„ეს ჩაბნელებული დავით მამულაძის ქუჩაა ტურისტებით გადაჭედილ უბანში, ახალ ბულვართან ახლოს“, – ამბობს პარტია „ლელოს“ რეგიონული ლიდერი გენო თებიძე. მან დღეს, პირველ სექტემბერს, სოციალურ ქსელ „ფეისბუქში“ ბათუმის ცენტრში მდებარე ამ ჩაბნელებული ქუჩის ღამით გადაღებული ვიდეო გამოაქვეყნა და ბათუმის მერიის ყურადღება ითხოვა.
დავით მამულაძის ქუჩა ახალ ბულვარის მიმდებარედაა, გენო თებიძის თქმით, ამ ქუჩაზე, მინიმუმ ერთი წელია, გარეგანათება სრულად გამორთულია.
„დაახლოებით 2 წლის წინ ამ ქუჩის რეაბილიტაცია ჩატარდა, ტროტუარებიც მოეწყო, გარეგანათების ბოძები ახალი გააკეთეს, რამდენიმე დღით ჩართეს და რომ ჩაქრა, მას შემდეგ ამ ქუჩაზე ბნელა, თანაც დიდი მოძრაობაა, კაჩინსკების ქუჩამდე ჩადის ეს ქუჩა, დაახლოებით ნახევარი კილომეტრი სიგრძისაა,“ – ამბობს „ბათუმელებთან“ გენო თებიძე.
„აღნიშნულ საკითხი ჩვენთვის ცნობილია, საკითხი უახლოეს პერიოდში იქნება გადაწყვეტილი,“ – მხოლოდ ეს მოგვწერს ბათუმის მერიის კეთილმოწყობის და ინფრასტრუქტურის სამმართველოს პრესცენტრიდან.
უწყებაში უპასუხოდ დატოვეს სხვა შეკითხვები: რამ შეუშალა ხელი ამ დრომდე მერიას, ქუჩა გაენათებინათ? რის გამო დაზიანდა ახალრეაბილიტირებული გარეგანათების სისტემა, ან კონკრეტულად როდის განათდება ქუჩა?
დავით მამულაძის ჩაბნელებული ქუჩა ბათუმში
