ლატვიის ხელისუფლება აპირებს შეარბილოს კანონი იმიგრაციის შესახებ და კანონში შეიტანოს ცვლილება, რომელიც ითვალისწინებს ორწლიანი დროებითი ბინადრობის ნებართვის გაცემას.
კანონში ცვლილების შემდეგ ლატვიის ხელისუფლება ორწლიან ვადას მისცემს ქვეყანაში მცხოვრებ რუსეთის მოქალაქეებს, ისწავლონ ლატვიური A2 დონემდე, ჩააბარონ გამოცდა და დაიბრუნონ ლატვიაში მუდმივი ცხოვრების უფლება.
2022 წლის სექტემბერში ლატვიის ხელისუფლებამ შეცვალა კანონი იმიგრაციის შესახებ, რომლის შემდეგ რუსული პასპორტის მქონე და ლატვიაში მუდმივად მცხოვრებ პირებს ენის გამოცდა ერთი წლის განმავლობაში უნდა ჩაებარებინათ. კანონი შეეხო ამ ქვეყანაში მცხოვრებ 25 000 რუსეთის მოქალაქეს.
„დოიჩე ველეს“ რუსული რედაქცია წერს, რომ ლატვიის სეიმის მოქალაქეობის, მიგრაციისა და სოციალური ერთიანობის კომისიის ხელმძღვანელის, ინგმარს ლიდაკის შეფასებით, დაახლოებით 6 000 რუსს არ მიუმართავს განცხადებით გამოცდის ჩაბარების შესახებ, შესაბამისად, 2 სექტემბერს მათ უნდა მიიღონ წერილი ქვეყნის დატოვების მოთხოვნით სამი თვის განმავლობაში, თუმცა კანონში ცვლილების შემდეგ მათ აღარ მოუწევთ ქვეყნის დატოვება და კიდევ ორი წელი ექნებათ ენის შესასწავლად.
„ადამიანი ცხოვრობს 30 წელი ქვეყანაში, არ საუბრობს ლატვიის სახელმწიფო ენაზე და მაინც ამტკიცებს, რომ ვალდებულია ჰქონდეს ბინადრობის ნებართვა… იურიდიული თვალსაზრისით, მათ არაფერი აქვთ საერთო ლატვიასთან. ყველა რუსეთის მოქალაქეა“, – ციტირებს „დოიჩე ველე“ რიჰარდს კოლსს, ლატვიის სეიმის დეპუტატს.
აღნიშნული კანონი ლატვიაში 2022 წელს მიიღეს, მას შემდეგ, რაც რუსეთი უკრაინას დაესხა თავს. 2022 წლიდან ლატვიაში აკრძალულია ყველა სატელევიზიო რუსული არხი.
____________
ფოტოზე: რიგა/ვიკიპედია
