შეფასებისა და გამოცდების ეროვნული ცენტრი უარს ამბობს აღასრულოს სასამართლოს გადაწყვეტილება, რომელიც ითვალისწინებს ერთ-ერთი აბიტურიენტის, სანდრო ბაჩიაშვილის განმეორებით გამოცდაზე გასვლას.
თბილისის საქალაქო სასამართლომ 27 ივლისს დააკმაყოფილა აბიტურიენტის მოთხოვნა განმეორებითი გამოცდის უფლებაზე.
თუმცა დღეს ცნობილი გახდა, რომ გამოცდების ეროვნული ცენტრი სასამართლო გადაწყვეტილების აღსრულებაზე უარს აცხადებს. ეს დასტურდება წერილით, რომელიც დღეს, 2 აგვისტოს, გაუგზავნა ცენტრმა აბიტურიენტს.
„… რაც შეეხება განჩინების აღსრულების საკითხს, გაცნობებთ, რომ სასამართლოს გაეგზავნა ცენტრის პოზიცია აღნიშნული განჩინების აღუსრულებლობის შეუძლებლობაზე და განემარტა, რომ 2023 წლის 25 ივლისს ცენტრმა ჩაატარა ისტორიის საგანში დამატებითი სესია იმ პირებისთვის, ვისაც წარმოდგენილი ჰქონდა შესაბამისი დოკუმენტი.
ამიტომ, ვინაიდან ისტორიის საგანში უკვე ჩატარდა დამატებითი სესია, ცენტრი მოკლებულია შესაძლებლობას, აღასრულოს სასამართლოს განჩინება და დაუშვას აბიტურიენტი გამოცდაზე“, – წერია გამოცდების ეროვნული ცენტრის ოფიციალურ წერილში, რომელიც აბიტურიენტს გაეგზავნა.
აბიტურიენტის უფლებებს სასამართლოში იცავდა არასამთავრობო ორგანიზაცია „პარტნიორობა ადამიანის უფლებებისთვის“.
ორგანიზაციის ხელმძღვანელის, ანა არგანაშვილის თქმით, ცენტრის პასუხში ყველაზე დიდი პრობლემა ის არის, რომ სახელმწიფო უწყება უარს ამბობს სასამართლოს გადაწყვეტილების აღსრულებაზე, რაც სისხლის სამართლის დანაშაულია.
„სასამართლოს გადაწყვეტილების აღუსრულებლობა სისხლის სამართლის დანაშაულია – ყველაფერი დგას იმაზე, რომ სასამართლოს ყველა გადაწყვეტილება უნდა აღსრულდეს.
მაშინ რა თქვას იმ ადამიანმა, ვისაც საპატიმრო სასჯელი მიუსაჯეს? შეიძლება, რომ არ აღასრულო ასეთი გადაწყვეტილება? ეს პრეცედენტი ძალიან საშიშია და შეუძლებელია, რომ ამას გულგრილად მოვეკიდოთ, რადგან ეს საფრთხეს უქმნის სასამართლოს ყველა სხვა გადაწყვეტილებასაც“, – ამბობს ანა არგანაშვილი.
მისი თქმით, გამოცდების ცენტრის არგუმენტი ვერ მიიჩნევა ლეგიტიმურად, რადგან ის ეუბნება სასამართლოს, რომ მან უკვე ჩაატარა განმეორებითი გამოცდა და კიდევ ერთხელ ვერ ჩაატარებს.
„მატერიალური რესურსების მიზეზად მოყვანა სრულიად არარელევანტურია, რადგან ჩვენ ვსაუბრობთ დისკრიმინაციაზე. გაეროს კომიტეტის განმარტებაა, რომ დაუშვებელია ამ არგუმენტით უარი უთხრა აბიტურიენტს განმეორებით გამოცდაზე.
ცენტრი როცა ამბობს, რომ უკვე ჩაატარა განმეორებითი გამოცდა, ის იყო სხვა მიზეზით განპირობებული. ხოლო როცა დაგავალებს სასამართლო, ის აუცილებლად უნდა აღასრულო.
არც კი მიმაჩნია, რომ გამოცდების ცენტრის არგუმენტაციაში უნდა შევიდეთ ღრმად, რადგან სამართლებრივად ეს არგუმენტი არარელევანტურია, ცალსახად ურღვევს ნაეკი არა მარტო განათლების უფლებას აბიტურიენტს, არამედ მართლმსაჯულებაზე ხელმისაწვდომობის უფლებასაც. რა თქმა უნდა, ეს მომავალში შეფასდება როგორც ძალიან სერიოზული დარღვევა სახელმწიფო უწყების მხრიდან, მაგრამ ეს არის დროის საკითხი და აბიტურიენტს ახლა სჭირდება ამ გადაწყვეტილების აღსრულება“, – ამბობს ანა არგანაშვილი.
მისი თქმით, თუ სახელმწიფო უწყებები უარს იტყვიან სასამართლოს გადაწყვეტილების აღსრულებაზე, ეს უკვე არის სერიოზული კრიზისი მართლმსაჯულებაში.
აბიტურიენტი სანდრო ბაჩიაშვილი მესამე გამოცდის წინ ავად გახდა, რის გამოც მან ვერ მოახერხა ეროვნულ გამოცდაზე გასვლა.
„ბათუმელებთან“ აბიტურიენტის დედა საუბრობს იმ გარემოებებზე, რის გამოც მისმა შვილმა ფიზიკურად ვერ შეძლო გამოცდაზე გასვლა.
_______________
ამ თემაზე:
ჩემი შვილი ავად იყო, მაგრამ განმეორებით გამოცდაზე გასვლის უფლებას არ აძლევენ – მშობელი
