ჰიგრომა ე.წ. ცრუ თიაქარია, რომელიც ძირითადად სახსრების მიდამოში ვითარდება და ხელითაც ისინჯება. ეს არ არის ავთვისებიანი წარმონაქმნი, თუმცა “ბათუმის სამედიცინო ცენტრის” პლასტიკურ-რეკონსტრუქციული ქირურგი, შალვა გლახოშვილი ამბობს, რომ ჰიგრომა მკურნალობას მაინც საჭიროებს, რადგან დისკომფორტის გარდა, შესაძლოა რიგ შემთხვევებში ანთებითი პროცესისა და ტკივილების მიზეზი გახდეს.
- ბატონო შალვა, როგორ ჩნდება ჰიგრომა?
მისი მიზეზი ძირითადად ტრავმებია, მათ შორის მიკრო-ტრავმები.
ამ დროს ზიანდება სასახსრე ჩანთა და შემდეგ ვითარდება ცრუ თიაქარი, რომელიც შემოიფარგლება გარშემო ქსოვილებით, შიგნით არის სასახსრე, ერთგვარ ჟელესებრ სითხე.
ხელით შეგრძნების დონეზე ეს არის მომრგვალო, რბილი, მცირედით/ნაკლებად მოძრავი წარმონაქმნი, რომელიც ხელით დაჭერისას იჩუტება, მაგრამ მერე ისევ იზრდება.
- სად ლოკალიზდება უმეტესად?
ძირითადად სახსრების მიდამოში ვითარდება, შეიძლება იყოს წვივ-მაჯა, იდაყვის სახსარი, პატარა წვრილი სახსრები მაგალითად თითების, ანუ სახსროვანი პრობლემაა უფრო.
- ტკივილი ახასიათებს?
თუ ეს ჰიგრომა ისეთ ადგილზეა ლოკალიზებული, რომ კომპრესიას ახდენს, ანუ აწვება ნერვიულ დაბოლოებაზე, მაშინ შეიძლება ტკივილიც ახლდეს, სხვა შემთხვევაში არ არის მტკივნეული.
- როგორია მკურნალობა?
მკურნალობის ორი გზა არსებობს. შეიძლება ამ სასახსრე სითხის ევაკუაცია [ამოღება] მოხდეს ექოსკოპიის კონტროლის ქვეშ, რის შემდეგაც საჭიროა ცოტა ხანი კომპრესია [დაჭერა], სასახსრე ჩანთა რომ დანაწიბურდეს, ანუ შეხორცდეს. მაგრამ, თუ ქირურგიული გზით არ მოვაშორებთ მას, არის რეციდივის რისკი.
ამიტომაც, ძირითადად მაინც ისევ ქირურგიულ ჩარევას მივმართავთ, რა დროსაც ხდება ამ სითხის ევაკუაცია ქირურგიულად და სასახსრე ჩანთის პლასტიკა.
- გართულება რა შეიძლება მოჰყვეს?
შეიძლება გასკდეს სპონტანურად და გააჩნია სად ჩაიღვრება. თუ ეს დიდი სახსარია, სითხის ჩაღვრის შემდეგ ანთებითი პროცესი მიდის და იწყება ძლიერი ტკივილები.
მაგრამ ასეთ დროს – გასკდომისას, რეციდივი ხდება. ქირურგიული ჩარევის გარეშე გამეორება ძალიან ხშირია, ქირურგიული ჩარევის შემთხვევაშიც არის პატარა შანსი, რომ მოხდეს რეციდივი.
