„ჩვენ ვქმნით დღევანდელ კულტურას და არავითარ შემთხვევაში არ იქნება ეს კულტურა მოთვინიერებული და დაცენზურებული“ – აცხადებენ ხელოვანები, რომლებმაც დღეს, 20 სექტემბერს, ცენზურისა და საქართველოს კულტურის მინისტრის პოლიტიკის წინააღმდეგ აქცია გამართეს ბათუმში, ევროპის მოედანზე.
„ბათუმელებთან“ საუბარში მსახიობი თინა ლაღიძე ამბობს, რომ ხელოვანები თავისუფალი ადამიანები არიან და სურთ აზრის და შემოქმედების თავისუფლება.
„წარმოუდგენელია, რომ 21-ე საუკუნეში ვინმემ დაგიწესოს თემატიკა, ვინმემ დაგიწესოს, როგორი უნდა იყოს ფილმის დასასრული, ვინმემ შეგიზღუდოს სიტყვის თავისუფლება და ის პრობლემატიკა, რაზეც კინემატოგრაფია და ზოგადად ხელოვნება საუბრობს.
ყველა პრობლემაში თავისი თავი უნდა იცნონ ადამიანებმა. სამწუხაროდ, კაცობრიობა არ არის დალხენილი, ძალიან ბევრი ადამიანი ეძებს საკუთარ იდენტობას. იქნება ეს გენდერი, თუ სხვა მნიშვნელოვანი საკითხები, დღეს კი ამ ადამიანების აბსოლუტური უგულებელყოფა ხდება.
ჩვენ ვხედავთ, როგორ ამცირებენ, როგორ არ აქცევენ ყურადღებას უმცირესობების თემას და მალე ალბათ ეს თემები ძალიან სერიოზული ცენზურის ქვეშ გადავა“ – ამბობს თინა ლაღიძე.
მსახიობის თქმით, ჩვენ შეგვეძლო გვქონოდა კულტურის პოლიტიკა, თუმცა სინამდვილეში წულუკიანმა პუტინის მიერ გამოცემული კანონის აღსრულება დაიწყო, სადაც ნათლად წერია, რომ რუსეთის დასავლური ღირებულებების მტერია.
„ზუსტად იგივე სქემით, იგივე სცენარით მიჰყავს ჩვენს კულტურის მინისტრს თავისი რეპრესიული პოლიტიკა. იმის მაგივრად, რომ დამსხდარიყვნენ და ეფიქრათ, თუ როგორ მიიტანონ კინო მაყურებლამდე და როგორ გააკეთონ რეგიონებში და თბილისშიც მუნიციპალური კინოთეატრები.
ჩემთვის, როგორც მსახიობისთვის, აბსოლუტურად მიუღებელია ფსევდო-პატრიოტულ ფილმებში თამაში. ჩვენ არ გვაქვს ჟანრული კინო, იმიტომ, რომ ძალიან მწირი დაფინანსება გვაქვს და ამას სჭირდება დაფინანსება და მეტი განვითარება და არა მითითებები, რადგან ხელოვნება ცოცხალი და დამოუკიდებელია“ – ამბობს თინა ლაღიძე.
ხელოვანების რამდენიმეთვიანი პროტესტის შემდეგ, დღეს, 20 სექტემბერს, თეა წულუკიანმა საპარლამენტო მოსმენაზე თქვა, რომ არ რცხვენია იმის, რასაც აკეთებს.
რა მოლოდინი შეიძლება არსებობდეს მინისტრისგან? – ვკითხეთ მსახიობს.
თინა ლაღიძის თქმით, ბევრი მაგალითი გვაქვს მსოფლიოში, თუ სადამდე მიჰყავს მსგავს პოლიტიკას ქვეყნები.
„გვახსოვს, რით დასრულდა 30-იანი წლები გერმანიისთვის, მსგავსი ფსევდო-პატრიოტული რიტორიკის გამო, ვხედავთ რა ხდება ირანში და ვხედავთ სადამდე მიიყვანა ამ ფსევდო-პატრიოტულმა ყიჟინამ რუსეთი. ამიტომ, არ გვინდა რომ ჩვენც ამ გზაზე წავიდეთ.
რაც შეეხება სირცხვილს, თეა წულუკიანმა ერთ-ერთ ინტერვიუში თქვა, „ვისურვებდი ჩემს შვილს არ შერცხვესო“. მის შვილებს აუცილებლად შერცხვებათ გელათის გამო, შერცხვებათ იმის გამო, რომ დღეს ყველა სახელმწიფო თეატრს მართავს ნდობით აღჭურვილი პირი და ლოიალური ამ მთავრობის მიმართ და კიდევ ბევრი რამის, რასაც მისი პოლიტიკით აზიანებს“.
მსახიობი თინა ლაღიძე
წულუკიანის პოლიტიკას აპროტესტებს რეჟისორი გიორგი ფარქოსაძეც. მისი თქმით, კინოცენტრს და ნებისმიერ სფეროს უნდა მართავდეს პროფესიონალი და „არა ადამიანი, რომელიც ვერ ერკვევა სფეროში და მხოლოდ მინისტრის როლს ასრულებს“.
„დღევანდელი კულტურის მინისტრი სინამდვილეში არის ცენზურის, ტერორის და ნგრევის მინისტრი.
ჩვენ ვფიქრობთ, რომ კინოცენტრის დირექტორის თანამდებობა უნდა იყოს არჩევითი და ის უნდა აირჩიოს სფეროს წარმომადგენლებმა. ჩვენ კი დაგვინიშნეს დირექტორად ჩვეულებრივი პროპაგანდისტი, რომელიც პირდაპირ გვკარნახობს, როგორი დასაწყისი ან დასასრული უნდა ჰქონდეს კინოს.
თუმცა დღეს ჩვენი პრობლემა უფრო დიდია, რადგან ეს ქვეყანა და მისი ფორმალური ხელისუფლება არის მოღალატეობრივი და კოლაბორაციონისტული, შესაბამისად, ერთადერთი გამოსავალი არის ხელისუფლების ცვლილება.
ასეთ პირობებში შეუძლებელი იქნება იმ მოთხოვნების დაკმაყოფილება, რასაც ჩვენ მოვითხოვთ“ – ამბობს გიორგი ფარქოსაძე.
ხელოვანების პროტესტი ბათუმში
პროდიუსერი ირინა გელაშვილი კი მიიჩნევს, რომ თეა წულუკიანს დათმობებზე წასვლა მაინც მოუწევს, წინააღმდეგ შემთხვევაში, ხელოვანების პროტესტი არ შეწყდება.
„მე მაინც მგონია, რომ ნებისმიერ შემთხვევაში მოუწევთ დათმობებზე წასვლა წულუკიანსაც და სახელმწიფოსაც, რადგან გამორიცხულია თავისუფალი ხელოვნების გარეშე იარსებოს თავისუფალმა ქვეყანამ. ჩვენ, ყველანი ერთად ვაშენებთ თავისუფალ ქვეყანას, რადგან ასე გვინდა.
კინოხელოვანებს გვაქვს მინიმალური მოთხოვნა ამ ეტაპზე, რომ კინოცენტრის დირექტორის დანიშვნა იყოს არჩევითი წესით. ამაზე დემოკრატიული და ამაზე ელემენტარული სხვა რა შეიძლება იყოს? და როდესაც მინისტრი აკეთებს განცხადებას, რომ კინო პოლიტიკა არ არის თურმე და პოლიტიკაში ხელოვანები არ უნდა ერეოდნენ და ეს გვესმის დემოკრატიული ქვეყნის მინისტრისგან, უკვე საგანგაშოა უნდა იყოს არა მარტო ხელოვანებისთვის, არამედ ზოგადად ყველა მოქალაქისთვის“ – ამბობს ირინა გელაშვილი.
მისი თქმით, თუ ეს მინიმალური მოთხოვნებიც არ იქნება დაკმაყოფილებული სამინისტროს მხრიდან, ხელოვანები აპირებენ, ნებისმიერი ხერხით იბრძოლონ თავისუფლებისთვის.
„აუცილებლად ვიბრძოლებთ, რადგან ეს ქვეყანა ჩვენია, ეს ქვეყანა ჩვენი ასაშენებელია, ჩვენ ვქმნით დღევანდელ კულტურას და ეს არავითარ შემთხვევაში არ იქნება მოთვინიერებული და დაცენზურებული კულტურა. თავისუფალი ადამიანები ვართ და გვინდა ჩვენი აზრის და შემოქმედების თავისუფლებაში გამოხატვა“ – ამბობს ირინა გელაშვილი.
დღეს, 20 სექტემბერს, ხელოვნებისა და მეცნიერების წარმომადგენლებმა თბილისშიც, პარლამენტთან გამართეს აქცია კულტურის მინისტრ თეა წულუკიანის წინააღმდეგ
„რეპრესიული პოლიტიკა გამოუსწორებელ ზიანს აყენებს ჩვენს ისტორიულ კულტურულ მემკვიდრეობას, მიზანმიმართულად აფერხებს თანამედროვე ხელოვნების და მეცნიერების განვითარებას, ახშობს თავისუფალი და კრიტიკული პროფესიული აზრის გამოხატვას; ცდილობს კულტურის მოთვინიერებას, შეზღუდვას, სამთავრობო პროპაგანდის ინსტრუმენტად ქცევას”, – აცხადებენ აქციის ორგანიზატორები.
