საქართველოს განათლების სამინისტრომ 27 ოქტომბერი მასწავლებლის ეროვნულ დღედ გამოაცხადა და „მასწავლებლის ეროვნული ჯილდოს“ ანალოგი კონკურსი დააარსა.
სამინისტროს ცნობით, „ღვაწლმოსილი პედაგოგები“ ჯილდოს სახით სპეციალურად შექმნილი სამკერდე ნიშნის გარდა 10 ათას ლარსაც მიიღებენ.
რატომ დასჭირდა სამინისტროს უკვე არსებული მასწავლებლის ეროვნული ჯილდოს ანალოგის დაწესება? – მასწავლებლების ნაწილმა სამინისტროს ინიციატივას სიყალბე უწოდა, ისინი მიიჩნევენ, რომ აღნიშნული ჯილდოს დაწესების მიზანი ხელისუფლების მიმართ ლოიალური განწყობების შექმნაა.
2022 წლის მასწავლებლის ეროვნული ჯილდოს მფლობელი პედაგოგი, სოფელ მეკეიძეების ინგლისური ენის მასწავლებელი როლანდ შავაძეც მიიჩნევს, რომ სამინისტრო გულწრფელი არ არის და ასევე, ჯილდოსთვის შერჩეული ჯვრის სიმბოლიკა ეწინააღმდეგება კანონს ზოგადი განათლების შესახებ, რომელიც სკოლებში რელიგიურ ინდოქტრინაციას კრძალავს.
„ზოგადად, მომხრე ვარ, რომ მასწავლებლები უნდა წაახალისო და ეს არ არის პრობლემა, თუმცა აქ გვაქვს ორი პრობლემა.
ერთი არის ის, რომ ეროვნული ჯილდოს მოდელი უკვე არსებობს ქვეყანაში, უფრო მეტი სანდოობით სარგებლობს და შერჩევის წესიც ბევრად ღია და გამჭვირვალეა, ასევე, დაკომპლექტებულია ობიექტური ჟიურით და არ ხდება სისტემის ჩარევა პროცესში.
ყოველ შემთხვევაში, ასეთ განწყობებს გვიქმნის „მასწავლებლის ეროვნული ჯილდო“ და პირადად მეც სწორედ ამის გამო მივიღე კონკურსში მონაწილეობა.
როლანდ შავაძე, „მასწავლებლის ეროვნული ჯილდოს“ გამარჯვებული. 2022 წელი
სამინისტრომ რაც დააწესა, ამ კონკურსში ჩემი მონაწილეობა გამორიცხული იქნებოდა.
პედაგოგს, რომელიც ცვლილებებზეა ორიენტირებული, რაღაც საკითხებს კრიტიკულად უყურებს და პრობლემებზე ღიად და ხმამაღლა საუბრობს, ვფიქრობ, სამინისტროს კონკურსში გამარჯვების შანსი არ აქვს.
თან, როცა ზუსტად იმავე კონკურსს აწესებ, რაც უკვე არსებობს და მეტი შემოქმედებითი ნიჭი არ გაქვს, რომ რაიმე ახალი და განსხვავებული დააწესო, სასაცილოა.
პრობლემურია ჩანაწერიც, რომ ჟიურიში იქნებიან „სხვადასხვა სფეროში გამოჩენილი ადამიანები“. მომღერალმა რატომ უნდა შემაფასოს ან ინჟინერმა? ჩემი საქმიანობა ესმით განათლების სფეროში მომუშავე ადამიანებს და ამ სფეროში მყოფმა კომპეტენტურმა პირებმა უნდა შეაფასონ მასწავლებელი.
შეიკრიბებიან რაღაც სფეროებში ავტორიტეტული, ხელისუფლების მიმართ ლოიალურად განწყობილი პირები და რეალურად მიიღებენ დაკვეთას სამინისტროსგან, თუ ვინ უნდა გავიდეს.
ის გამარჯვებულიც ალბათ იქნება ისეთი პედაგოგი, რომელიც იმუშავებს იმისთვის, რომ მასწავლებლები არ იყვნენ კრიტიკულად განწყობილი ხელისუფლების მიმართ და არ ამოიღონ ხმა სისტემაში არსებულ პრობლემებზე“ – ამბობს როლანდ შავაძე.
მისი აზრით, ასევე პრობლემურია ჯილდოს მთავარ სიმბოლოში რელიგიური ატრიბუტიკის გამოყენება.
„თუ ჩვენ სეკულარიზმზე ვსაუბრობთ, რაც დემოკრატიული ქვეყნის მთავარი პრინციპია, ამ შემთხვევაშიც სეკულარული ქვეყანა უნდა ითვალისწინებდეს სხვადასხვა აღმსარებლობის ადამიანებს, მათ შორის ეთნიკურ თუ რელიგიურ უმცირესობებს და თუნდაც ათეისტ მასწავლებლებს.
როცა შენ მთავარ ჯილდოს აწესებ და იქ დომინანტი რელიგიის სიმბოლო გაქვს გამოყენებული, ეს ნიშნავს, რომ სხვა რელიგიის მიმდევრებს ან არ ითვალისწინებ, ან ეუბნები, რომ თქვენ არ მოგიაზრებთ ამ ჯილდოში, რომ კონკრეტულად ერთი ჯგუფისთვისაა ეს ჯილდო განკუთვნილი და საერთოდ არ აინტერესებთ უმცირესობების ხმა. აი, ეს მესიჯია ამ სიმბოლოში ჩადებული, ჩემი აზრით“- ამბობს როლანდ შავაძე.
სამინისტროს მიერ შერჩეული სიმბოლო
მისი აზრით, განათლების სამინისტრომ ამ სიმბოლიკის შექმნისას ძალიან დიდი შეცდომა დაუშვა, რაზეც საზოგადოების ნაწილს ადეკვატური რეაქცია ჰქონდა.
„სხვათა შორის, დავაკვირდი მასწავლებლების რეაქციებსაც და ის ჩანაფიქრი, რაც ჰქონდა სამინისტროს, არ მოუწონეს იმ ჯგუფებმაც კი, ვისზეც იყო ეს სიმბოლო გათვლილი.
განათლებაში ძალიან ბევრი სიმბოლოა და აქედან შეიძლებოდა რაიმეს შერჩევა, მაგრამ ესეც არ გაითვალისწინეს, რადგან როცა სიყალბეა, ეს ჩანს ნებისმიერ ნიუანსში.
თუ მაინც და მაინც ჯვრის ეფექტი უნდოდათ, შეეძლოთ სახელმწიფო დროშა გამოეყენებინათ“- ამბობს როლანდ შავაძე.
მისი თქმით, საგანმანათლებლო სივრცეში რელიგიური სიმბოლოების გამოყენებას კანონი კრძალავს, რასაც სამინისტრო არც ამ შემთხვევაში ითვალისწინებს.
„ჩემთვის, როგორც მუსლიმი მასწავლებლისთვის, ძალიან უხერხულია ამაზე ხმამაღლა საუბარი, რადგან არ მინდა საზოგადოებამ ეს ჩემი რელიგიიდან გამომდინარე განსაჯოს.
მე გამოვდივარ კანონმდებლობიდან, როცა ამაზე ვსაუბრობ, რადგან თუ ვთანხმდებით საზოგადოება, რომ სკოლებში ინდოქტრინაცია მიუღებელია, მაშინ სკოლებში არ უნდა ხდებოდეს კანონსაწინააღმდეგო პრეცედენტები.
ახლა ავტორიზაციის პროცესში ვარ ჩართული და ძალიან ბევრ სკოლაში მიწევს შესვლა, სადაც ვხედავ, როგორ არის განთავსებული რელიგიური ატრიბუტები თვალსაჩინო ადგილებში, მათ შორის სასწავლო სივრცეებში. ვისაც ამის მონიტორინგი ევალება, იმ ადამიანებსაც კი არ აქვთ ამაზე რეაქცია.
მასწავლებლის ჯილდოზე გამოსახული სიმბოლიკით კი სამინისტრო ახალისებს ინდოქტრინაციას, რადგან ეს სიმბოლიკა მკერდზე უნდა ატაროს მასწავლებელმა და სასწავლო პროცესის დროს, წესით, ამას არ უნდა აკეთებდეს და უნდა ითვალისწინებდეს სხვადასხვა აღმსარებლობის მოსწავლეებსაც.
ამიტომ ვართ რეალურად სიყალბეში. კანონში ერთი გვიწერია და ვახალისებთ მეორეს“ – ამბობს როლანდ შავაძე.
განათლების სამინისტროს არ დაუკონკრეტებია, ვინ დააფინანსებს ჯილდოს, კერძო სპონსორი, თუ ბიუჯეტიდან გამოიყოფა თანხა.
„თუ ამის რესურსი აქვს სამინისტროს, რომ ყოველ წელს 10 ათასი ლარი გამოყოს, ნებისმიერ სკოლაში რომ შევიდნენ, ძალიან ბევრ პრობლემას გადააწყდებიან და შეეძლოთ ეს თანხები ამ პრობლემის მოგვარებისკენ მიემართათ“- ამბობს როლანდ შავაძე.
რაც შეეხება „მასწავლებლის ეროვნულ ჯილდოს“, ის მეშვიდე წელია, რაც დაარსდა განათლების კოალიციის მიერ და კერძო დამფინანსებლები ჰყავს.
