გომისმთაზე მისვლა მხოლოდ მაღალი გამავლობის ავტოტრანსპორტითაა დაშვებული და ისიც სპეციალური გრაფიკით. ოზურგეთი-გომისმთის გზაზე ავტოტრანსპორტის მოძრაობა მხოლოდ კვირას არის თავისუფალი დღე-ღამის განმავლობაში. დანარჩენ დღეებში კი მოძრაობა შეზღუდულია.
კონკრეტულად:
საქართველოს საავტომობილო გზების დეპარტამენტის ინფორმაციით, „ოზურგეთი-შემოქმედი-ბჟუჟჰესი-გომისმთას საავტომობილო გზის კმ13-კმ32,6 მონაკვეთზე, მიმდინარე სარეაბილიტაციო სამუშაოების გამო, მხოლოდ მაღალი გამავლობის ავტოტრანსპორტის მოძრაობაა დასაშვები შემდეგი რეჟიმით:
- ყოველი კვირის ორშაბათიდან-პარასკევის ჩათვლით, მოძრაობა თავისუფალია 03:00 სთ-დან, 05:00 სთ-მდე. ხოლო, დანარჩენ საათებში მოძრაობა აკრძალულია;
- შაბათს მოძრაობა თავისუფალია 15:00 სთ-დან, 21:00 სთ-მდე. ხოლო დანარჩენ საათებში მოძრაობა აკრძალულია;
- კვირას მოძრაობა თავისუფალია დღე-ღამის ნებისმიერ პერიოდში.
კვირის ნებისმიერ დღეს, დღე-ღამის დანარჩენ პერიოდში ყველა სახის ავტოტრანსპორტის მოძრაობა აკრძალულია“.
აღნიშნულ გზაზე ფაქტობრივად ანალოგიური რეჟიმი 2023 წლის 8 აგვისტოდან მოქმედებს, რომელიც 8 სექტემბერს უნდა გაუქმებულიყო, თუმცა, დეპარტამენტიდან მიღებული ინფორმაციით, გზაზე შეზღუდვები გაგრძელდა.
„აღნიშნული რეჟიმით მოძრაობა ხორციელდება შსს-ს შესაბამისი რეგიონული ქვედანაყოფების უშუალო ზედამხედველობით და კოორდინაციით. საავტომობილო გზის კმ1-კმ12 მონაკვეთზე კი, ავტოტრანსპორტის მოძრაობა თავისუფალია“ – აცხადებს გზების დეპარტამენტი.
საავტომობილო გზების დეპარტამენტთან გაფორმებული ხელშეკრულების მიხედვით, კურორტ გომისმთაზე 2023 წლის ზაფხულამდე ახალი გზა უნდა ყოფილიყო, თუმცა „რთული მეტეოროლოგიური პირობების გამო ვერ მოხერხდა სამუშაოების დასრულება ზაფხულის სეზონზე“, – მოგვწერეს დეპარტამენტის პრესცენტრიდან დაახლოებით ერთი თვის წინ.
მაშინ საავტომობილო გზების დეპარტამენტში ასევე განმარტეს, რომ „კომპანიას, სამუშაოების დასასრულებლად, ვადა 2023 წლის ბოლომდე მიეცა“.
გზის სამუშაოებს კურორტ გომისმთაზე კომპანია „ნიუ როუდი“ ასრულებს.
ამავე თემაზე:
როდის იქნება გზა გომის მთაზე? – „მეტეოროლოგიური პირობების გამო ვერ დასრულდა“
