც შეეხება შპს „ლეგის, თუ კომპანია ტენდერებს იგებს, ჩვენ რა ვქნათო.
საუბარია კომპანიაზე, რომელმაც აჭარის მთავრობისგან 1 ლარად მიიღო ქობულეთის მუნიციპალიტეტის სოფელ ხუცუბანში მდებარე 32,382 კვ.მ. მიწის ნაკვეთი.
სხდომაზე ოპოზიციამ დააყენა სტიქიით დაზარალებული მოსახლეობისთვის ზიანის ანაზღაურების საკითხი. ოპოზიციის განცხადებით, მერი იმყოფებოდა ადგილზე და თქვა, რომ ზიანს შეისწავლიდნენ. ზიანი შეისწავლეს და ამით ყველაფერი დასრულდა.
„ეს ხალხი ელოდება პასუხს, დავეხმარებით თუ წავიდეს ისევ ბანკში სესხის ასაღებად“ – განაცხადა ოპოზიციამ.
ქობულეთის საკრებულოს სხდომა
სხდომაზე დაამტკიცეს მუნიციპალური ავტოტრანსპორტის მოძრაობის ახალი მიმართულებებიც. კერძოდ: დაბა ოჩხამურის, სოფელი სამებისა და ქვედა სამების მიმართულებები.
საკრებულოს წევრმა „ერთიანი ნაციონალური მოძრაობიდან“, იამზე ცალქალამანიძემ აღნიშნა, ორივე ხელი ავწიე, მხარს გიჭერთ, მაგრამ იმედი მაქვს, ისეთი ავტობუსი არ იქნება, მაგასაც მიწოლა დასჭირდესო. მას დაჰპირდნენ, რომ არ დასჭირდება.
29 სექტემბრის სხდომაზე საკრებულოს თავმჯდომარემ ერთი მხრივ ხაზი გაუსვა, რომ საჭიროა კამათი და ამიტომაც არ უნდა იყოს პოზიცია ბოიკოტის რეჟიმში, განსაკუთრებით კი ბიუჯეტის განხილვის დროს, თუმცა, მეორე მხრივ ის ცდილობდა საკითხების განხილვა დიდხანს არ გაგრძელებულიყო სხდომაზე და მითუმეტეს – არ გადასულიყო კამათში.
საკრებულომ ქობულეთში პოპოვის ქუჩას სახელი მოსახლეობის თხოვნით შეუცვალა და მას ფადიკო გოგიტიძის სახელი უწოდა.
სხდომაზე დამტკიცებული გენგეგმების შესახებ „ბათუმელები“ ვრცელ მასალებს შემდეგ კვირაში გამოაქვეყნებს.
ქობულეთის მერიისა და საკრებულოს შენობის ფოიე – მიმდინარე რემონტი
