ბარცხანის ხიდს რეაბილიტაცია 2021 წელს ჩაუტარდა და სამუშაოებში ქალაქის ბიუჯეტიდან 1 139 801 ლარი დაიხარჯა.
„ექსპერტის დასკვნით დგინდება, რომ განხორციელებული სამუშაოები ვერ უზრუნველყოფს ხიდის კონსტრუქციული ნაწილის მდგრადობის გაუმჯობესებას, რაც სამუშაოების პროექტთან შეუსაბამოდ განხორციელებაზე მიუთითებს“, – აცხადებს აუდიტი.
რეაბილიტირებული „ბარცხანის ხიდი“ / 18.09.2023
აუდიტის ანგარიშის მიხედვით, ბარცხანის ხიდის სარეაბილიტაციო პროექტში მერიის სამმართველოსა და შპს „ბონდი 2009“-ის შეთანხმებით შეიტანეს ისეთი ცვლილებები, რასაც სამხარაულის ექსპერტიზის ბიურო მიუღებლად მიიჩნევდა.
სახელმწიფო აუდიტი მოუწოდებს ბათუმის მერიას, „ხიდის სარეაბილიტაციო სამუშაოებთან დაკავშირებით, ექსპერტის მიერ გაცემული რეკომენდაციების შესრულებისა და ხიდის კონსტრუქციული ნაწილის მდგრადობის დადასტურებისათვის გაატაროს სათანადო ღონისძიებები.“
რეაბილიტირებულ „ბარცხანის ხიდზე“ არაერთ ადგილზე ასფალტია დაკერებული / 18.09.2023
აუდიტი ბათუმის მერიას ზოგად რეკომენდაციასაც აძლევს – „დანერგოს ისეთი კონტროლის სისტემა, რომელიც უზრუნველყოფს შესასრულებელი სამუშაოების სატენდერო პირობების შესაბამისად განხორციელებას“.
„ბათუმელები“ ქალაქის მერიას დაუკავშირდა, საიდანაც საქალაქო ინფრასტრუქტურისა და კეთილმოწყობის სამმართველოში გადაგვამისამართეს.
მერიის სამმართველოში აუდიტის შეფასებას არ ეთანხმებიან.
„ე.წ. ბარცხანის ხიდზე სამუშაოები სამშენებლო ნორმების დაცვით არის შესრულებული, რასაც ადასტურებს საბოლოო ექსპერტიზა. არსებული ხიდის კონსტრუქცია მდგრადი და უსაფრთხოა. ხიდი, ექსპლუატაციაში მიღებიდან დღემდე, სრული დატვირთვით მუშაობს“, – მოგვწერეს მერიის საქალაქო ინფრასტრუქტურისა და კეთილმოწყობის სამმართველოდან.
სამმართველოში გვითხრეს, რომ „საბოლოო ექსპერტიზა“ და სხვა დოკუმენტები შეგვიძლია წერილობით, ოფიციალურად გამოვითხოვოთ.
რეაბილიტირებულ „ბარცხანის ხიდზე“ რკინა-ბეტონის მოაჯირებიც დაბზარულია / 18.09.2023
მერიის სამმართველოს ბარცხანის ხიდის სავალ ნაწილზე დაკერებული ასფალტისა და დაბზარული ბეტონის მოაჯირების ფოტოებიც გადავუგზავნეთ და მიზეზი ვკითხეთ. თუმცა, სამმართველოდან პასუხად მხოლოდ ეს მოგვწერეს: „დატვირთულობიდან გამომდინარე, ხიდი პერიოდულად საჭიროებს ზედა საცვეთი ფენის აღდგენას, რაც საჭიროებებიდან გამომდინარე ხორციელდება.“
რა მოხდა
აუდიტის ანგარიშის მიხედვით:
ბათუმში, გოგოლის ქუჩის მონაკვეთის კეთილმოწყობის სამუშაოების შესრულებისთვის კეთილმოწყობის სამმართველოს მიერ 2021 წელს გამოცხადებულ ელექტრონულ ტენდერში მონაწილეობდა ერთი პრეტენდენტი, შპს „ბონდი-2009“. შესაბამისად, ის გამოვლინდა გამარჯვებულად.
გაფორმებული ხელშეკრულებით, მიმწოდებელს 2021 წლის 15 დეკემბრამდე უნდა შეესრულებინა 2 582 697 ლარის ღირებულების სამუშაო.
თუმცა, ხელშეკრულებით გათვალისწინებული სამუშაოს დასრულების დღეს, 15 დეკემბერს, შეიცვალა სამუშაოს დასრულების ვადა და განისაზღვრა 2021 წლის 28 დეკემბერი.
აუდიტი აღნიშნავს, რომ ამ შეთანხმებით შესაძლოა „მხარეებმა თავი აარიდეს პირგასამტეხლოს დაკისრებას“, – 56 474 ლარის ოდენობით.
„შეთანხმება N3-ით შეიცვალა სამუშაოს შესრულების ვადა 2021 წლის 28 დეკემბრის ჩათვლით, იმ მოტივით, რომ მიმწოდებელმა [ბონდი-2009] ვერ წარმოადგინა კონსტრუქციულ ნაწილზე კორექტირებული დოკუმენტაციის ექსპერტიზის დასკვნა, თუმცა, შემდგომში მოწოდებული დასკვნის შედეგები მიმწოდებელს არ გაუთვალისწინებია და დასკვნის მიღებამდე აგრძელებდა სამუშაოებს, რაც წარმოშობს რისკებს, რომ დასკვნის მოტივით მხარეებმა თავი აარიდეს პირგასამტეხლოს დაკისრებას;
კერძოდ, ხელშეკრულებით ნაკისრი ვალდებულებების დაგვიანებით შესრულების შემთხვევაში, ყოველი დაგვიანებული კალენდარული დღისთვის მიმწოდებელს ეკისრება პირგასამტეხლო შესასრულებელი ვალდებულების (დარჩენილი) შესაბამისი ღირებულების 0,5%-ის ოდენობით, რაც მოცემული გარემოებისათვის შეადგენს: 941 247ლარი*05%*12 დღე= 56 474 ლარი“, – აცხადებს აუდიტი.
რაც შეეხება ბარცხანის ხიდის პროექტში ცვლილებებს, აუდიტის მიხედვით, საპროექტო დოკუმენტაციაში შესატან ცვლილებებზე ექსპერტი [სამხარაულის ბიურო] წარდგენილი არგუმენტებით მიუღებლად მიიჩნევდა ამ ცვლილებებს და მოითხოვდა დამატებით დასაბუთებას. აუდიტის მასალების მიხედვით, ცვლილებებთან დაკავშირებით სამხარაულის ბიუროს თავად მშენებელმა კომპანიამ მიმართა.
[ცვლილებები, რასაც სამხარაულის ექსპერტიზა მიუღებლად მიიჩნევდა, შემდეგია: „ხარჯთაღრიცხვიდან შუალედურ ბურჯებზე რკინაბეტონის პერანგის მოწყობის ნაცვლად მალთაშორის გამონოლითების აღდგენა; ანაკრები კონსტრუქციის ტროტუარის ბილიკების ნაცვლად მონოლითური ტროტუარის მოწყობა; ხიდის სავალ ნაწილზე 4 სმ სისქის ასფალტის ფენის და შემდეგ 4 სმ სისქის ორი ძირითადი ასფალტის საფარის (სულ: 12 სმ) მოწყობა“].
აუდიტის მიხედვით, სამხარაულის ბიურო „მიუთითებს, რომ თუ მალები გამონოლითებულია (გადაბმულია ხისტი კვანძით), ეს მნიშვნელოვანი დარღვევაა, რითაც იცვლება საანგარიშო სქემა. საჭიროა ხიდის მალებს შორის მოეწყოს სადეფორმაციო ნაკერები.“
„აღნიშნულ საკითხთან დაკავშირებით, მიმწოდებლის მოთხოვნით, 2021 წლის 20 დეკემბერს განმეორებით წარმოდგენილია მეორე დასკვნა, სადაც ექსპერტი მიუთითებს, რომ პროექტში ცვლილებები უნდა განხორციელდეს წინა პერიოდის დასკვნით გაცემული რეკომენდაციების შესაბამისად.
ექსპერტის დასკვნის გაცემიდან 7 დღეში, 2021 წლის 27 დეკემბერს, მხარეებს შორის გაფორმებულია მიღება-ჩაბარების აქტი და შესრულებულად ნაჩვენებია დარჩენილი 941 247 ლარის ღირებულების სამუშაოები.
ექსპერტის მიერ გაცემული რეკომენდაციების გათვალისწინებით, სამუშაოების შესრულების დამადასტურებელი დოკუმენტები ვერ იქნა წარმოდგენილი – აცხადებს აუდიტი და აკონკრეტებს, რომ „შესრულებულ სამუშაოებთან დაკავშირებით ინსპექტირების ანგარიშები წარმოდგენილია მხოლოდ შესრულებული სამუშაოების ღირებულების, შესრულებული სამუშაოების აქტთან (ფორმაN2-თან) შესაბამისობაზე“.
„შესაბამისად, ექსპერტის დასკვნით დგინდება, რომ განხორციელებული სამუშაოები ვერ უზრუნველყოფს ხიდის კონსტრუქციული ნაწილის მდგრადობის გაუმჯობესებას, რაც სამუშაოების პროექტთან შეუსაბამოდ განხორციელებაზე მიუთითებს“, – ასკვნის აუდიტი.
„ბონდი-2009“-ს წილებს თანაბრად ფლობენ ბადრი ჭაღალიძე, ოთარ ფუტკარაძე, დავით დევაძე და ნუკრი დოლიძე [ნუკრი დოლიძე ბათუმის საკრებულოს ყოფილი წევრია „ნაციონალური მოძრაობის“ დროს. მისი შვილი ლევან დოლიძე კი, ბათუმის საკრებულოს წევრია „ქართული ოცნებიდან“]. კომპანიის დირექტორი მამუკა დოლიძეა.
„ბათუმელებმა“ მამუკა დოლიძესთან დაკავშირება სცადა, თუმცა მან ჩვენს სატელეფონო ზარს არ უპასუხა.
ბარცხანის ხიდი / 18.09.2023 / დოკუმენტების მიხედვით, რკინიგზაზე გადასასვლელი ე.წ. ბარცხანის ხიდი 1984 წელში აშენდა. მას შემდეგ ხიდს რეაბილიტაცია მხოლოდ 2021 წელს ჩაუტარდა. ხიდის სიგრძე 366.3 მეტრია. ხიდი, რეაბილიტაციის შემდეგ, ავტოტრანსპორტისთვის 2021 წლის სექტემბერში გაიხსნა.
ამავე ტენდერის ფარგლებში ცვლილება შეიტანეს გოგოლის ქუჩაზე მდებარე [უშუალოდ მდინარე ბარცხანაზე გადასასვლელი] ხიდის სარეაბილიტაციო პროექტშიც.
სატენდერო დოკუმენტაციით, გოგოლის ქუჩაზე მდებარე ხიდის რეაბილიტაციის სამუშაოები ითვალისწინებდა ლითონის სპეცპროფილებით, რეზინის ფასონური ფურცლებით, ლითონის ფურცლებითა და არმატურით ხიდის სადეფორმაციო ნაკერების (MAURER) მოწყობას.
აუდიტის ანგარიშში აღნიშნულია, რომ „მხარეებს შორის გაფორმებული შეთანხმებებით, სატენდერო წინადადებით გათვალისწინებული პირობების შეუსაბამოდ, ხელშეკრულებაში ცვლილებები დაუსაბუთებლად განხორციელდა. კერძოდ, სატენდერო წინადადებით გათვალისწინებული კონსტრუქცია შეცვლილია დახურული ტიპის სადეფორმაციო ნაკერის მოწყობით.“
„მიმწოდებელი კომპანიის ინფორმაციით, პროექტით გათვალისწინებული კონსტრუქცია მზადდება გერმანიაში და საქართველოს ბაზარზე მისი მოძებნა შეუძლებელია, თუმცა, შესაბამისი დოკუმენტური მტკიცებულება არ არის წარმოდგენილი. ამასთან, აღნიშნული მოტივით შესასრულებელი სამუშაოების შეცვლას სატენდერო წინადადება არ ითვალისწინებს“, – აღნიშნულია აუდიტის ანგარიშში.
ხიდი მდინარე ბარცხანაზე, რომელსაც რეაბილიტაცია 2021 წელს ჩაუტარდა/ ბათუმი, გოგოლის ქუჩა / 18.09.2023
ბათუმში, გოგოლის ქუჩის მონაკვეთის (წმ. დიაკონი სევერიანე აჭარელი აღმსარებლის ქუჩიდან ი. ნონეშვილის ქუჩამდე) კეთილმოწყობის სამუშაოებზე, გოგოლის ქუჩაზე არსებული ხიდისა და ე.წ. „ბარცხანის ხიდის“ რეაბილიტაციაზე მერიის საქალაქო ინფრასტრუქტურისა და კეთილმოწყობის სამმართველომ ტენდერი 2021 წლის 5 მარტს გამოაცხადა.
ტენდერში გამარჯვებულ „ბონდი-2009“-სთან ხელშეკრულება 2 582 697 ლარზე 2021 წლის 16 აპრილს დაიდო.
ხელშეკრულებაში ცვლილება რამდენჯერმე შევიდა და საერთო ფასების ცხრილი საბოლოოდ ასე ჩამოყალიბდა:
შესყიდვების პორტალის მიხედვით, კომპანიისთვის ჯამში გადახდილია 2 507 314 ლარი [საბოლოო სახელშეკრულებო თანხის – 2 571 604 ლარის – 97%].
ამავე თემაზე:
ფიროსმანისა და გორგასლის ქუჩები ჯავახიშვილის ქუჩასთან გადაიკეტა
