ბათუმში ისტორიული აბანოს შენობის ფანჯრები ბეტონის ბლოკებით ამოაშენეს

ბათუმში, ხულოს ქუჩაზე მდებარე ყოფილი აბანოს შენობის ფასადის ფანჯრები ბეტონის ბლოკებით ამოაშენეს.

შენობა კულტურული მემკვიდრეობის ძეგლია.

ამ შენობაში სულიკო ჟღენტის სახელობის ბათუმის კინოს მუზეუმის გახსნა იგეგმება. სამშენებლო სამუშაოებისთვის 1 მილიონ 733 ათას 333 ლარი დაიხარჯება.

ბათუმში, ხულოს ქუჩაზე მდებარე ყოფილი აბანოს შენობის ფასადის ფანჯრები ბეტონის ბლოკებით ამოაშენეს / 29.08.2023

სამუშაოების შესყიდვაზე ტენდერი სსიპ „აჭარის მუზეუმს“ ჰქონდა გამოცხადებული, გამარჯვებული კი სამშენებლო კომპანია „ივერთმშენია“. ის ტენდერში ერთადერთი მონაწილე იყო და მასთან „აჭარის მუზეუმმა“ ხელშეკრულება 2023 წლის 23 მაისს გააფორმა.

„ივერთმშენს“ ყოფილი აბანოს შენობაზე სამუშაოებს ჩატარება იმ პროექტის მიხედვით ევალება, რომელიც „აჭარის მუზეუმმა“ შპს „არქიტექტურის სახელოსნოდან“ 39 ათას 999 ლარად შეისყიდა.

პროექტის განმარტებით ბარათში კი, აღნიშნულია, რომ:

„საგამოფენო სივრცეში და კინოდარბაზში დღის შუქის არასაჭიროების გამო უქმდება ფასადზე გამომავალი ფანჯრებიც [გარდა ვესტიბიულის ორი ფანჯრისა, რომლებიც ვიტრაჟებად ტრანსფორმირდება]. დღეს ფანჯრის ღიობებში მეტალო-პლასტმასის პროფილებია ჩასმული. შესაბამისად, ავთენტურობის დაცვის თვალსაზრისით მათი მოშორება პრობლემას არ წარმოადგენს.

რაც შეეხება თავად ღიობებს, მათი შევსება მოხდება მსუბუქი ბლოკით, გარშემო არსებული კარნიზების დაუზიანებლად, მომავალში, საჭიროებისამებრ გახსნის პერსპექტივით. ვესტიბიულის მხარეს კი პირიქით, არსებული ორი ღიობი იატაკამდე გაფართოვდება და მათში ხისპროფილიანი ვიტრაჟები ჩაისმება.

ეს გამოიწვევს არსებული კარნიზების ორ ადგილას მოშლას, თუმცა რაკი ფასადზე აღნიშნული კარნიზები მრავლადაა წარმოდგენილი, არ გამოიწვევს ფასადის კომპოზიციური სტრუქტურის რღვევას.“

ყოფილი აბანოს შენობის არქიტექტურულ-მხატვრული გადაწყვეტის დეტალების სრულად სანახავად გადადით ამ ბმულზე

ტენდერში გამარჯვებული ანუ „ივერთმშენი“, ტენდერის პირობის მიხედვით, ვალდებული იყო „აჭარის მუზეუმის“ მიერ გადაცემული პროექტის საფუძველზე, მშენებლობის ნებართვა აჭარის კულტურული მემკვიდრეობის დაცვის სააგენტოდან აეღო [ხელშეკრულების დადებიდან არაუგვიანეს ერთი თვის ვადაში].

„ივერთმშენში“ „ბათუმელებს“ უთხრეს, რომ მშენებლობის ნებართვა აჭარის კულტურული მემკვიდრეობის დაცვის სააგენტოდან, ხელშეკრულების გაფორმებიდან დაახლოებით ერთ კვირაში მიიღეს: „სააგენტოს პროექტთან დაკავშირებით შენიშვნები არ ჰქონია… ნებართვა მივიღეთ და ვაგრძელებთ სამუშაოებს“.

ყოფილი აბანოს შენობაზე სამუშაოები ხელშეკრულების გაფორმებიდან არაუგვიანეს 18 თვის ვადაში ანუ 2024 წლის ოქტომბრამდე უნდა დასრულდეს.

„შედეგად ვიღებთ ოთხი ფენის მქონე ისტორიულ ნაგებობას:
1. ოსმალური აბანო გუმბათებიანი ნაწილით
2. XIX საუკუნის გაფართოება და ფასადი
3. 2015 წელს განხორციელებული ჩარევა
4. აქ წარმოდგენილი პროექტით გათვალისწინებული ჩარევა“ – აღნიშნულია პროექტში, რომლის მიხედვითაც ყოფილი აბანოს შენობაზე სამუშაოები ახლა მიმდინარეობს.

ბათუმში, ხულოს ქუჩაზე, N10-ში, ყოფილი აბანოს შენობაში, 550 ათას ლარად ადრე „ბათუმის მუზეუმის“ გახსნა იგეგმებოდა. მოგვიანებით კი აქ კინოს მუზეუმის გახსნა გადაწყდა.

შენობის კინოს მუზეუმად გადაკეთებაზე ტენდერი 2022 წლის 24 მარტიდან 29 ივლისის ჩათვლით პერიოდში, აჭარის მუზეუმმა ოთხჯერ გამოაცხადა – 1 189 320 ლარით, თუმცა მონაწილეობა არავინ მიიღო. შესაბამისად, ეს ტენდერები არ შედგა.

აჭარის მუზეუმმა სულიკო ჟღენტის სახელობის ბათუმის კინოს მუზეუმის სამშენებლო-სარეაბილიტაციო სამუშაოების [2023-2024წ.] შესყიდვაზე ტენდერი ბოლოს, გაზრდილი თანხით – 1 778 806 ლარით გამოაცხადა, სადაც წინადადებების მიღება 2023 წლის 24 აპრილს დასრულდა.

ამ თემაზე:

https://batumelebi.netgazeti.ge/news/472169/