ბათუმის მერიასა და საქალაქო ორგანიზაციებში დასაქმებულ საჯარო მოხელეებს 2022 წელს ჯამში 37 მილიონი ლარის ხელფასი დაერიცხათ, ტრანსპორტისთვის კი, რომელიც მათ ემსახურება, 1 მილიონი ლარი დაიხარჯა.
„ბათუმის მუნიციპალურ დაწესებულებებში დასაქმებულთა მიერ მიღებული ხელფასის და ფაქტობრივად ნამუშევარი დროის შესაბამისობა არ კონტროლდებოდა, არ ხდებოდა თანამშრომელთა სამსახურში გამოცხადებისა და მიმოსვლის აღრიცხვა“ – აცხადებს სახელმწიფო აუდიტი.
ამასთან, „მერიის ორგანიზაციებმა ვერ წარმოადგინეს გაცემული საწვავის სამსახურებრივი მიზნით ხარჯვის დამადასტურებელი სრული დოკუმენტაცია“.
აუდიტის მიხედვით, 2022 წელს ბათუმის საბიუჯეტო ორგანიზაციებში ხელფასის სახით დარიცხულია 37 037 866 ლარი, საიდანაც საშტატო ნუსხით განსაზღვრული პირების „შრომის ანაზღაურების“ ხარჯია 29 886 266 ლარი, ხოლო შტატგარეშეთა ანაზღაურების ხარჯი − 7 151 600 ლარი.
„ჩატარებული აუდიტორული პროცედურების შედეგად გამოვლინდა, რომ ხაზინის ელექტრონული მომსახურების სისტემაში, საბიუჯეტო სახსრების გადარიცხვისთვის საჭირო მონაცემების – საბანკო ანგარიშების არასწორად მითითების შედეგად რიგი თანამშრომლების ხელფასები არასწორად გადაერიცხათ სხვა თანამშრომლებს.
წარმოდგენილი ინფორმაციით, არასწორად გადარიცხული ხელფასები თანამშრომლებს შორის პირადი ანგარიშსწორებით დარეგულირდა, თუმცა აღნიშნულის დოკუმენტური დადასტურება აუდიტის მიმდინარეობის პერიოდში ვერ იქნა წარმოდგენილი“ – აცხადებს აუდიტი.
„ბათუმის მუნიციპალიტეტის მიერ ნამუშევარი დროის აღრიცხვისა და სახელფასო თანხების დანიშნულებისამებრ გამოყენების მიმართულებით არსებული ხარვეზები, შრომის ანაზღაურებასთან მიმართებით არსებული კონტროლის მექანიზმების ნაკლოვანებებზე მიუთითებს“ – აღნიშნულია აუდიტის ანგარიშში.
აუდიტი იქვე აღნიშნავს, რომ საქართველოს ჯანდაცვის მინისტრის ბრძანებით დამტკიცებული „სამუშაო დროის აღრიცხვის წესის“ მიხედვით, „სამუშაო დროის აღრიცხვის ფორმა არის დასაქმებულთა სამუშაო დროის (ნამუშევარი საათების) აღრიცხვის ყოველთვიური დოკუმენტი, რომელიც მოიცავს წერილობით ან/და ელექტრონული ფორმით აღრიცხულ მონაცემებს დასაქმებულთა მიერ ნამუშევარი საათების შესახებ“.
რაც შეეხება ტრანსპორტს. აუდიტის მიხედვით, 2022 წელს ბათუმის მუნიციპალიტეტის საბიუჯეტო დაწესებულებების ტრანსპორტისა და ტექნიკის ექსპლუატაციისა და მოვლა-შენახვის საკასო ხარჯებმა შეადგინა 1 027 691 ლარი.
მუნიციპალიტეტში 2022 წელს ავტოსატრანსპორტო საშუალებებზე ჯამში გახარჯულია 588 052 ლარის საწვავი, მათ შორის, ბალანსზე რიცხულ 83 ერთეულ ავტოსატრანსპორტო საშუალებაზე გაიხარჯა 469 407 ლარის საწვავი, ხოლო საჯარო მოხელეების პირად საკუთრებაში არსებულ 70 ერთეულ ავტოტრანსპორტზე − 118 645 ლარის საწვავი.
„ტრანსპორტთან დაკავშირებული დანახარჯების ანალიზი ცხადყოფს, რომ არასათანადო კონტროლია დაწესებული მუნიციპალიტეტის ა(ა)იპ-ების სარგებლობაში არსებულ ავტოსატრანსპორტო საშუალებებზე გამოყოფილი საწვავის ხარჯვის საკითხზე.
აღნიშნულთან დაკავშირებით ვერ იქნა წარმოდგენილი გაცემული საწვავის სამსახურებრივი მოვალეობების შესრულებისათვის ხარჯვის სრული დოკუმენტური დადასტურება.
მიზანშეწონილია, საწვავის ხარჯვის საკითხზე მუნიციპალიტეტმა შეიმუშაოს ტრანსპორტის მართვასთან დაკავშირებით ერთიანი მიდგომა და ოპტიმიზაციის გეგმა“ – აცხადებს აუდიტი.
ამავე თემაზე:
ბათუმის მერია დიდი შემოსავლის მიღების შესაძლებლობას კარგავს – აუდიტი
