ბათუმის ბულვარში „მექსიკური სკვერის“ მოწყობაა დაგეგმილი. ახალი სკვერის მოწყობის საპროექტო-სახარჯთაღრიცხვო დოკუმენტაციის მომზადებაზე ბულვარის ადმინისტრაციამ ტენდერი უკვე გამოაცხადა.
სკვერი გრიბოედოვისა და რუსთაველის ქუჩების კვეთის მიმდებარედ [საზღვაო აკადემიის მოპირდაპირედ], 400 კვადრატულ მეტრ ფართობს დაიკავებს.
„საპროექტო ტერიტორია მდებარეობს ბულვარის ერთ-ერთ დატვირთულ ლოკაციაზე, გრიბოედოვის ქუჩის შესასვლელში. აღნიშნული ტერიტორიის მიმდებარედ განთავსებულია პარკირების ზონა, ავტობუსის მოსაცდელი, სავარჯიშო მოედანი და რამდენიმე რესტორანი“, რაც, ბულვარის ადმინისტრაციის განცხადებით, არსებულ სივრცეში ვიზიტორთა რაოდენობას ზრდის.
„ამჟამად საპროექტო ტერიტორიაზე რამდენიმე უსახური მცენარეა განთავსებული, აგრეთვე არ არის მოსასვენებელი სივრცე. ზემოთ აღნიშნულიდან გამომდინარე მივიღეთ გადაწყვეტილება, გაგვეშენებინა ე.წ. „მექსიკური სკვერი“. – აღნიშნულია განმარტებით ბარათში.
მექსიკური სკვერი / რენდერი-კონცეფცია განმარტებითი ბარათიდან
ბულვარის განმარტებით: „ესკიზში გამოყენებულია ბუნებრივი ქვის ფორმირებული სკამი, რომელიც მთლიან პერიმეტრზე ტალღისებურადაა განთავსებული. აღნიშნული სკამი ერთგვარი დიდი ქოთნის შთაბეჭდილებას ქმნის, რომელშიც მცირე ზომის ბორცვზე განთავსებულია გუბურა ჩანჩქერით სხვადასხვა ზომის ბრტყელი ქვები, ქოთნები და დეკორატიული ქვიშა.
ამგვარი გადაწყვეტა სკვერს ქუჩის მხრიდანაც თვალსაჩინოს ხდის, აგრეთვე ერთგვარი ბარიერია ცხოველთათვის. საპროექტო სივრცეს ამშვენებს სუკულენტების, კაქტუსებისა და სხვადასხვა დეკორატიული მცენარის კომპოზიციები. სკვერი ღამით ნათდება მცირე ზომის პროჟექტორული სანათებით, რაც სივრცეს მეტად აღქმადს ხდის.“
მექსიკური სკვერი / რენდერი-კონცეფცია განმარტებითი ბარათიდან
ახალი სკვერის პროექტისა და ხარჯთაღრიცხვის მომზადებაზე გამოცხადებულ ტენდერში წინადადებების მიღება 2023 წლის პირველ სექტემბერს დაიწყება და 4 სექტემბერს დასრულდება. სატენდერო თანხა 11 ათას 16 ლარია.
ტენდერში გამარჯვებულმა პროექტი და ხარჯთაღრიცხვა ერთ თვეში უნდა მოამზადოს.
ამ დოკუმენტების მომზადების შემდეგ კი, დაზუსტდება რამდენი ლარი იქნება საჭირო ახალი სკვერის მოსაწყობად. სამუშაოების შესყიდვაზე ტენდერს ცალკე გამოაცხადებენ.
განმარტებით ბარათს ასევე ახლავს ხე-მცენარეების ჩამონათვალი, რომლებიც მექსიკური სკვერის ტერიტორიაზე უნდა განთავსდეს. ეს ჩამონათვალი ახლავს სატენდერო დოკუმენტაციასაც.
მექსიკური სკვერისთვის შესაძენი ხე-მცენარეების ჩამონათვალში 39 დასახელების მცენარეა, მათი საერთო რაოდენობა კი არის – 2 655.
„ამ რაოდენობის მცენარეები დაირგვება ახალ სკვერში, თუმცა მათ ცალკე ტენდერით შევისყიდით. ახალი სკვერის კონცეფცია – თუ როგორი ვიზუალი ექნება მას, ჩვენ მიერ არის შემუშავებული. რაც შეეხება გრიბოედოვის ქუჩის დასაწყისში მდებარე პარკინგს, ეს ტერიტორია არ არის ჩვენ სარგებლობაში და მას, ბუნებრივია, არ ვეხებით. სკვერი პარკინგსა და იქვე მდებარე ტრენაჟორებს შორის მოეწყობა,“ – გვითხრეს ბულვარის ადმინისტრაციაში.
„მექსიკური სკვერის“ საპროექტო ტერიტორია ბათუმის ბულვარში [მონიშნულია წითელი ხაზით]
