სარეკლამო კამპანია „გამომყევი აჭარაში“ შენთვისაა, თუ იყენებ ფეისბუქს, ინსტაგრამს, ტიკტოკსა და Youtube პლატფორმებს, გყავს ბევრი გამომწერი და გიყვარს მოგზაურობა, ფოტოებისა და ვიდეოების გადაღება.
თუ 15 აგვისტოდან ორი თვის განმავლობაში იმოგზაურებ აჭარაში და ამის შესახებ შენი ფოტო/ვიდეოკონტენტი, პოსტები თუ რილსები ჯამში 10 მილიონზე მეტ გამოხმაურებას [reach] დააგროვებს, მთავარ პრიზს, 100 000 ლარს მოიგებ.
სოლიდური ფულადი პრიზებია დაწესებული გამარჯვებულის შემდეგ მაქსიმალური გამოხმაურების მქონე პოსტების 5 ავტორისთვისაც. ხუთეულიდან თითოეული 20 – 20 000 ლარს მიიღებს.
სარეკლამო კამპანია „გამომყევი აჭარაში“ აჭარის ტურიზმისა და კურორტების დეპარტამენტის პროექტია.
29 ივლისს ბათუმში, სასტუმრო „ქორთიარდ მერიოტში“, აჭარის ტურიზმის დეპარტამენტის ხელმძღვანელი თინათინ ზოიძე, ბათუმის მერი არჩილ ჩიქოვანი და აჭარის ფინანსთა და ეკონომიკის მინისტრი ჯაბა ფუტკარაძე ბლოგერებს, ინფლუენსერებს შეხვდნენ, გააცნეს მათ სარეკლამო კამპანიის პირობები და სამომავლო შედეგებზეც იმსჯელეს.
აჭარა ოთხივე სეზონზე მიმზიდველი და მრავალფეროვანი რეგიონია, ზაფხულში მწველი მზით, ზღვით, მთაში ლაშქრობებით, შემოდგომაზე – ფორთოხლისა და მანდარინის რთველით, სუსხიან ზამთარში – თოვლზე სრიალით, გაგიჟებული ზღვის შტორმით, სოფლების საოჯახო სასტუმროებში ღუმელთან მიფიცხებით და აჭარული, ცხელი კერძების დაგემოვნებით.
მწვანე კონცხი
კონკურსისა და სარეკლამო კამპანიის მიზანიც ოთხივე სეზონზე მიმზიდველი აჭარის წარმოჩენაა.
- პროექტში რეგისტრაცია 1-ელი აგვისტოდან იწყება. მსურველი პროექტში ჩართვას კამპანიის მიმდინარეობის ნებისმიერ ეტაპზე შეძლებს.
- მონაწილეობის მისაღებად აუცილებელია ონლაინრეგისტრაცია სპეციალურად შექმნილ ვებგვერდზე: followajara.ge
- რეგისტრაციის გავლის შემდეგ მონაწილეს შემთხვევითობის პრინციპით მიუვა „სამოგზაურო პაკეტი“, რომელშიც წინასწარაა განსაზღვრული რომელი სამთო და საზღვაო ტურისტული ადგილები უნდა მოინახულოს.
ტბა ტბიყელი
- ადგილები შერჩეულია „აჭარის ტურისტული ანბანის“ პროექტის მიხედვით. მასში შესულია რეგიონის ყველა მუნიციპალიტეტის ძირითადი, ცნობილი თუ ნაკლებ ცნობილი ტურისტული ადგილები, პროდუქტები და ობიექტები.
- „აჭარის ტურისტული ანბანი“ აჭარის მთის, ზღვისპირეთის, სამზარეულოს, არქიტექტურის, კულტურული ძეგლების შესახებ გადაღებული ვიდეოსერიაა, რომელიც ამ რეგიონის მიმართ მაშინვე აღძრავს ინტერესს და გაცნობთ ყველაფერს, რაც აჭარაში აუცილებლად უნდა ნახოთ.
- აუცილებელია, უკვე რეგისტრირებულმა მონაწილეებმა კამპანიის პერიოდში იმოგზაურონ აჭარაში, მოინახულონ „სამოგზაურო პაკეტში“ მითითებული ადგილები, თითოეულ ადგილზე შექმნან აჭარაში მოგზაურობასთან დაკავშირებული, შიდა ტურისტების მასტიმულირებელი კონტენტი და განათავსონ სოციალურ ქსელებში ჰეშთეგით – #გამომყევიაჭარაში.
- აჭარის ტურიზმისა და კურორტების დეპარტამენტი არ ანაზღაურებს პროექტის მონაწილეების განთავსების, კვების, ტრანსპორტირებისა თუ სხვა ხარჯებს.
კამპანია გაგრძელდება 15 აგვისტოდან 15 ოქტომბრამდე. კონკურსის შედეგების მიწოდების პერიოდია 16 ოქტომბერი, 23:00 საათამდე.
სარფი
2023 წლის ოქტომბერში გაიმართება პროექტის შემაჯამებელი ღონისძიება, რომელზეც გამოვლინდებიან და დაჯილდოვდებიან გამარჯვებულები.
კონკურსის გამარჯვებული გამოვლინდება კამპანიის პერიოდში აჭარის შესახებ გამოქვეყნებულ პოსტებზე, რილსებსა თუ ვიდეოებზე მიღწეული წვდომების (reach) საერთო ჯამით. დაჯამდება კონკურსში მონაწილე თითოეული წევრის მიერ აჭარის პოპულარიზაციის მიზნით გამოქვეყნებული კონტენტის საერთო წვდომა, მაქსიმალური წვდომის მქონე ინფლუენსერი კი, რომელიც აჭარის შესახებ გამოქვეყნებულ პოსტებზე ჯამში დააგროვებს მინიმუმ 10 მილიონ წვდომას, გაიმარჯვებს და მოიგებს მთავარ პრიზს.
გამოიყენეთ შესაძლებლობა, იმოგზაურეთ აჭარაში, აღმოაჩინეთ ახალი სივრცეები და მიიღეთ ფულადი ჯილდო! პროექტში რეგისტრაცია უკვე დაწყებულია.
კონკურსის წესებისა და პირობების შესახებ სრული ინფორმაციის სანახავად ეწვიეთ ბმულს.
ბათუმი
