ბათუმის ქუჩების რეაბილიტაციისთვის ყოველწლიურად ბიუჯეტიდან მილიონობით ლარი იხარჯება. მიმდინარე პროექტები ველობილიკების მოწყობას არ ითვალისწინებს, მაშინ, როცა ქალაქის ველოსტრატეგია უკვე დამტკიცებულია.
მომავალში ველო-ქსელის მოწყობისას, რეაბილიტირებული ქუჩები ხელახლა უნდა გათხარონ, რომ ველობილიკები მოაწყონ? – ვკითხეთ მერიის შესაბამის სამსახურს, თუმცა პასუხი არ მიგვიღია.
არასამთავრობო ორგანიზაცია „love to ride – Batumi“-ის დამფუძნებელი, ანა ნიქაბაძე გეგმის განხორციელებას ეჭვქვეშ აყენებს. მისი თქმით, მერია ველოგადაადგილების გეგმის გვერდის ავლით მოქმედებს, როცა ახალ ინფრასტრუქტურულ პროექტებს ველობილიკის გათვალისწინების გარეშე ყიდულობს. ცხადია, შემდეგში შესაბამის სამუშაოებსაც მათ გარეშე უკვეთს და ახორციელებს.
ანა ამის საილუსტრაციოდ ბაგრატიონის ქუჩის რეაბილიტაციის პროცესს ასახელებს.
„ბათუმში არსებული ველობილიკები არ იძლევა საშუალებას, რომ „ა“ წერტილიდან „ბ“ წერტილში ველოსიპედით შეუზღუდავად გადაადგილდე. ამიტომაც ითვალისწინებს სტრატეგია პირველადი ქსელის მოწყობას. პირველად ქსელში მოიაზრება ის ქუჩები, რომლებსაც ველოინფრასტრუქტურა არ აქვთ, მაგალითად, ბაგრატიონის ქუჩაზე ახლა მიმდინარეობს რეაბილიტაციის პროცესი. თავის მხრივ ეს ქუჩა შედის ამ სტრატეგიის პირველად ქსელში.
აქ არ მოაწყვეს ველობილიკი. ქსელის შექმნა წარმოუდგენელია, თუ პირველად ქსელში შესული ქუჩების რეაბილიტაციისას, ბათუმის მერია არ გაითვალისწინებს, გვერდს აუვლის ველოგადაადგილების გეგმას. ჩვენ მერიამ ამ ქუჩის გეგმები მოგვაწოდა, რაც განვიხილეთ სამუშაო ჯგუფში და ვთქვით, რომ არ აკმაყოფილებს სტანდარტს, რომლითაც გენერალური გეგმა იქნება გათვალისწინებული“, – ამბობს ანა.
ქალაქის ველოგადაადგილების გენერალური გეგმა ბათუმის საკრებულომ 2022 წლის 31 ოქტომბერს დაამტკიცა. მასზე მუნიციპალიტეტის ველომომხმარებელთა ადგილობრივი ჯგუფებისა და არასამთავრობო ორგანიზაციების წარმომადგენლები, გერმანიის ეკონომიკური თანამშრომლობისა და განვითარების ფედერალური სამინისტროს (BMZ) რეგიონული პროგრამის ფარგლებში, დაახლოებით ერთი წლის განმავლობაში მუშაობდნენ.
ამ დროისთვის ბათუმში 26 კმ სიგრძის ველოინფრასტრუქტურაა, რომელიც ძირითადად ზღვისპირა პარკისა და ქალაქის ცენტრალურ ნაწილს მოიცავს.
გეგმა ქალაქს სთავაზობს ბათუმში 66 კმ სიგრძის პერიფერიული ქსელის დაგეგმვას, ველოინფრასტრუქტურის დიზაინის პროექტის ჩათვლით.
შემოთავაზებული ქსელი მთელ ქალაქს მოიცავს და ეფუძნება დაცული ველობილიკებს – ველოსიპედით მოძრაობის სამანქანო მოძრაობისგან სტრუქტურულად განცალკევებულია. შემოთავაზებული ველოქსელების ღირებულება დაახლოებით 3.1 – 5.2 მილიონი ლარია.
გეგმის მიხედვით, მთლიანი ქსელის მოწყობისთვის მუშაობა მომავალი წლიდან დაიწყება და 2025-2030 წლებში დასრულდება. დაფინანსებისა და განხორციელების საკითხებზე ბათუმის მერიამ უნდა იმუშაოს.
ანა ნიქაბაძის ინფორმაციით, ველოგადაადგილების გეგმის დამტკიცების შემდეგ შეიქმნა ჯგუფი, რომლის მიზანიც ამ გეგმის განხორციელების მონიტორინგია. ჯგუფში მერიის სამსახურების უფროსების მოადგილეები და მერიის სხვა წარმომადგენლები, ასევე არასამთავრობო ორგანიზაციები მუშაობენ.
სტრატეგია ითვალისწინებს ასევე ველოკოორდინატორის დანიშვნას, რომელიც სამუშაო ჯგუფის მუშაობას უხელმძღვანელებდა. მერიამ ეს ფუნქცია მოქმედ თანამშრომელს შეუთავსა.
ველოგადაადგილების დამტკიცებული გენგეგმის მიხედვით, ქსელის არსში უკეთ წვდომის მიზნით, ბათუმის მარშრუტიზებული ქსელი დაყოფილია პირველად და მეორად კატეგორიებად. პირველადი ქსელი არის ბათუმში ველოსიპედის ქსელის განვითარების პირველი და ყველაზე კრიტიკული ეტაპი, ხოლო მეორადი ქსელი შედგება დამატებითი საგზაო კავშირებისაგან, რომლებიც შეიქმნება შემდგომ ეტაპზე.
